قارجىلىق مونيتورينگ اگەنتتىگىنىڭ استانا قالاسى بويىنشا دەپارتامەنتى «Qyran» تۇرعىن ءۇي كەشەنىنەن اقشا قاراجاتىن جىمقىرۋ سحەماسىن ۇيىمداستىرعان قۇرىلىس كومپانياسىنىڭ قىزمەتكەرلەرىن تەكسەرىپ جاتىر. الاياقتىق ناتيجەسىندە ازاماتتار مەن كومپانياعا جالپى 7,9 ملرد تەڭگە شىعىن كەلتىرىلگەن, دەپ حابارلايدى Egemen.kz.
تەرگەۋ دەرەكتەرىنە سايكەس, ساتۋ كەڭسەسىندە ساتىپ الۋشىلارعا كومپانيانىڭ جىلجىمايتىن م ۇلىك نىساندارىنا مەنشىك قۇقىعى بارىن دالەلدەيتىن ماكەتتەر, تەحنيكالىق پاسپورتتار, سەنىمحاتتار مەن انىقتامالار كورسەتىلگەن. ازاماتتارعا پاتەرلەر, كوممەرتسيالىق ءۇي-جايلار مەن پاركينگ ورىندارى نارىقتىق باعادان تومەن ۇسىنىلعان جانە مامىلەلەردىڭ زاڭدى ەكەنى ايتىلعان.
الايدا, ساتىپ الۋ-ساتۋ شارتتارىنىڭ ورنىنا كۇدىكتىلەر برونداۋ شارتتارى, كەپىل تۋرالى كەلىسىمدەر مەن الدىن الا شارتتاردى راسىمدەگەن. بۇل قۇجاتتار مەملەكەتتىك تىركەۋگە جاتپايدى جانە مەنشىك قۇقىعىن بەرمەيدى. جابىرلەنۋشىلەر تولەمدەردى قولما-قول جانە جەكە شوتتار ارقىلى جىبەرگەن, ال بۋحگالتەرلىك جانە بانكتىك قۇجاتتاردا بۇل وپەراتسيالار كورسەتىلمەگەن. ناتيجەسىندە ازاماتتاردان 3,8 ملرد تەڭگە جىمقىرىلعان.
سونداي-اق, كۇدىكتىلەر قۇرىلىس كومپانياسىنىڭ قاراجاتىن ۇرلاۋعا باعىتتالعان ەكىنشى الاياقتىق سحەمانى دا ىسكە اسىرعان. كليەنتتەرمەن جالعان ساتىپ الۋ-ساتۋ شارتتارى جاسالىپ, وبەكتىلەرگە مەنشىك قۇقىقتارى تىركەلگەن, الايدا ساتۋدان تۇسكەن 4,1 ملرد تەڭگە كومپانيانىڭ كاسساسىنا تۇسپەگەن.
«وسىلايشا ازاماتتارعا جانە كومپانياعا كەلتىرىلگەن جالپى زالال 7,9 ملرد تەڭگەنى قۇرادى. سوت سانكتسياسىمەن 94 پاتەرگە, 51 پاركينگ ورنىنا, 8 كوممەرتسيالىق ءۇي-جايعا جانە ءبىر اۆتوكولىككە تىيىم سالىندى. ءۇش كۇدىكتىگە قاتىستى قاماۋعا الۋ تۇرىندەگى بۇلتارتپاۋ شاراسى قولدانىلدى», دەلىنگەن حابارلامادا.