ەلىمىزدە كەيبىر ازاماتتار ءۇشىن تەگىن ءدارى-دارمەكتەردىڭ جەتكىلىكسىزدىگى ءالى دە وزەكتى ماسەلە بولىپ تۇر. ماجىلىستە دەنساۋلىق ساقتاۋ ءمينيسترى اقمارال ءالنازاروۆا بۇل جاعدايدى تۇزەتۋ ءۇشىن قابىلدانىپ جاتقان شارالار تۋرالى باياندادى, دەپ حابارلايدى Egemen.kz.
دەپۋتات اسحات راقىمجانوۆ مينيستردەن «سك-فارماتسيا» ارقىلى جۇزەگە اسىرىلاتىن مەملەكەتتىك ءدارى-دارمەك ساتىپ الۋ جۇيەسىن تۇبەگەيلى وزگەرتۋ جوسپارى تۋرالى سۇرادى. سەبەبى جىل سايىن كەيبىر ساناتتاعى ازاماتتار ءۇشىن قاجەتتى تەگىن ءدارى-دارمەكتەردىڭ جەتكىلىكسىزدىگى تۋىندايدى.
«شىن مانىندە بۇل ماسەلە وتە كۇردەلى. جىل سايىن كەيبىر دارىلەردىڭ تاپشىلىعى بايقالادى, ءبىز ونى مويىندايمىز. 2025 جىلى وسى ماسەلەلەردىڭ بىرنەشەۋى شەشىلدى», دەدى اقمارال ءالنازاروۆا.
مينيستر اتاپ وتكەندەي, ءبىرىنشى ماڭىزدى قادام – ءدارى-دارمەكتەردىڭ ازايتىلمايتىن قورىن قۇرۋ بولدى.
«بيىل ۇكىمەت قاۋلىسىمەن «سك-فارماتسيا» كومپانياسى 20,6 ملرد تەڭگە كولەمىندە مىندەتتى تولەمدەردەن بوساتىلدى. وسىلايشا, تۇراقتى قور جاسالىپ, جىل باسىندا بولعان سياقتى جەتكىزىلىم ۇزىلىستەرىنىڭ الدىن الۋ مۇمكىندىگى پايدا بولدى. ءبىز بۇل ماسەلەنى كەشەندى تۇردە شەشۋگە باعىتتالعان جۇمىستاردى جۇرگىزىپ جاتىرمىز», دەدى مينيستر.