8 قاراشا كۇنى تۇركىستان وبلىسى جەتىساي اۋدانى العاباس اۋىلىنداعى ەكى قاباتتى جەكە تۇرعىن ۇيدەن ءورت شىعىپ, 12 ادام مەرت بولعان ەدى. ءورت بولعان كۇنى 3 ادام امان قالىپ, اۋرۋحاناعا جەتكىزىلگەن بولاتىن. تۇركىستان وبلىستىق دەنساۋلىق ساقتاۋ باسقارماسى كەشە 7 جاستاعى قىزدىڭ اۋرۋحانادا كوز جۇمعانىن حابارلادى, دەپ جازادى Egemen.kz.
«2025 جىلدىڭ 30 قاراشاسىندا جەتىساي اۋدانىندا بولعان ءورت سالدارىنان وتە اۋىر جاعدايدا جەتكىزىلگەن 2018 جىلعى ناۋقاس كوز جۇمدى. كورسەتىلگەن ينتەنسيۆتى تەراپياعا, بەيىندى مامانداردىڭ كەڭەستەرىنە, رەانيماتسيالىق جانە دەزينتوكسيكاتسيالىق شارالاردىڭ تولىق كەشەنىنە قاراماستان, ورتالىق جۇيكە جۇيەسىنىڭ اۋىر زاقىمىنان پاتسيەنتتى امان الىپ قالۋ مۇمكىن بولمادى», دەلىنگەن تۇركىستان وبلىستىق دەنساۋلىق ساقتاۋ باسقارماسى تاراتقان حابارلامادا.
بۇعان دەيىن قىزىل جالىن تۇرعىن ءۇيدىڭ 360 شارشى مەترىن قامتىعانىن حابارلاعان بولاتىنبىز. ورتتەن قازا بولعان 12 ادامنىڭ 9-ى بالا ەدى.
كەيىننەن قۇزىرلى ورگاندار وقيعا ورنىنان فوتو-ۆيدەولار جاريالادى.
پرەزيدەنت قاسىم-جومارت توقاەۆ ورتتەن قازا تاپقانداردىڭ وتباسىلارىنا كوڭىل ايتىپ, ۇكىمەت پەن وبلىس اكىمىنە بارلىق قاجەتتى كومەك كورسەتۋدى جانە قايعىلى وقيعانىڭ سەبەبىن انىقتاۋدى تاپسىردى.