ەلوردانىڭ سارىارقا اۋدانىندا بەكەتاي كوشەسىندەگى عيماراتتاردىڭ ءبىرى ورتەنىپ جاتىر. قازىر جەدەل شتاب اشىلىپ, 2 ءورت ءسوندىرۋ ۋچاسكەسى ۇيىمداستىرىلدى, دەپ حابارلايدى ۆەدومستۆونىڭ ءباسپاسوز قىزمەتى.
ءورت سوندىرۋشىلەر كەلگەن كەزدە ەكى قاباتتى عيماراتتىڭ ءبىرىنشى قاباتىنداعى گاراجدا ەكى اۆتوكولىك جانىپ جاتقانى انىقتالدى. وت جانىندا ورنالاسقان ءتورت قاباتتى قوناقۇيدىڭ شاتىرىنا دەيىن تاراعان.
– جەرگىلىكتى جەردە جەدەل شتاب اشىلىپ, 2 ءورت ءسوندىرۋ ۋچاسكەسى ۇيىمداستىرىلدى. وقپاندار ەنگىزىلدى, سۋدىڭ ۇزدىكسىز بەرىلۋى قامتاماسىز ەتىلدى. جانۋ وشاقتارىنا قول جەتكىزۋ جانە وتتىڭ ودان ءارى تارالۋىن بولدىرماۋ ءۇشىن عيماراتتىڭ شاتىرى اشىلادى. وقيعا ورنىندا قۇتقارۋشىلار جوعارى دارەجەمەن جۇمىس جاساپ جاتىر. زارداپ شەككەندەر تۋرالى اقپارات تۇسكەن جوق, – دەلىنگەن حابارلامادا.
قازىر 150 شارشى مەتر الاڭدى شارپىعان ءورت ءسوندىرىلدى. دەگەنمەن شاتىر كونسترۋكتسيالارىن سۋىتۋ جانە بولشەكتەۋ جۇمىستارى جالعاسىپ جاتىر.