باياناۋىلدا ايگىلى قۇسبەگى ءماۋيا ابىكەي ۇلىنىڭ 125 جىلدىعىنا ارنالعان رەسپۋبليكالىق قۇسبەگىلەر سايىسى ءوتتى. ەلىمىزدىڭ ءار وڭىرىنەن قىران قۇس پەن تازى باپتاعان ساياتشىلار قاتىسىپ, بابادان قالعان ونەردىڭ بيىك رۋحىن كورسەتتى.
ءماۋيا ابىكەي ۇلى – XX عاسىردىڭ العاشقى جارتىسىندا قازاقتىڭ كاسىبي قۇسبەگىلىك ونەرىن دامىتىپ, كەيىنگى ۇرپاققا ميراس ەتكەن بىرەگەي تۇلعا. بالا كەزىنەن قىران باپتاپ, تازى جۇگىرتكەن ول 30-جىلدارداعى اشارشىلىق كەزەڭدە اڭشىلىق بريگادالار قۇرامىندا ەلدىڭ ازىق-ت ۇلىك قورىن تولىقتىرۋعا ۇلەس قوسقان. ەكىنشى دۇنيەجۇزىلىك سوعىس جىلدارى جىلقى زاۋىتىندا ەڭبەك ەتىپ, مايدانعا ات دايىنداعان. 1957 جىلى ءماۋيا ابىكەي ۇلىنا «كسرو اڭشىلىق كاسىپتىڭ ۇزدىگى» اتاعى بەرىلىپ, ەسىمى ەل جادىندا قالدى. قۇسبەگى قاريا شاعىندا ايگىلى رەجيسسەر شاكەن ايمانوۆتىڭ «نايزاتاستىڭ ەتەگىندە» فيلمىنە تۇسكەن.
ءتۋرنيردىڭ اشىلۋ سالتاناتىندا باياناۋىل اۋدانى اكىمىنىڭ ورىنباسارى ەركىن ارىستانبەكوۆ, پاۆلودار وبلىستىق دەنە شىنىقتىرۋ جانە سپورت باسقارماسى باسشىسىنىڭ ورىنباسارى قايرات احمەتجانوۆ, سونداي-اق رەسپۋبليكالىق «قۇسبەگىلىك» فەدەراتسياسىنىڭ ۆيتسە-پرەزيدەنتى باعدات مۇپتەكەقىزى مەن تۋريزم جانە سپورت مينيسترلىگى سپورت كوميتەتىنىڭ مەملەكەتتىك جاتتىقتىرۋشىسى بازاربەك كۇنتۋعان ءسوز الىپ, ۇلتتىق ونەردىڭ ۇرپاق جادىندا ساقتالۋىنىڭ ماڭىزىن اتاپ ءوتتى.
بۇركىت, قارشىعا, يتەلگى, تازى جارىسىندا قاتىسۋشىلار شەبەرلىكتەرى سىنالدى. بۇركىت سالۋدان ءبىرىنشى ورىندى جامبىل وبلىسىنىڭ قاتىسۋشىسى بەرىكبولسىن باباجان يەلەنسە, اتالعان ءوڭىردىڭ تاعى ءبىر قاتىسۋشىسى سەرىكبولسىن جالعاس ۇلى قارشىعا سالۋدان توپ جاردى. ال يتەلگىنى قۇسقا سالۋدان اقمولا وبلىسىنان ات تەرلەتىپ كەلگەن قۇسبەگى ەرلان كەنجەتاەۆ العاشقى ورىندى ولجالادى. سونداي-اق ارلان تازىلار جارىسىندا ءبىرىنشى ورىن مايقايىڭ كەنتىنىڭ قۇسبەگىسى باۋىرجان تىلەۋبەرگەنوۆتىڭ تۇيعىنىنا, قانشىق تازىلار جارىسىندا قاراباي اۋىلىنان قاتىسقان سەكەناي شالقارباەۆتىڭ «كوكسيىنە» بۇيىردى.
پاۆلودار وبلىسى,
باياناۋىل اۋدانى