پارلامەنت سەناتىنىڭ توراعاسى جانە پالاتا دەپۋتاتتارى مەملەكەت باسشىسى بەرگەن تاپسىرمالاردىڭ ورىندالۋىنا مونيتورينگ جۇرگىزۋ اياسىندا ەلورداداعى بىرقاتار مەكتەپتىڭ قىزمەتىمەن جانە ينفراقۇرىلىمىمەن تانىستى. سەناتورلار باستاۋىش مەكتەپتىڭ مامانداندىرىلعان كابينەتتەرىندە, IT-زەرتحانالاردا, كىتاپحانالار مەن سپورت زالدارىندا بولىپ, پەداگوگتارمەن ءبىلىم جانە عىلىم سالاسىن دامىتۋدىڭ وزەكتى ماسەلەلەرىن تالقىلادى, دەپ جازادى Egemen.kz.
ماۋلەن اشىمباەۆ سوڭعى جىلدارى ەلىمىزدە ءبىلىم جانە عىلىم جۇيەسىن جەتىلدىرۋگە ارنالعان كەشەندى رەفورمالار جۇزەگە اسىرىلىپ جاتقانىن اتاپ ءوتتى. ناقتى ايتقاندا, تالانتتى وقۋشىلاردى قولداۋ جانە ولاردىڭ عىلىمي قىزمەتىن ىنتالاندىرۋ, ادام كاپيتالىن دامىتۋ, كەدەرگىسىز ورتا قالىپتاستىرۋ, مۇعالىمدەردىڭ الەۋمەتتىك مارتەبەسىن ارتتىرۋ باعىتىندا جۇيەلى شارالار قابىلداندى.
«پرەزيدەنتىمىز قاسىم-جومارت كەمەل ۇلى توقاەۆتىڭ تاپسىرماسىمەن 2019 جىلدان بەرى ءبىلىم سالاسىنىڭ بيۋدجەتى ءۇش ەسە ارتتى. وسى ۋاقىتتا 1 ميلليوننان استام وقۋشىعا ارنالعان 1200 مەكتەپ اشىلدى. ونىڭ ىشىندە مەملەكەت باسشىسىنىڭ باستاماسىمەن قولعا الىنعان «كەلەشەك مەكتەپتەرى» ۇلتتىق جوباسى اياسىندا سالىنعان ءبىلىم وردالارى دا بار. سونداي-اق «پەداگوگ مارتەبەسى تۋرالى» ارنايى زاڭ قابىلداندى. «قازاقستاننىڭ ەڭبەك سىڭىرگەن ۇستازى» اتاعى بەلگىلەندى. مۇعالىمدەردىڭ الەۋمەتتىك جاعدايىن جاقسارتۋ باعىتىندا دا ناقتى شارالار قابىلدانىپ, سوڭعى ءتورت جىلدىڭ ىشىندە ۇستازداردىڭ جالاقىسى 2 ەسە ءوستى», – دەپ, پالاتا سپيكەرى مەملەكەت باسشىسى تامىز كونفەرەنتسياسىندا بەلگىلەپ بەرگەن ماڭىزدى مىندەتتەرگە توقتالىپ ءوتتى.
سونىمەن قاتار ماۋلەن اشىمباەۆ ءبىلىم بەرۋ تاربيەمەن قاتار جۇرەتىن ۇدەرىس ەكەنىنە نازار اۋداردى. ول قازىرگى تاڭدا وزىق تەحنولوگيالاردىڭ قارقىندى دامۋىن تىلگە تيەك ەتىپ, بۇل جاعدايدا جاس ۇرپاقتىڭ بويىنا دۇرىس قۇندىلىقتاردى ءسىڭىرۋدىڭ ماڭىزدى ەكەنىن ايتتى. وسى ىستە مۇعالىمدەردىڭ ءرولى مەن جاۋاپكەرشىلىگى ەرەكشە ەكەنى انىق. سەنات توراعاسى اتالعان باعىتتا ابايدىڭ «تولىق ادام» فيلوسوفياسى مەن مەملەكەت باسشىسىنىڭ «ادال ازامات» تۇجىرىمداماسىنا نەگىزدەلگەن جانە ۇلتتىق بىرەگەيلىككە تابان تىرەگەن ءبىلىم بەرۋدىڭ جاڭا مودەلى قاجەت ەكەنىن اتاپ ءوتتى.
«مەكتەپتەرگە ءبىلىم بەرىپ قانا قويماي, جاس بۋىندى رۋحاني دامىتاتىن, جاڭا الەمگە بەيىمدەيتىن, باسەكەگە قابىلەتتى ۇرپاق ەتىپ قالىپتاستىراتىن باعدارلاما قاجەت. وسى ورايدا ەلىمىزدەگى مەكتەپتەر وتانىمىزدى ودان ءارى وركەندەتەتىن پاتريوت, ءبىلىمدى, بىلىكتى ازاماتتاردىڭ جاڭا بۋىنىن قالىپتاستىرۋعا ىقپال ەتەدى دەپ سەنەمىز», – دەپ, ماۋلەن اشىمباەۆ كەزدەسۋگە قاتىسۋشىلاردى وسى جولدا بەلسەندىلىك تانىتۋعا شاقىردى.
جالپى, سەناتورلار بۇگىن استانا قالاسىنداعى №107 جايلى مەكتەپكە بارىپ, ۇستازدار قاۋىمىمەن كەزدەستى, سونداي-اق, ءبىلىم بەرۋ تاسىلدەرىمەن جانە ستاندارتتارىمەن تانىستى. بۇدان باسقا, قازاقستاندىق حالىقارالىق مەكتەپتىڭ (KIS) جانە رەسپۋبليكالىق فيزيكا-ماتەماتيكا مەكتەبىنىڭ باسشىلىعىمەن جانە پەداگوگتارىمەن جۇزدەستى. دەپۋتاتتارعا وقۋشىلاردىڭ IT-HUB, روبوتوتەحنيكا, جي سالاسىنداعى جۇمىستارى جانە STEM زەرتحانالارى مەن Apple سىنىبى تانىستىرىلدى.