كەيىنگى جىلدارى مەملەكەت تاراپىنان كاسىپ اشامىن دەگەن ازاماتتارعا جان-جاقتى مۇمكىندىك جاسالىپ وتىر. ءتيىمدى نەسيە, قايتارىمسىز گرانت سەكىلدى باعدارلامالاردىڭ ءتۇر-ءتۇرى بار. ەڭ باستىسى, كاسىپ كوزىن تاۋىپ, جوباڭىزدى كوميسسيا الدىندا قورعاپ شىقساڭىز بولعانى.
وسكەمەن قالاسىنىڭ تۇرعىنى ينديرا ازىلباەۆا «بيزنەس باستاۋ» باعدارلاماسى ارقىلى قايتارىمسىز گرانت الىپ, جارناما اگەنتتىگىن اشقان. ايتۋىنشا, مەملەكەتتەن بەرىلگەن قارجىعا لازەرلى ستانوك ساتىپ العان, بەزەندىرۋ جۇمىستارىنىڭ سان تۇرىمەن اينالىسادى. جەيدەگە سۋرەت باسۋدان باستاپ, مەكتەپ پەن بالاباقشالاردىڭ كورنەكىلىك, اقپاراتتىق قۇرالدارىنا دەيىن ازىرلەيدى. كاسىپ كوزىن ءدوپ باسا تاپقان كوپبالالى انانىڭ ءوندىرىپ جاتقان جۇمىسىنا سۇرانىس بارشىلىق. كورسەتىلىپ جاتقان قىزمەتتىڭ قاي ءتۇرى دە ساپالى.
«قاراپ وتىرساق, ەلىمىزدىڭ دامۋى كوش ىلگەرى. قاراپايىم عانا مىسال ايتايىن, بالالارىمىز تەگىن وقيدى, تەگىن مەديتسينالىق كومەك الامىز. ءبىلىمى جەتسە, جوعارى وقۋ ورنىندا دا تەگىن وقيدى. كاسىپكەرلىككە دە قولداۋ مول. مەن سەكىلدى شاعىن كاسىپكەرلىكتى قولعا العانداردىڭ كەڭەيۋىنە جان-جاقتى جاعداي جاسالىپ جاتىر», دەيدى ينديرا ەرعاليقىزى.
كوپ جىل دەكرەتتىك دەمالىستا وتىرعان ول العاشىندا مەملەكەتتىك گرانتقا ىلىنە الماعان. العان بەتتەن قايتپايتىن قايسار انا ەكىنشى رەت تاۋەكەل ەتكەن. ارنايى جاساقتالعان كوميسسياعا بارلىق جۇمىستى, وزىنە قاجەتتى اپپاراتتىڭ قۋاتىن كورسەتكەن. ءسويتىپ, كوميسسيا كوزى جەتكەن سوڭ, گرانت ءبولدى. كاسىپتىڭ كەلەشەگى بارىن بايقاعان ومىرلىك سەرىگى قوسىمشا باننەر شىعاراتىن ستانوك پەن كيىمگە سۋرەت باساتىن قۇرىلعى ساتىپ الىپ بەرگەن. جۇمىستى ۇرشىقشا ءيىرىپ اكەتۋىنىڭ سەبەبى, ينديرا ءوزى وقۋشى كەزىنەن سۋرەت سالۋعا جاقىن ەدى. قابىرعا گازەتتەرىن شىعارىپ, مەكتەپتەگى بەزەندىرۋ جۇمىستارىنا اتسالىسىپ جۇرەتىن. جوعارى وقۋ ورنىندا العان ءبىلىمى شىعارماشىلىقتان الشاقتاۋ. ماماندىعى – العاشقى اسكەري دايىندىق ءپانىنىڭ مۇعالىمى. ون شاقتى جىل دەكرەتتىك دەمالىستا وتىرىپ, جۇمىس ىستەۋگە مۇرشاسى بولماعان سوڭ, كاسىپ اشۋدى ۇيعارعان. بۇعان دەيىن كاسىپتىڭ ءار تۇرىمەن اينالىسىپ تا كورگەن.
«كۇرشىم اۋدانىندا تۋعانىممەن, كوكپەكتىنىڭ ۇلكەن بوكەن اۋىلىندا ءوستىم. وقۋىمدى تامامداعان سوڭ, شامالى ۋاقىت اسكەري كوميسسارياتتا جۇمىس ىستەدىم. تۇرمىس قۇردىم, بالالى-شاعالى بولدىم. جارىم ۇنەمى قولداۋ كورسەتىپ وتىرادى. ەكىنشى انام بالالارعا قارايدى. شىعارماشىلىق ادامى بولعاندىقتان, قازىرگى كاسىبىم جانىما جاقىن. دەگەنمەن كەز كەلگەن كاسىپتى باستاماس بۇرىن باعىت-باعدار بەرۋشى ادام كەرەك. ول جاعىنان ماعان جول كورسەتكەن تۋىسقان اعام جاسۇلان ەدى. ول دا جارناما اگەنتتىگىن ۇستاپ وتىرعان ازامات», دەيدى كاسىپكەر.
ينديرا كىتاپ وقۋدى جاقسى كورەدى. ونىڭ ىشىندە ادامعا كۇش بەرەتىن, جىگەرلەندىرەتىن شىعارمالاردى ىزدەيدى. ءوزىنىڭ وسى ۋاقىتقا دەيىنگى كورگەن-بىلگەنىن كەيىنگى جاستارعا دا ۇيرەتكىسى كەلەدى. جاستار دا كوبىرەك كىتاپ وقىسا ەكەن دەپ تىلەيدى. ءار ءسات ماڭىزدى دەپ سانايدى. ءوزى بولسا جۇمىسىن جۇيەلى اتقارىپ, ۋاقىتتى ۇتىمدى پايدالانىپ ءجۇر.
وسكەمەن