الاياقتار ۇستالدى

ەندى كەلەسى بىرەۋى «بانك­تەن» تەلەفون سوعادى. مۇنىڭ داۋسى ءتىپتى قاتاڭ: ء«سىز جاڭا sms ارقىلى كەلگەن كودتى الاياقتارعا بەرىپ قويدىڭىز. ەندى ولار ءسىزدىڭ اتى­ڭىزدان نەسيە العالى جاتىر. الاياقتى تويتارۋ ءۇشىن تەزىرەك شوتتاعى اقشا كولەمىندە نەسيە الىپ, «اقشاڭىزدى قاۋىپسىز شوتقا اۋدارىڭىز, سوندا ولاردىڭ تاپسىرىسى وشىرىلەدى», دەيدى. ەگەر ادام وسى ايتىلعاندى ورىنداسا, ونىڭ بارلىق اقشاسى كيبەرقىلمىسكەرلەردىڭ قالتاسىنا ءتۇستى دەي بەرىڭىز.

سولتۇستىك قازاقستان وبلىستىق پوليتسيا دەپارتامەنتىنىڭ ءباسپا­سوز قىزمەتى الاياقتىق جولمەن قولدى بولعان قارجىنىڭ جارتىسىنان كوبى وسى «بانكتەن سوعىلعان قوڭىراۋ» ارقىلى ۇرلانعانىن ايتادى. سوندىقتان تەلەفون ارقىلى «بانكتەنمىن» دەپ سۇرالعان ەشبىر «وتىنىشكە» جاۋاپ بەرۋگە بولمايتىنىن جەتكىزدى.

پسيحولوگتەردىڭ ايتۋىنا قاراعاندا, جاسى ۇلعايعان ادامدار سەنگىش كەلەدى ەكەن. ويتكەنى ولارعا رەسمي تۇردە كوپ ادام قايىرىلا قويمايدى, سوندىقتان بۇرىن قىزمەت اتقارىپ, قوعامدا بەدەلى بولعان نەمەسە ابىرويلى ەڭبەك ەتكەندەر وزىنە سىپايى تۇردە جۇگىنگەنگە ءماز بولىپ, ونىڭ سوزىنە وڭاي سەنىپ قالاتىن كورىنەدى. پەتروپاۆلدىڭ 68 جاستاعى ءبىر تۇرعىنى ءدال وسىنداي ارباۋعا ءتۇسىپ, 2,1 ملن تەڭگەسىن الاياقتىڭ شوتىنا اۋدارۋعا از-اق قالعان.

الاياقتار قولدانعان سحەما قاراپايىم, بىراق سەندىرۋى جو­عا­رى بولعان. تەلەفونعا حابار­لاس­قان الاياق الدىمەن ءوزىن «مەد­بيكەمىن» دەپ تانىستىرعان, كەيىن «ەلەكتروندىق ۇكىمەت», ءتىپتى «پوليتسيا دەپارتامەنتىنىڭ قىز­مەت­كە­رىمىن» دەگەندەردى قوساق­تاپ, العاشقى ادامنىڭ ايتقانىن قولداپ, قوڭىراۋ شالعان. بارلىعى WhatsApp مەسسەندجەرى ارقىلى حابارلاسىپ, رەسمي رامىزدەردى فون رەتىندە قولدانعان. ولار ايەلدەن قۇپيانى ساقتاپ, ۇلكەن ماسەلەلەردەن ساقتانۋعا قارا­جاتتى «قاۋىپسىز شوتقا» شۇعىل اۋدارۋعا كەڭەس بەرگەن. سەنىپ قالعان زەينەتكەر جاقىن ماڭ­داعى ساۋدا ورتالىعىنداعى بان­كو­ماتقا بارىپ, اقشاسىن اۋدارا باستاعاندا, ونى سول جەردە كەزەكشىلىكتە جۇرگەن پوليتسەيلەر بايقاپ قالعان. ولار ايەلدىڭ ابىرجىپ تۇرعانىن كورىپ, جايدى بىلگەن سوڭ, اسىعىس شەشىم قابىلداماۋعا كوندىرىپ, الاياقتىق سحەمانى انىقتاعان. ءسويتىپ, پوليتسيا قىزمەتكەرلەرىنىڭ ارقاسىندا كەيۋانا كيبەرقىلمىسكەرلەردىڭ تورىنان امان قالدى.

بۇعان دەيىن ءدال وسىنداي 5 دەرەك پەتروپاۆلداعى ءارتۇرلى ساۋدا ورتالىقتارىندا پوليتسيا مەن جەكەمەنشىك كۇزەتتىڭ قىراعىلىعىنىڭ ارقاسىندا توقتاتىلدى. تاعى ءبىر 67 جاستاعى ايەل الاياقتاردىڭ ارباۋىنان امان قالدى. وعان ءوزىنىڭ رەسەيدە تۇراتىن قىزىنىڭ داۋسىمەن بىرەۋ ۇيدەگى تەلەفونىنا حابارلاسىپ, اۆتوموبيل اپاتىنا ۇشىراپ قالعانىن, ەندى ادۆوكاتقا تولەۋ ءۇشىن اقشا قاجەت ەكەنىن ايتىپ جىلاعان. ال ادۆوكاتتىڭ ءوزى مۇنىڭ تەلەفونىنا حابارلاساتىنىن ايتقان. بالا ءۇشىن انا نە ىستەمەيدى, ەسى شىعىپ, دەرەۋ ۇيدەگى بارلىق اقشاسىن جيناي باس­تايدى. سول كەزدە تەلەفونى شىر ەتىپ: «مەن ادۆوكاتپىن, قىزىڭىزعا كەرەك اقشا – 2 ملن تەڭگە. سونى مەن جىبەرگەن تاكسيست ارقىلى بەرىپ جىبەرىڭىز. ال بايلانىس ۇزىلمەس ءۇشىن تەلەفوندى وشىرمەڭىز», دەيدى. الايدا ءبىر نارسەدەن كۇدىك العان ايەل تەلەفوندى ءسوندىرىپ, جيەنىنە زۆوندايدى. ودان قىزىنىڭ ەشقانداي اپاتقا ۇشىراماعانىن بىلگەن كەيۋانا بىردەن پوليتسياعا حابارلاسادى. ۇزاماي 2 ملن تەڭگەنى الۋعا كەلگەن 24 جاستاعى الاياق ۇيدە توسىپ وتىرعان پوليتسيانىڭ قولىنا تۇسەدى. ول مۇنىڭ العاشقى قىلمىستىق ارەكەتى ەمەس ەكەن, الدىندا وسى جولمان 88 جاستاعى كەيۋانانىڭ 3 ملن تەڭگەسىن قاق­شىپ كەتكەنى انىقتالدى.

قازىر ونىڭ ۇستىنەن تەرگەۋ امالدارى جۇرگىزىلىپ جاتىر. كۇدىكتىگە ءىرى كولەمدە ايىپپۇلدان باستاپ 4 جىلعا دەيىن باس بوستاندىعىنان ايىرۋ جازاسى قاراستىرىلعان.

ال جۋىردا م.جۇماباەۆ اۋدا­نىنىڭ ورتالىعى بۋلاەۆ قالا­سىندا سولتۇستىكقازاقستاندىق پوليتسەيلەر كيبەرالاياقتىق قىلمىس­پەن اينالىسىپ جۇرگەن 19 بەن 24 جاس ارالىعىنداعى بەس ادامدىق قىلمىستىق توپتى قۇرىق­­تادى. ونى ۇيىمداستىرىپ جۇرگەن اققايىڭ اۋدانىنىڭ 21 جاستاعى تۇرعىنى كورىنەدى. ول ءوز توبىن حالىقارالىق ينتەرنەتتەگى الاياقتىق جۇيەگە قوسىپ الىپ, دروپپەرلەر دايىنداۋ جۇمىسىن ىسكە اسىرعان. وسى جولمەن بارلىعى 38,5 ملن تەڭگەنى قولدى ەتكەندەرى انىقتالدى. قازىر توپتىڭ ۇستىنەن ءىس قوزعالىپ جاتىر.

سولتۇستىك قازاقستان وبلىسى