بۇۇ دەرەكتەرىنە سۇيەنسەك, دۇنيەجۇزىندەگى ءاربىر ءۇشىنشى ايەل ومىرىندە كەمىندە ءبىر رەت زورلىق-زومبىلىققا تاپ بولعان. بۇگىندە زارداپ شەككەندەردىڭ سانى 1,3 ميلليارد ادامعا جۋىقتايدى. ال تسيفرلىق كەڭىستىكتىڭ كەڭەيۋى جاڭا قاتەرلەردى كۇشەيتىپ وتىر. ونلاين-قورلاۋ, قۋدالاۋ, رۇقساتسىز ينتيمدىك كونتەنت تاراتۋ, ديپفەيك – ءبارى قاۋىپسىزدىككە تىكەلەي اسەر ەتەدى. الايدا الەم مەملەكەتتەرىنىڭ 40 پايىزىنان ازىندا عانا ينتەرنەتتەگى زورلىق-زومبىلىقپەن كۇرەسۋگە ارنالعان ناقتى زاڭنامالار بار, دەپ جازادى Egemen.kz.
بۇل – 1,8 ميلليارد ايەلدىڭ قۇقىقتىق قورعانىسسىز ءومىر ءسۇرىپ جاتقانىن بىلدىرەدى. سوندىقتان قوعامنىڭ نازارىن وسى تاقىرىپتا اشىق ءارى مادەني تۇرعىدان كوتەرۋ ماڭىزدى. وسى ماقساتپەن استانا قالاسىندا بۇۇ-نىڭ «گەندەرلىك زورلىق-زومبىلىققا قارسى 16 كۇندىك بەلسەندى ءىس-قيمىل» جاھاندىق ناۋقانى اياسىندا «زورلىق-زومبىلىققا جول جوق» كينوفەستيۆالى اشىلدى.
ءىس-شارانى بۇۇ قازاقستانداعى تۇراقتى ۇيلەستىرۋشى كەڭسەسى, يۋنفپا, يۋنيسەف, بۇۇ ەرىكتىلەرى, «بۇۇ-ايەلدەر» قۇرىلىمى, سونداي-اق inDrive جانە Alternativa جوباسى بىرلەسىپ ۇيىمداستىرعان. فەستيۆال باعدارلاماسىنا قازاقستان, قىرعىزستان جانە نەپالدان كەلگەن ءتورت تولىقمەتراجدى تۋىندى ەنگىزىلگەن. كورسەتىلىمدەر استانا مەن شىمكەنتتە الدىن الا تىركەلگەن كورەرمەندەر ءۇشىن تەگىن ءوتىپ جاتىر.
فەستيۆال اشىلۋىندا كوپشىلىك نازارىنا اسحات كۋچينچيرەكوۆتىڭ «باۋىرىنا سالۋ» ءفيلمى ۇسىنىلدى. دراما وتباسىلىق قاتىناستاردى, ءداستۇر مەن جەكە سەزىم اراسىنداعى قايشىلىقتاردى تەرەڭ قوزعايدى. كورسەتىلىمنەن كەيىن وتكەن پىكىرتالاس بارىسىندا اكتەرلەر مەن ساراپشىلار مادەني نورمالار جانە قولداۋ جۇيەلەرىنىڭ ءرولى تۋرالى وي ءبولىستى. ولاردىڭ ايتۋىنشا, كينو – ءۇنسىز قالعان تاقىرىپتاردى ادامعا جاقىن, تۇسىنىكتى تىلدە جەتكىزۋدىڭ ەڭ اسەرلى تاسىلدەرىنىڭ ءبىرى.
ەلىمىزدەگى بۇۇ تۇراقتى ۇيلەستىرۋشىسى سارانگo رادناراگچا فەستيۆالدىڭ باستى ماقساتىن بىلاي ءتۇسىندىردى:
«كينو ءبىزدى تولعاندىرىپ قانا قويمايدى, ول ارەكەتكە يتەرمەلەيدى. سىيلاستىقتى كۇشەيتىپ, ءبىر-ءبىرىمىزدى تىڭداۋعا ۇيرەتەدى. ءاربىر ايەل ءوزىن قاۋىپسىز سەزىنەتىن ورتا قالىپتاستىرۋ – ورتاق مىندەت».
يۋنيسەف وكىلى دوكتور راشەد مۋستافا سارۆار دا بالالار مەن جاسوسپىرىمدەر ءۇشىن قاۋىپسىز اقپاراتتىق جانە الەۋمەتتىك ورتا قۇرۋدىڭ ماڭىزىن اتاپ ءوتتى.
ء«ار بالا ءوز قۇقىقتارى قورعالاتىنىنا سەنەتىن قوعامدا ءوسۋى كەرەك», دەدى ول.
ۇيىمداستىرۋشىلاردىڭ ايتۋىنشا, فەستيۆال ناقتى شەشىم ۇسىنۋدى ەمەس, ەڭ الدىمەن ويلاندىرۋدى, ديالوگ قالىپتاستىرۋدى ماقسات ەتەدى. ويتكەنى كەز كەلگەن الەۋمەتتىك وزگەرىس ۇندەۋ جاساۋدان باستالادى. فەستيۆال ءارى قاراي شىمكەنتتە جالعاسىن تاپتى. مۇندا قىرعىز رەجيسسەرى ميرلان ابدىحالىكوۆتىڭ ءفيلمى كورسەتىلدى. فيلم تىرشىلىكتىڭ سىرت كوزگە قالىپتى كورىنەتىن تۇستارىندا دا ادامنىڭ تاعدىرىنا سالماق تۇسىرەتىن ماسەلەلەر جاسىرۋلى بولۋى مۇمكىن ەكەنىن كورسەتەدى. كينوفەستيۆالدىڭ ءمانى – ءبىر وقيعانى ەمەس, تۇتاس قوعامنىڭ جاۋاپكەرشىلىگىن ەسكە سالۋ. قاتىسۋشىلاردىڭ پىكىرىنشە, ونەر, ءبىلىم, زاڭ, مەديا جانە ازاماتتىق باستامالار بىرىگىپ ارەكەت ەتكەندە عانا ادامدار ءبىر-بىرىنە قاۋىپسىز ورتا قالىپتاستىرا الادى.