اگروونەركاسىپ كەشەنى زاماناۋي تەحنولوگيانىڭ ارقاسىندا ىلكىدەن قالىپتاسقان تۇسىنىگىمىزدى تۇبەگەيلى وزگەرتىپ, جاڭا بەلەسكە جول سالىپ وتىر.
«ەڭبەك» سەرىكتەستىگىنىڭ بازاسىندا «اقىلدى فەرما» ىسكە قوسىلدى. جاعىمدى جاڭالىققا ەل قۇلاعى ەلەڭ ەتە تۇسكەن. بۇدان بىلاي بەينەتى بەسباتپان بال بارماق ساۋىنشىنىڭ بار شارۋاسىن روبوت تىندىراتىن بولادى. زاماناۋي جۇيە ەنگىزىلگەننەن كەيىن قولعا الىنعان جاڭالىقتىڭ ارقاسىندا روبوت سيىردىڭ ساۋىنى كەلگەندىگىن ءوزى ءدال باسىپ انىقتايدى. قولمەن اتقارىلىپ كەلگەن بارلىق شارۋانى ادام ويلاعانداي تاپ-تۇيناقتاي ەتە الادى.
– بۇل ءبىز ءۇشىن ۇلكەن جەتىستىك. تاۋارلى-ءسۇت فەرماسى وسى بيىككە شىعۋ ارقىلى تسيفرلاندىرۋدىڭ تەك قالاعا عانا ءتان ەمەس, اۋىلدىڭ دا ەنشىسى بار ەكەنىن دالەلدەپ وتىر, – دەيدى اۋدان اكىمىنىڭ ورىنباسارى سايات احمەتجانوۆ. – جاڭالىقتىڭ كوپ سەپتىگى بار. ماسەلەن, قول ەڭبەگىن ازايتسا, ەكىنشىدەن, اۋىل جاستارىنىڭ قىزىعۋشىلىعىن تۋدىرۋى ابدەن مۇمكىن. بىلىكتى جاستار زاماناۋي تەحنيكا ارقىلى جۇمىس ىستەۋگە ىنتالى بولۋى دا عاجاپ ەمەس قوي.
روبوت-ساۋىنشىنىڭ ەڭ اسەرلى بولىگى 3D كامەرالار مەن جوعارى دالدىكتەگى سەنسورلار. مالدىڭ ورنىن وزدىگىنەن انىقتاپ, جەلىنگە ماسساج جاساپ, ءيدىرىپ, جەلىندەگى ءسۇتتى مۇقيات ساۋىپ الادى. بارلىق جۇمىس تاۋلىك بويى ۇزدىكسىز اتقارىلادى.
– بۇرىن بارلىق جۇمىستى قولمەن اتقاراتىن ەدىك, – دەيدى كەشەن باسشىسى ساعجان راقىشەۆ. قازىر تەك جۇمىس ىرعاعىن باقىلاپ وتىرامىز. ەڭ باستىسى, ساۋىن سيىرلاردىڭ جايلىلىعى. ول ءۇشىن كليمات-باقىلاۋ, جەلدەتكىش, اۆتوماتتى پەردەلەر ورناتىلعان. مال قوراسىندا ميكروكليمات ساقتالادى.
تاۋارلى-ءسۇت فەرماسى 300 باسقا شاقتالعان. تاۋلىگىنە التى تونناعا دەيىن ءسۇت وندىرىلەدى. جۇيەنىڭ اۆتوماتتاندىرىلۋىنىڭ ارقاسىندا بارلىق جۇمىس ءوز ىرعاعىمەن اتقارىلىپ جاتىر. ءسۇت ءونىمى تۋرالى ناقتى دەرەك شارۋاشىلىقتىڭ تسيفرلىق باسقارۋ جۇيەسىنە بىردەن جىبەرىلەدى.
جاڭالىقتى جانى جاقسى كورەتىن شارۋاشىلىقتاعى ىلكىمدى ءىستىڭ لەگى جالعىز فەرماداعى شارۋامەن عانا شەكتەلىپ قالماپتى. 2013 جىلدان باستاپ ورگانيكالىق تىڭايتقىشتى پايدالانىپ ەگىن ەگەدى. 4 مىڭ گەكتاردان استام ەگىن القابى سەرتيفيكاتقا يە بولعان. ەكولوگيالىق تازا بيدايعا سۇرانىس جوعارى. ءونىمى ەۋروپا ەلدەرىنە ەكسپورتقا شىعارىلادى.
اقكولدىڭ «اقىلدى فەرماسى» تەحنولوگياسىمەن عانا ەمەس, ادامدارىمەن دە قۋاتتى. روبوتتار بار شارۋانى ءمىنسىز اتقارعانىمەن, ونى ارناسىنا ءتۇسىرىپ وتىراتىن بىلىكتى مامان دا قاجەت. كاسىپورىن باسشىلارى بۇل جايدى جاقسى تۇسىنەدى.
– قازىر بىزدە سەكسەننەن استام ادام ەڭبەك ەتەدى. ولاردىڭ كوبى وتباسىلارىمەن وسى شارۋاشىلىقتا. جىل سايىن جۇمىسشىلارعا تۇرعىن ءۇي سالىپ, الەۋمەتتىك-تۇرمىستىق جاعدايىن جاقسارتۋعا ۇمتىلىپ كەلەمىز, – دەيدى ساعجان راقىشەۆ, – ولار بولاشاققا سەنىمدى بولۋلارى كەرەك. سەنىمدى بولسا عانا اۋىلدى دامىتا الامىز. بۇگىنگىدەي جاقسى جاڭالىقتاردان شەت قالماي, زامانانىڭ دامۋ جولىمەن جۇرەتىن بولساق, ەل بولاشاعى جاستار دا تۇراقتاپ قالار ەدى. بەينەتى بەسباتپان اۋىر جۇمىستى وسىنداي تەحنولوگيالىق دامۋ ارقىلى جەڭىلدەتسەك, جاستاردىڭ ىقىلاسى ەلگە اۋادى. تۇپتەپ كەلگەندە ەل ىرگەسىن سوكپەي, بوساعاسىن بەرىك ەتەتىن تالپىنىس دەپ ويلايمىن.
اۋىلداعى «اقىلدى ساۋىنشى» استانانىڭ ازىق-ت ۇلىك بەلدەۋىندەگى ىرىزدىق مولشىلىعىنا ءوز ۇلەسىن قوسىپ جاتىر. وسىنداي جان جادىراتار جاڭالىق وزگە وڭىرلەردە دە قانات جايسا عوي, شىركىن!
اقمولا وبلىسى,
اقكول اۋدانى