كەشە استانا قالاسىندا مادەنيەت, عىلىم, مەديا جانە سپورت سالاسىندا جوعارى جەتىستىكتەرگە جەتكەن تالانتتى جاستارعا «دارىن» مەملەكەتتىك جاستار سىيلىعىن تاپسىرۋ ءراسىمى ءوتتى. لاۋرەاتتاردى ماراپاتتاۋ سالتاناتىنا مادەنيەت جانە اقپارات ءمينيسترى ايدا بالاەۆا قاتىستى.
بيىلعى «دارىن» مەملەكەتتىك جاستار سىيلىعى جوعارى جەتىستىكتەرگە جەتكەن 20 جاس دارىنعا بەرىلدى. ولاردىڭ قاتارىندا حالىقارالىق جانە رەسپۋبليكالىق كونكۋرستار, فەستيۆالدار مەن كورمەلەردىڭ لاۋرەاتتارى, رەسپۋبليكالىق جانە حالىقارالىق دەڭگەيدەگى سپورت جارىستارىنىڭ جۇلدەگەرلەرى مەن جەڭىمپازدارى, قوعامنىڭ دامۋىنا ۇلەس قوسىپ جۇرگەن جاستار بار.
مادەنيەت جانە اقپارات ءمينيسترى ايدا بالاەۆا قۇتتىقتاۋ سوزىندە جاستار ساياساتى سالاسىندا جىل ساناپ جاڭا بۋىندى قولداۋعا باعىتتالعان شارالار مەن جوبالار ارتىپ كەلە جاتقانىن, پرەزيدەنت باستاماسىمەن جوعارى ءبىلىمنىڭ قولجەتىمدىلىگى ارتىپ, جاس عالىمداردى قولداۋعا ارنالعان گرانت باعدارلامالارى كوبەيگەنىن, ەڭبەك نارىعىندا جاس مامانداردىڭ مۇمكىندىكتەرىن ارتتىراتىن جاڭا جوبالار ىسكە قوسىلعانىن, كرەاتيۆتى يندۋستريا, تسيفرلىق ەكونوميكا, كاسىپكەرلىك سالاسىندا جاستارعا جول اشاتىن باستامالار دا مەملەكەت تاراپىنان قولداۋ تاۋىپ وتىرعانىن تىلگە تيەك ەتتى.
«مەملەكەت باسشىسى ءاردايىم ءوز سوزدەرىندە جاستارعا قولداۋ ءبىلدىرىپ, ۇلكەن سەنىم ارتىپ كەلەدى. پرەزيدەنتتىڭ ءار جولداۋى, قولعا العان رەفورمالارى مەن باستامالارى – جاستاردىڭ بولاشاعى مەن يگىلىگى ءۇشىن جاسالىپ جاتقان اۋقىمدى وزگەرىستەردىڭ ناقتى كورىنىسى. بۇل رەفورمالاردىڭ وزەگى – ادىلدىك, زاڭ مەن ءتارتىپ, اشىقتىق پەن جاۋاپكەرشىلىك سەكىلدى قۇندىلىقتارعا نەگىزدەلگەن. اسىرەسە «زاڭ جانە ءتارتىپ», «تازا قازاقستان» باستامالارى مەن جاپپاي ۆولونتەرلىك اكتسيالاردى جاستاردىڭ زور جاۋاپكەرشىلىكپەن جانە ۇلكەن ىنتامەن قولداپ كەلە جاتقانى قۋانتادى. بۇل اۋقىمدى باستامالاردىڭ بارلىعى – جاڭا يدەولوگيانىڭ ماڭىزدى بولىگى. ال وسى يدەولوگيانى جۇزەگە اسىراتىن دا, ونى العا جەتەلەيتىن دە – وزدەرىڭىز», دەدى مينيستر.
لاۋرەاتتار «عىلىم», «ەسترادا», «كلاسسيكالىق مۋزىكا», «حالىق شىعارماشىلىعى», «سپورت», «ديزاين جانە بەينەلەۋ ونەرى», «جۋرناليستيكا», «قوعامدىق قىزمەت», «تەاتر جانە كينو», «ادەبيەت» اتالىمدارى بويىنشا انىقتالدى.
2025 جىلعى جەڭىمپازداردىڭ قاتارىندا تانىمال وتاندىق ءانشى ەڭلىك قۇراربەك (Yenlik), «سلاۆيان بازارى-2024» حالىقارالىق ۆوكالدىق بايقاۋىنىڭ باس جۇلدەگەرى ەرنازار جۇبان, «قايرات» فۋتبول كلۋبىنىڭ شابۋىلشىسى داستان ساتپاەۆ بار.
«دارىن» مەملەكەتتىك جاستار سىيلىعى جىل سايىن تالانتتى جاستاردى ەلدىك دەڭگەيدە قولداۋ ماقساتىندا بەرىلەدى. سىيلىق عىلىمي, شىعارماشىلىق, قوعامدىق قىزمەتتەگى جەتىستىكتەر مەن سپورتتىق ناتيجەلەردى ىنتالاندىرۋدى كوزدەيدى.
30 جىلدان استام ۋاقىت ىشىندە بۇل سىيلىقتى 360-تان اسا جاس تالانت يەلەنگەن. سونىڭ ىشىندە نۇرلان ونەرباەۆ, باقتيار ارتاەۆ, سەرىك ساپيەۆ, دانيار ەلەۋسىنوۆ, يليا يلين, ولگا شيشيگينا, دەنيس تەن, قىدىرالى بولمانوۆ, «مۋزارت», «بايتەرەك» توبى, سەرىك يبراگيموۆ, ءالي وقاپوۆ, قايرات نۇرتاس, ديماش قۇدايبەرگەن جانە تاعى باسقا كوپتەگەن ونەرپاز بەن سپورتشى بار.