مەملەكەت باسشىسىنىڭ ايتۋىنشا, سوڭعى جىلدارى اۋىل تۇرعىندارىنىڭ تۇرمىس ساپاسىن ارتتىرۋ ءۇشىن ءتيىستى جۇمىس جۇرگىزىلىپ جاتىر. 2022 جىلى حالىقتىڭ تابىسىن ارتتىرۋعا ارنالعان كەشەندى جوسپار قابىلدانعان. بيىل ۇكىمەت الداعى 5 جىلعا ارنالعان وڭىرلەردى دامىتۋ تۇجىرىمداماسىن بەكىتتى. اۋىلعا قوماقتى ينۆەستيتسيا تارتىلعان, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«2021 جىلدان بەرى اۋىل حالقىنا العاشقى مەديتسينالىق-سانيتارلىق كومەك كورسەتەتىن 864 نىسان سالىندى. سونداي-اق 388 جاڭا مەكتەپ اشىلدى. بىلتىر 2 مىڭعا جۋىق اۋىل مەكتەبىنە ساپالى ينتەرنەت بەرىلدى.
جىل وتكەن سايىن اۋىلدىڭ الەۋەتى ارتىپ كەلەدى. ءوزىن-ءوزى قامتاماسىز ەتۋ دەڭگەيى جوعارى اۋىلداردىڭ سانى كوبەيە ءتۇستى. اۋىل شارۋاشىلىعىنىڭ جالپى ءونىمى التى جىلدا 1,5 ەسەدەن استام ءوسىپ, 8,3 تريلليون تەڭگەگە جەتتى.
بيىل اۋىلداعى شارۋالارعا 1 تريلليون تەڭگە كولەمىندە قولداۋ كورسەتتىك. ءدال وسىنداي مەملەكەتتىك قولداۋ كورسەتكەن ەلدەر كوپ ەمەس, ءتىپتى, بۇل كوپتەگەن ەل قول جەتكىزە المايتىن قارجىلاي كومەك دەۋگە بولادى», دەدى مەملەكەت باسشىسى.
پرەزيدەنتتىڭ ايتۋىنشا, اۋىلداعى جاعدايدى ءالى دە جاقسارتۋ قاجەت.
«الايدا الدىمىزدا بيىك ماقساتتار تۇر: ءبىز اۋىلداعى جاعدايدى جاقسارتىپ, جۇمىستى كۇشەيتۋىمىز كەرەك.
قازىرگى اۋىل اكىمدەرىنىڭ 60%-عا جۋىعى وسى قىزمەتكە العاش رەت سايلاندى. بۇل – جەرگىلىكتى بيلىك قۇرامى ءبىرشاما جاڭاردى دەگەن ءسوز. الايدا سايلاۋدا جەڭىسكە جەتۋ – الداعى ۇلكەن جۇمىستىڭ باسى عانا», دەدى قاسىم-جومارت توقاەۆ.
مەملەكەت باسشىسىنىڭ سوزىنشە, اۋىل اكىمدەرى مىندەتتى تۇردە بىلىكتى مامان بولۋعا ءتيىس.
«اكىم بولدىم, تولدىم» دەپ وتىرۋعا بولمايتىنى تۇسىنىكتى. اكىمدەر وزدەرىنىڭ مىقتى باسشى ەكەنىن ءىس جۇزىندە دالەلدەۋى كەرەك. «باسشىنىڭ باعى – ەل-جۇرتتىڭ قامى» دەپ بەكەر ايتىلماعان. ناعىز ەلگە سىيلى اكىم بولۋ ءۇشىن اۋىلدىڭ احۋالىن جاقسى ءبىلۋ دە ازدىق ەتەدى. حالىقتىڭ سەنىمىن اقتاپ, ەلدىڭ بەرەكە-بىرلىگىن نىعايتۋ ءۇشىن جۇمىس ىستەۋ كەرەك.
اكىم مەملەكەتتىك دەڭگەيدە جاسالىپ جاتقان وزگەرىستەردى جەرگىلىكتى جەردە جۇزەگە اسىرۋعا قابىلەتتى بولۋى قاجەت. كاسىبي تۇرعىدان بىلىكتى ءارى ەڭبەكقور اكىم سايلاۋشىلاردىڭ سەنىمىن اقتاي الادى. سوندىقتان اۋىل اكىمدەرىنىڭ باسقارۋ ىسىندەگى شەبەرلىگىن ارتتىرۋ وتە ماڭىزدى», دەدى پرەزيدەنت.
قاسىم-جومارت توقاەۆ «اكىمدەر مەكتەبى» جوباسىنا دا توقتالدى.
«اكىمدەردىڭ اراسىندا بۇرىن بيلىك جۇيەسىندە جۇمىس ىستەمەگەن ازاماتتار بار ەكەنىن ايتتىق. ولاردىڭ تاجىريبەسى از ەكەنى تۇسىنىكتى. وسى باعىتتا «Amanat» پارتياسىنىڭ باستاماسىمەن «اكىمدەر مەكتەبى» جوباسى قولعا الىندى. ارينە, مۇنداي كۋرستار جوعارى ءبىلىمنىڭ ورنىن باسا المايدى. سوندىقتان ۋنيۆەرسيتەتتەردە وقىتىلاتىن «مەملەكەتتىك جانە جەرگىلىكتى باسقارۋ» باعدارلاماسىن تالاپقا ساي وزگەرتۋ كەرەك.
اۋىل-ايماقتاردى باسقارۋ, كوشباسشىلىق قابىلەتتى دامىتۋ ماسەلەسى نازاردان تىس قالعان. ال بۇل جۇمىسپەن ەڭ الدىمەن مەملەكەتتىك قىزمەت ىستەرى اگەنتتىگى شۇعىلدانۋى كەرەك. قۇزىرلى مينيسترلىكپەن بىرلەسىپ, اۋىل اكىمدەرىن دايارلاۋعا بەلسەندى تۇردە كىرىسۋ قاجەت», دەدى مەملەكەت باسشىسى.