وتاندىق جيھاز ءوندىرىسى حالىقتىڭ سۇرانىسىن قامتاماسىز ەتىپ وتىر ما؟

ەnergyprom دەرەكتەرىنە سۇيەنسەك, 2025 جىلدىڭ قاڭتار-قازان ايلارىنداعى جالپى ءوندىرىستىڭ جارتىسىنان استامى  الماتى قالاسىنا (24,6 ملرد تگ), الماتى وبلىسىنا (22,3 ملرد تگ) جانە تۇركىستان وبلىسىنا (16,4 ملرد تگ) تيەسىلى. ايتا كەتەرلىگى, الماتى وبلىسىندا جيھاز ءوندىرىسى 2024 جىلدىڭ قاڭتار-قازانىمەن سالىستىرعاندا 2,1 ەسە ارتقان.

مىسالى, وتكەن جىلمەن سالىستىرعاندا اعاشتان جاسالعان كەڭسە جيھازى ءوندىرىسى بىردەن 41,8%-عا وسكەن (353,5 مىڭ داناعا دەيىن). سونداي-اق اسحانا مەن قوناق بولمەگە ارنالعان اعاش جيھاز ءوندىرىسى 24,5%-عا (97,5 مىڭ داناعا دەيىن) جانە مەتالل قاڭقالى ارنايى وتىرعىش جيھازى 5%-عا (995,1 مىڭ داناعا دەيىن) ءوستى.

سونىمەن قاتار جاتىن بولمە ءۇشىن (توسەك پەن شكافتان باسقا) اعاش جيھاز ءوندىرىسى ەكى ەسەگە قىسقارىپ, 14 مىڭ دانانى عانا قۇرادى, ال ءاسۇي جيھازى ءوندىرىسى 8,3%-عا ازايىپ, 107,4 مىڭ دانا بولدى.

وتاندىق جيھاز فابريكالارى 2025 جىلدىڭ قاڭتار-قىركۇيەگىندە ءاسۇي جانە اعاش كەڭسە جيھازىنا دەگەن سۇرانىستى (ىشكى نارىقتاعى ساتۋ جانە ەكسپورت) تيىسىنشە 71% جانە 83,1% كولەمىندە قامتاماسىز ەتكەن. ءاسۇي جيھازى يمپورتى وتكەن جىلمەن سالىستىرعاندا تومەندەپ, اعاش كەڭسە جيھازى يمپورتى 25%-عا ازايدى. الايدا ىشكى نارىقتاعى ءاسۇي جيھازى ساتىلىمى ءبىر جىلدا 18,3%-عا تومەندەپ, 135,9 مىڭ دانانى قۇراسا, كەرىسىنشە اعاش كەڭسە جيھازى ساتىلىمى 25,2%-عا ءوسىپ, 382,4 مىڭ داناعا جەتتى.

ساۋدا كاسىپورىندارىنا ارنالعان اعاش جيھاز سەگمەنتىندە وتاندىق فابريكالاردىڭ ۇلەسى ايتارلىقتاي قىسقاردى. بيىلعى قاڭتار-قىركۇيەكتە ەل وندىرۋشىلەرى سۇرانىستى نەبارى 7,4% كولەمىندە قامتاماسىز ەتسە, بۇل كورسەتكىش 2024 جىلدىڭ وسىنداي كەزەڭىندە 70,6% بولعان. يمپورت كولەمى بىردەن 18,8 ەسەگە ءوسىپ, 244,6 مىڭ دانانى قۇرادى, ال ىشكى نارىقتاعى ساتىلىم التى ەسە ارتىپ, 263,7 مىڭ داناعا جەتتى.

اسحانا جانە قوناق بولمە جيھازىنا دەگەن سۇرانىستى وتاندىق كاسىپورىندار 18,6% دەڭگەيىندە قامتاماسىز ەتتى (بىلتىر – 13,6%). وسى ساناتتاعى يمپورت 11,7%-عا تومەندەپ, 387,6 مىڭ دانا بولدى. نارىقتاعى ساتىلىم كولەمى دە ازايىپ, 6,5%-عا كەمىپ, 474,1 مىڭ دانانى قۇرادى.

2025 جىلدىڭ قازان ايىنىڭ قورىتىندىسى بويىنشا جيھاز جانە ۇيگە قاجەتتى بۇيىمدار باعاسى ءبىر ايدا 0,3%-عا, ءبىر جىلدا 8,2%-عا قىمباتتادى. ەڭ ەلەۋلى قىمباتتاعان جيھاز تۇرلەرى – جاتىن بولمە جيھازدارى جانە ديۆان-توسەكتەر.