Singapore Science Centre Global حالىقارالىق فرانشيزاسى اياسىندا Kingsmen Exhibits كومپانياسىمەن بىرلەسىپ قولعا الىنعان مۋزەي ءبىلىم بەرۋ ورتالىعى رەتىندە دامىپ, زاماناۋي عىلىمي جەتىستىكتەر پلاتفورماسىنا اينالماق, دەپ حابارلايدى Egemen.kz.
الماتى اكىمى دارحان ساتىبالدى عىلىم مۋزەيىنىڭ قۇرىلىس بارىسى مەن ىسكە اسىرۋعا دايىندىققا ارنالعان كەڭەستە جۇمىس بارىسىن تالقىلادى. قازىرگى ۋاقىتتا عيماراتتىڭ ينجەنەرلىك جۇيەلەرى مەن كونسترۋكتسيالارىن مونتاجداۋ جالعاسىپ, شىنى كۇمبەز ورناتۋ, ەكسپوزيتسيا ەلەمەنتتەرى مەن مۋلتيمەديالىق ينستاللياتسيالار ازىرلەنىپ جاتىر.
مۋزەي بالالاردىڭ عىلىم مەن تەحنولوگياعا قىزىعۋشىلىعىن ارتتىرۋعا باعىتتالعان جاڭا ءبىلىم بەرۋ كەڭىستىگىنە اينالادى. مۇندا ينكليۋزيۆتى باعىتتاعى جوبالار بار. قالا باسشىسى اتاپ وتكەندەي, مۋزەي بالالاردىڭ عىلىمعا قىزىعۋشىلىعىن وياتىپ, زەرتتەۋشىلىك قابىلەتىن ارتتىرۋعا ىقپال ەتەدى. مۋزەي ۇلتتىڭ زياتكەرلىك بولاشاعىن قالىپتاستىرۋعا باعىتتالعان يگى جوبالاردىڭ ءبىرى رەتىندە جالعاساتىن بولادى. ينتەراكتيۆتى كەڭىستىك بالالاردىڭ عىلىم, تەحنولوگيا, ينجەنەريا جانە ماتەماتيكا سالالارىنا قىزىعۋشىلىعىن ەرتە جاستان دامىتادى.
قازىرگى كەزدە مۋزەي كونتەنتىن ازىرلەۋ بويىنشا جۇمىستار, ياعني فوكۋس-توپتار ۇيىمداستىرىلىپ, ساراپتامالىق تالقىلاۋلار وتكىزىلۋدە. قالا باسشىلىعى مۋزەي مازمۇنىنا ەرەكشە كوڭىل ءبولىپ جاتىر. مۇندا ماڭىزدى باعىتتاردىڭ ءبىرى بالالارعا قاۋىپسىز مىنەز-ق ۇلىق داعدىلارىن قالىپتاستىرۋعا ارنالعان ءبىلىم بەرۋ انيماتسياسى مەن ينتەراكتيۆتى باعدارلامالار كەشەنى. مۋزەي عىلىمي-اعارتۋشىلىقپەن بىرگە الەۋمەتتىك ماڭىزى بار ورتالىققا اينالماق.
بولاشاق مۋزەيدىڭ وپەراتسيالىق مودەلى دە قالىپتاستىرىلعان. ىشكى رەگلامەنتتەر, ستاندارتتار, راسىمدەر جانە لاۋازىمدىق نۇسقاۋلىقتار ازىرلەندى. قىزمەتكەرلەردى دايارلاۋ مەن حالىقارالىق تاجىريبەنى زەردەلەۋدە Singapore Science Centre ورتالىعىنىڭ تاجىريبەسى دە قاراستىرىلعان.
جوسپارعا سايكەس مۋزەي كەلەسى جىلدىڭ ماۋسىمىندا اشىلادى. قالا باسشىسى بالالارعا ارنالعان بۇل كەڭىستىكتىڭ مازمۇنى مەن قۇرىلىسى تولىقتاي بالالاردىڭ قاجەتتىلىكتەرىنە باعىتتالۋى, بارلىق ساپا جانە قاۋىپسىزدىك تالاپتارىنا ساي بولۋى كەرەكتىگىن اتاپ ءوتتى. الماتى اكىمى قۇرىلىس بارىسىنا, مەرزىمنىڭ ساقتالۋىنا جانە مۋزەيدى مازمۇنمەن تولىقتىرۋعا قاتاڭ باقىلاۋدى قامتاماسىز ەتۋدى تاپسىردى. سونداي-اق نىساننىڭ بالالارعا ارنالعان ەڭ ۇزدىك عىلىمي ءبىلىم بەرۋ ورتالىقتارىنىڭ ءبىرى بولاتىندىعىنا سەنىم ءبىلدىردى.
الماتى