بۇل تۋرالى پرەزيدەنت استانادا ءوتىپ جاتقان اۋىل اكىمدەرىنىڭ ديالوگ-پلاتفورماسىندا ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«ولار ءوز ۇمىتكەرلەرىن ۇسىنىپ, سايلاۋعا بەلسەنە ارالاستى. ساياسي ۇيىمداردىڭ 1500-دەن استام وكىلى اكىم بولىپ سايلاندى. جاڭا باسشىلاردىڭ قاتارىندا 6 پارتيانىڭ مۇشەلەرى بار. ال 700-دەن استام ازامات ءوزىن-ءوزى ۇسىنىپ, سايلاۋدا جەڭىسكە جەتتى», دەدى مەملەكەت باسشىسى.
پرەزيدەنتتىڭ ايتۋىنشا, جالپى ناتيجە جامان ەمەس.
«سايلانعان اكىمدەر جۇمىسقا كىرىسىپ كەتتى, جالپى ناتيجە جامان ەمەس دەۋگە بولادى. ەڭ باستىسى, ولار جەرگىلىكتى جۇرتتىڭ مۇڭ-مۇقتاجىن, شەشىمىن تاپپاي جاتقان تۇيتكىلدەردى جاقسى بىلەدى.
اۋىل-ايماقتىڭ دامۋىنا بولىنگەن بيۋدجەت قاراجاتى دا ءتيىمدى يگەرىلە باستادى. اۋىلداردىڭ كىرىسى كوبەيدى, مەملەكەت تاراپىنان بەرىلەتىن قارجىعا, ياعني دوتاتسياعا تاۋەلدىلىك ازايىپ كەلەدى.
جاقىندا جۇرگىزىلگەن ساۋالناماعا سايكەس اۋىل تۇرعىندارىنىڭ 84 پايىزى ءوز اكىمدەرىنە سەنەتىنى انىقتالدى. بۇل – وتە جاقسى كورسەتكىش. سوندىقتان اۋىل اكىمدەرىن سايلاۋ ۇدەرىسى الداعى ۋاقىتتا دا جالعاسىن تابادى», دەدى قاسىم-جومارت توقاەۆ.