قوستانايداعى «Allur» زاۋىتى كولىك بوياۋ تسەحىنا مامان دايارلايتىن «مسۆ بوياۋ» وقۋ-جاتتىعۋ ورتالىعىن اشتى, دەپ حابارلايدى Egemen.kz.
وقۋ نىسانىنىڭ اشىلۋ سالتاناتىندا زاۋىتتىڭ اتقارۋشى ديرەكتورى ارعۇلان مايقونوۆ اتالعان جوبانىڭ ستراتەگيالىق تۇرعىدان ماڭىزدى ەكەنىن اتاپ ءوتتى:
«وقۋ ورتالىعىنىڭ اشىلۋى – «Allur» زاۋىتىنىڭ كادرلىق الەۋەتىن دامىتۋداعى تاعى ءبىر ماڭىزدى قادام. ءبىز ءوز قىزمەتكەرلەرىمىزگە زاماناۋي, تاجىريبەگە نەگىزدەلگەن ءبىلىم الۋعا جاعداي جاساپ وتىرمىز. ساپالى كادر – ساپالى ءونىمنىڭ نەگىزى. بۇگىن جۇمىسىن باستاعان وقۋ-جاتتىعۋ ورتالىعى اۆتوونەركاسىپ سالاسىنىڭ ەڭ جوعارى تالاپتارىنا ساي مامانداردى دايارلاپ شىعاراتىن بولادى», دەدى ا.مايقونوۆ.
«مسۆ بوياۋ» ورتالىعىندا جاستار اۆتوموبيل بوياۋدا ىسكە اسىرىلاتىن بوياۋدى جىلتىراتۋ, لاكتاۋ, ماستيكا جاعۋ داعدىلارىن مەڭگەرەدى, سونداي-اق بوياۋ روبوتىن باسقارۋدى ۇيرەنەدى. مۇنداعى وقۋ مەرزىمى ۇيرەنۋشىنىڭ قابىلەتىنە قاراي ەكى اپتادان ءۇش ايعا دەيىن سوزىلادى.
«ورتالىقتاعى وقۋ-جاتتىعۋ باعدارلاماسى تاجىريبەگە نەگىزدەلگەن. مۇندا تىڭداۋشىلار قاراپايىم جانە كۇردەلى داعدىلاردى مەڭگەرەدى, اۆتوموبيل بوياۋ تەحنولوگياسىنىڭ قىر-سىرىنا قانىعادى. ساباق بارىسىندا, ەڭ الدىمەن, تەحنيكا قاۋىپسىزدىگى تالاپتارىن قاتاڭ ساقتاۋ ماسەلەسى قاداعالانادى», دەيدى وقۋ ورتالىعىنىڭ شەبەرلەرى.
زاۋىت باسشىسىنىڭ ايتۋىنشا, كاسىپورىندا سوڭعى ءبىر جىل ىشىندە «مسب قۇراستىرۋ» وقۋ-جاتتىعۋ نىسانى, ساپا مەكتەبى, سونداي-اق, قوستاناي اۆتوموبيل كولىگى كوللەدجى جانىنان اشىلعان قۇزىرەت ورتالىعى ىسكە قوسىلعان.
قوستاناي وبلىسى