ورتالىقتا امەريكاداعى قازاق عالىمى, حيۋستون ۋنيۆەرسيتەتىنىڭ پروفەسسورى, دوكتور شايكەن تاتتىممەن بىرلەسىپ قاتەرلى ىسىككە قارسى زەرتتەۋلەر جاسالادى, دەپ حابارلايدى Egemen.kz.
جاسۋشا بيولوگياسى سالاسىندا ۇزاق جىلدار بويى زەرتتەۋلەر جۇرگىزگەن پروفەسسور شايكەن ءتاتتىم امەريكاداعى Peri-Nuc Labs LLP باس ديرەكتورى. ول تسيتوپلازمانى سەرپىمدى قاتتى تسيتوپلازمالىق جانە تۇتقىر سۇيىق تسيتوزولگە بولۋگە بولاتىنىن انىقتاعان عالىم. عالىمنىڭ عىلىمي جاڭالىعى قاتەرلى ىسىك پەن باسقا دا اۋرۋلاردىڭ سەبەپتەرىن زەرتتەۋگە, سونداي-اق ەمدەۋ تەحنولوگيالارىن ازىرلەۋگە جول اشىپ وتىر.
ورتالىقتىڭ اشىلۋىندا رەكتور جانسەيىت تۇيمەباەۆ ادامزات دەنساۋلىعىن جاقسارتۋدا عىلىمنىڭ الەۋەتىن زاماناۋي تەحنولوگيالارمەن ۇشتاستىرۋدىڭ ماڭىزىنا توقتالىپ, سوڭعى وتىز جىلدا امەريكدا عىلىممەن اينالىسىپ جاتقان قارا شاڭىراقتىڭ تۇلەگى شايكەن ءتاتتىمنىڭ عىلىمداعى جولىنا توقتالىپ ءوتتى. ايتۋىنشا, ورتالىقتىڭ اشىلۋى عىلىممەن اينالىسۋعا قادام باسقان ماگيسترانتتار, دوكتورانتتار ءۇشىن ۇلكەن مۇمكىندىك بەرەدى.
ورتالىق بىلتىر ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما توراعاسى-رەكتورى, جانسەيىت تۇيمەباەۆتىڭ باستاماسىمەن ماۋسىم ايىندا دوكتور شايكەن ءتاتتىمنىڭ قاتىسۋىمەن قۇرىلعان بولاتىن. ال سول جىلى قازان ايىندا دوكتور شايكەن Baylor Scott & White Health دەنساۋلىق ساقتاۋ جۇيەسىنىڭ ءبولىمى بەيلور مەديتسينا كوللەدجىنىڭ زەرتتەۋشى پروفەسسورى لاۋازىمىنا قابىلدانىپ, كوللەدج باسشىلىعىمەن زاماناۋي عىلىمي زەرتحانا اشۋ ۇيعارىلدى.
پروفەسسور شايكەن ءتاتتىمنىڭ ايتۋىنشا, ورتالىق ونكولوگيالىق اۋرۋلارعا قارسى زەرتتەۋ جۇمىستارىن جۇرگىزىپ, فارماكوگەنەتيكالىق جانە مولەكۋلالىق دياگنوستيكالىق تەستىلەۋ مۇمكىندىكتەرىن كەڭەيتەدى. ناتيجەسىندە قاتەرلى ىسىك اۋرۋىن ەمدەۋگە جانە الدىن الۋعا جول اشادى.
تەحاستاعى جانە اقش-تىڭ وڭتۇستىگىندەگى ەڭ ءىرى دەنساۋلىق ساقتاۋ جۇيەلەرىنىڭ ءبىرى Baylor Scott & White Health 2013 جىلى Baylor Health Care System (نەگىزى 1903 جىلى قالانعان) جانە Scott & White Healthcare بىرىگۋى ناتيجەسىندە قۇرىلدى. قۇرامىنا تەحاس شتاتىنداعى 50-دەن استام اۋرۋحانا جانە جۇزدەگەن مەديتسينالىق ورتالىقتار, كلينيكالار جانە مەديتسينالىق مەكەمەلەر كىرەدى. مۇندا جالپى مەديتسينالىق, جوعارى مامانداندىرىلعان حيرۋرگيالىق كومەك كورسەتىلىپ, كۇردەلى اۋرۋلاردى ەمدەلەدى.
كەزدەسۋ سوڭىندا تاراپتار ورتالىقتىڭ الداعى جۇمىستارى تۋرالى جوسپارلارىمەن ءبولىستى.
الماتى