قوستانايدا بانك كاسسيرى مەن پوليتسيا قىزمەتكەرلەرى 3 ميلليون تەڭگەسىن الاياقتارعا اۋدارىپ جىبەرمەك بولعان زەينەتكەرلەردى دەر كەزىندە توقتاتىپ, ءىرى قارجى شىعىنىنان قۇتقاردى. بۇل تۋرالى وڭىرلىك پوليتسيا دەپارتامەنتى حابارلادى, دەپ جازادى Egemen.kz.
ۆەدومستۆو مالىمەتىنشە, 77 جاستاعى ەر ادام مەن 67 جاستاعى زايىبى بەلگىسىز بىرەۋلەردىڭ قوڭىراۋىنا سەنىپ قالا جازداعان. ءوزىن بانك قىزمەتكەرى رەتىندە تانىستىرعان الاياقتار ولاردىڭ دەپوزيتى «بۇزىلعانىن» ايتىپ, قاراجاتتى «قاۋىپسىز شەتەلدىك شوتقا» تەز ارادا اۋدارۋدى تالاپ ەتكەن.
زەينەتكەرلەر كۇماندانعانىنا قاراماستان, شوتتارىنان 3 ميلليون تەڭگە شەشىپ الىپ, بانكتە اۋدارىم جاساۋعا كەلگەن. سول كەزدە كاسسا قىزمەتكەرى تولەمنىڭ ماقساتى رەتىندە كورسەتىلگەن «دارىگەرگە العىس» دەگەن بەلگىلەۋگە كۇماندانىپ, بىردەن پوليتسيا شاقىرعان.
وقيعا ورنىنا كيبەرقىلمىسقا قارسى ءىس-قيمىل باسقارماسىنىڭ قىزمەتكەرلەرى كەلىپ, زەينەتكەرلەرگە الاياقتىق جاسالعانىن ءتۇسىندىردى. پوليتسەيلەر اقشانى دەپوزيتكە قايتا سالۋعا كومەكتەسىپ, قوڭىراۋ شالعان تۇلعالاردىڭ نومىرلەرىن بۇعاتتادى.
زەينەتكەرلەر پوليتسەيلەر مەن كاسسيرگە العىستارىن ءبىلدىرىپ, جاعدايدى بىلاي باياندادى: «بىزگە بىرەۋ حابارلاسىپ, دەپوزيتىمىزگە قاۋىپ ءتونىپ تۇرعانىن ايتتى. اقشانى الىپ, باسقا شوتقا جىبەرۋ كەرەكتىگىن ءتۇسىندىردى. جۇبايىم سوعان سەنىپ قالا جازدادى. ۋاقتىلى توقتاتقان كاسسير مەن پوليتسياعا راقمەت».