پرەمەر-ءمينيستردىڭ ورىنباسارى قانات بوزىمباەۆ اقتاۋ ماڭىندا اپاتقا ۇشىراعان ازەربايجان ۇشاعىنا قاتىستى تەرگەۋ جۇمىستارى جاقىن ارادا اياقتالاتىنىن مالىمدەدى, دەپ حابارلايدى Egemen.kz.
قانات بوزىمباەۆتىڭ ايتۋىنشا, تەرگەۋ ەكى باعىتتا جۇرگىزىلەدى. باس پروكۋراتۋرا قىلمىستىق قۇرامدى انىقتايدى, ال كولىك مينيسترلىگى اۆياتسيالىق اپاتتىڭ تەحنيكالىق سەبەپتەرىن تەكسەرەدى.
«كولىك مينيسترلىگى تەرگەۋدى اياقتاۋعا جاقىن. قازىرگى كەزدە تەحنولوگيالار, اەروناۆيگاتسيالىق قۇرالدار جانە باسقا جابدىقتارعا قاتىستى ليتسەنزيا بەرۋشىلەر مەن وندىرۋشىلەردەن قورىتىندى ەسەپ كۇتىپ وتىرمىز. سوندىقتان بيىل نەمەسە كەلەسى جىلدىڭ باسىندا تەرگەۋ ناتيجەسى جاريالانادى. باس پروكۋراتۋرانىڭ تەرگەۋىندە دە ىلگەرىلەۋ بار. كورشىلەس مەملەكەتتەر باسشىلارىنىڭ مالىمدەمەلەرى ەسكەرىلگەن. وسى تۇرعىدا كەلەسى جىلى تولىق اياقتالادى دەپ ۇمىتتەنەمىز», دەدى قانات بوزىمباەۆ.
ەستەرىڭىزگە سالا كەتيىك, 25 جەلتوقساندا اقتاۋ ماڭىندا باكۋدەن گروزنىيعا باعىت العان AZAL جولاۋشىلار ۇشاعى اپاتقا ۇشىراعان ەدى. بورتتا 67 ادام بولعان, ونىڭ ىشىندە بەس ەكيپاج مۇشەسى بار. اپات سالدارىنان 38 ادام قازا تاۋىپ, 29 جولاۋشى امان قالدى. ايتا كەتەيىك, ۇشاقتا قازاقستاننىڭ 6 ازاماتى بولعان ەدى.