گونكونگتىڭ سولتۇستىگىندە ءىرى تۇرعىن ءۇي كەشەنى ورتەنىپ كەتتى. 44 ادام ءتىلسىز جاۋدىڭ قۇربانى بولىپ, 100 -گە جۋىق تۇرعىن تابىلماي جاتىر. قۇتقارۋ جۇمىستارى ءالى توقتاعان جوق, دەپ جازادى Egemen.kz.
قالا بيلىگى ورتكە بايلانىستى ابايسىزدا كىسى ءولتىرۋ كۇدىگىمەن ءۇش ادامدى ۇستاعانىن حابارلادى. پوليتسيانىڭ مالىمەتىنشە, 52 مەن 68 جاس ارالىعىنداعى بۇل ازاماتتار عيماراتتا جوندەۋ جۇمىستارىن جۇرگىزگەن قۇرىلىس كومپانياسىنىڭ قىزمەتكەرلەرى. ونىڭ ىشىندە ەكەۋى كومپانيا باسشىسى, تاعى بىرەۋى ينجەنەر كەڭەسشى. تەكسەرۋ بارىسىندا عيماراتتىڭ سىرتقى قاباتىندا وتقا ءتوزىمسىز ماتەريالدار قولدانىلعانى انىقتالدى.
پوليتسيا وكىلى كومپانيا جەتەكشىلەرىنىڭ ورەسكەل نەمقۇرايلىلىعى ءورتتىڭ جىلدام تاراۋىنا سەبەپ بولىپ, ۇلكەن اپاتقا اكەلگەنىن ايتتى.
كەشەننىڭ 65 جاستاعى تۇرعىنى AFP اگەنتتىگىنە بەرگەن سۇحباتىندا بۇل ۇيدە 40 جىلدان بەرى تۇراتىنىن, ال كورشىلەرىنىڭ كوپشىلىگى ەگدە جاستاعى ادامدار ەكەنىن جەتكىزدى.
ونىڭ ايتۋىنشا, جوندەۋ جۇمىستارى سالدارىنان تەرەزەلەر جابىق تۇرعان. كەي تۇرعىندار ءورت شىققانىن بايقاماي قالعان. ولارعا كورشىلەرى تەلەفون شالىپ, دەرەۋ ەۆاكۋاتسيالانۋدى ەسكەرتكەن.
ءورت كەشەندەگى 8 كورپۋستىڭ جەتەۋىن شارپىدى. جالىندى سوندىرۋگە 700-دەن استام قۇتقارۋشى جۇمىلدىرىلعان. اپاتتان كەيىنگى تاڭەرتەڭ دە بىرنەشە وشاقتى وقشاۋلاۋ جۇمىستارى جالعاسقان. ءورت عيماراتتا جوندەۋ جۇرگىزىلىپ جاتقان ساتتە تۇتانعان. ناقتى سەبەبى بەلگىسىز.
گونكونگ اكىمشىلىگىنىڭ باسشىسى دجون لي بەيسەنبى تاڭەرتەڭ 279 ادامنىڭ ءىز-ءتۇزسىز جوعالعانى جونىندە اقپارات بەردى. كەيىن ءورت ءسوندىرۋ قىزمەتى ولاردىڭ بىرقاتارىمەن بايلانىسقا شىققانىن حابارلادى. توتەنشە جاعدايدان كەيىن 900-دەن استام ادام ۋاقىتشا ورنالاستىرۋ ورىندارىنا جەتكىزىلدى.
قىتايدىڭ مەملەكەتتىك CCTV تەلەارناسى قحر توراعاسى سي تسزينپين قازا تاپقاندار مەن زارداپ شەككەندەردىڭ وتباسىلارىنا كوڭىل ايتقانىن حابارلادى.
ءورت تۋرالى حابار سارسەنبى كۇنى جەرگىلىكتى ۋاقىتپەن 14:51-دە تۇسكەن. قاۋىپتىلىك دەڭگەيى ەڭ جوعارعى بەسىنشى ساناتقا باعالانعان. پوليتسيا جاقىن ماڭداعى ۇيلەردى تولىق ەۆاكۋاتسيالادى.
كەي تۇرعىندار ءورتتىڭ تىم اۋقىمدى بولىپ كەتكەنىنە نارازى. ولار بيلىكتىڭ ارەكەتىن سىنعا الىپ,ء ورت ءسوندىرۋ بولىمشەسى ءدال جانىندا تۇرعانىنا قاراماستان, جالىننىڭ تەز تارالعانىنا قاتتى قىنجىلىس ءبىلدىردى.
وقيعا ورنىنداعى سۋرەتتەردە عيماراتتاردىڭ بامبۋك قۇرىلىس قاڭقالارىمەن ورالعانى بايقالدى. مۇنداي قاڭقالار مەتالدان جەڭىل ءارى تەز جينالعانىمەن, قاۋىپسىزدىك ەرەجەلەرى بويىنشا ولاردان بىرتىندەپ باس تارتۋ تۋرالى شەشىم وسى كوكتەمدە قابىلدانعان.
Wang Fuk Court كەشەنى 1983 جىلى تەڭىز جاعاسىنا جاقىن ايماقتا سالىنعان. 8 بلوكتان تۇراتىن كەشەندە 1984 پاتەر بار. 2021 جىلعى ساناق بويىنشا مۇندا 4600-گە جۋىق ادام تۇرعان.
قىتاي قىزمەتىنە سۇحبات بەرگەن وكرۋگ دەپۋتاتى مۋي سيۋ فۋن ءورت جوندەۋ جۇمىستارى ءجۇرىپ جاتقان جەتى بلوكتى شارپىعانىن ايتتى. سەگىزىنشى بلوكتا دا باستاپقىدا شاعىن ءورت شىققانىمەن, ءورت سوندىرۋشىلەر ونى دەر كەزىندە توقتاتقان.
گونكونگتاعى تۇرعىن ۇيلەر تىعىز سالىناتىندىقتان, پاتەرلەردىڭ كولەمى شاعىن, بوس كەڭىستىك قالمايدى. مۇنداي جوسپارلاۋ ءورت كەزىندە زارداپ شەگەتىن ادامدار سانىن ارتتىرا تۇسەدى.
ءورت ءسوندىرۋ قىزمەتى باسشىسىنىڭ ورىنباسارى دەرەك ارمسترونگ چان جوعارى تەمپەراتۋرا قۇتقارۋشىلارعا عيماراتقا كىرۋگە مۇمكىندىك بەرمەي, ەۆاكۋاتسيانى قيىنداتقانىن ايتتى. ونىڭ سوزىنشە, قۇلاعان قۇرىلىس بولىكتەرى مەن قاڭقالار دا قۇتقارۋشىلارعا قوسىمشا قاۋىپ توندىرگەن.