ۇلىتاۋ وبلىسىندا اۋىل شارۋاشىلىعى قىزمەتكەرلەرىنىڭ كۇنىنە ارنالعان «گۇلدەنسە اۋىل – گۇلدەنەدى ەلىمىز» اتتى وبلىستىق فورۋم ءوتىپ جاتىر. بۇل مەرەكە - ەلىمىزدىڭ ەكونوميكالىق تۇراقتىلىعى مەن حالىقتىڭ ءال-اۋقاتىن جاقسارتۋعا ۇلەس قوسقان ەڭبەككەرلەردىڭ كۇنى, دەپ حابارلايدى Egemen.kz.
فورۋمعا اۋىل شارۋاشىلىعى ۆيتسە-ءمينيسترى امانعالي بەردالين, وبلىس اكىمى داستان رىسپەكوۆ, قر پارلامەنتى سەناتى مەن ءماجىلىسىنىڭ دەپۋتاتتارى, وبلىستىق ءماسليحات وكىلدەرى, سونداي-اق جەرگىلىكتى فەرمەرلەر مەن اۋىل شارۋاشىلىعى تاۋارىن وندىرۋشىلەر قاتىسۋدا.
ءىس-شارا جۇمىسى «AgroQazaq: تەحنيكا. ءونىم. بولاشاق» كورمەسىنەن باستالدى. كورمەدە اۋىل شارۋاشىلىعى تەحنيكاسى مەن ء«بىر اۋىل – ءبىر ءونىم» جوباسىنىڭ وڭىرلىك قاتىسۋشىلارىنىڭ ونىمدەرى ۇسىنىلدى.
ۇلىتاۋ وبلىسى ەگىنشىلىك پەن مال شارۋاشىلىعى دامىپ كەلە جاتقان ءوڭىر. وبلىستا ىشكى ءوندىرىستى ارتتىرۋعا باعىتتالعان بىرقاتار ماڭىزدى جوبالار جۇزەگە اسىرىلىپ وتىر. اتاپ ايتقاندا, ەت وڭدەۋ باعىتى بويىنشا وندىرىستەر ىسكە قوسىلىپ, جۇمىرتقا وندىرەتىن قۇس فابريكاسى جۇمىسىن باستادى. ازىقتىق بازانى نىعايتۋ ماقساتىندا سۋارۋ جۇيەلەرى ەنگىزىلدى. ەگىس القاپتارىن ۇلعايتۋ باعىتىندا جۇيەلى جۇمىستار قولعا الىنعان.
وبلىس قۇرىلعالى بەرى اۋىل شارۋاشىلىعى سالاسىنا 8,5 ملرد. تەڭگە ينۆەستيتسيا تارتىلدى. جىل باسىنان باستاپ بۇل سالاعا 2,5 ملرد. تەڭگە ينۆەستيتسيا قۇيىلىپ, وتكەن جىلعى سايكەسىنشە كەزەڭىمەن سالىستىرعاندا بۇل كورسەتكىش 46 پايىزعا ءوستى.
بيىلعى جىلى اگروونەركاسىپتىك كەشەن سۋبەكتىلەرىن سۋبسيديالاۋعا 4,4 ملرد تەڭگە ءبولىندى. بۇل قاراجات شامامەن 780 شارۋا قوجالىعىنا كومەك كورسەتىپ, ولاردىڭ تەحنيكاسىن جاڭارتۋىنا, زاماناۋي تەحنولوگيالاردى ەنگىزۋىنە, ءوندىرىس ونىمدىلىگى مەن باسەكەگە قابىلەتتىلىگىن ارتتىرۋىنا مۇمكىندىك بەردى.
جىل باسىنان بەرى شامامەن 200-دەن استام ءتۇرلى اۋىل شارۋاشىلىعى تەحنيكاسى ساتىپ الىندى. بۇل اۋىل شارۋاشىلىعى تەحنيكاسى پاركىن 6,5%-عا جاڭارتۋعا مۇمكىندىك بەردى. ناتيجەسىندە, 2025 جىلدىڭ 10 ايىندا اۋىل شارۋاشىلىعى ونىمدەرىنىڭ جالپى شىعارىلىم كولەمى 58,3 ملرد. تەڭگەنى قۇرادى, ال ەگىن جيناۋ كولەمى 20 مىڭ گەكتاردى قامتىدى. بارلىق جيناقتالعان استىق كولەمى 21 مىڭ توننانى قۇراپ, ورتاشا ءتۇسىم گەكتارىنا 11 تسەنتنەر دەڭگەيىندە بولدى. (2024 جىلى 8 تسەنترنەردى قۇرادى).
بيىل وڭىرىمىزدە العاشقى رەت «وتباسىلىق فەرما» جوباسىنىڭ پراكتيكالىق ىسكە اسىرىلۋى باستالدى. باستاماعا 34 شارۋا قوجالىعى مەن 2 اۋىل شارۋاشىلىعى وندىرىستىك كووپەراتيۆى قاتىسىپ وتىر.
جوبا اياسىندا 8 مىڭ اسىل تۇقىمدى ءىرى قارا, 13 مىڭ قوي مەن 2 مىڭ جىلقى ساتىپ الىندى. ينفراقۇرىلىمعا وبلىستىق بيۋدجەتتەن 1,2 ملرد تەڭگە ءبولىنىپ, تۇرعىن ۇيلەر, قورا-جايلار سالىنىپ, سۋ جانە ەلەكتر جەلىلەرى تارتىلدى. باعدارلامانىڭ ەرەكشەلىگى مال باسىن وسىرۋدەن, مال بورداقىلاۋ, سويۋ تسەحىن, بيە ءسۇتىن وڭدەۋ, ۆاكۋمدالعان ەت ونىمدەرىن شىعارۋ دەيىن تولىق وندىرىستىك تسيكلدى قامتىلۋ بولىپ تابىلادى.
جوبانىڭ نەگىزگى مىندەتتەرىنىڭ ءبىرى - وڭىردەگى بورداقىلاۋ الاڭدارىنا مالدىڭ تۇراقتى جانە ۋاقىتىلى جەتكىزىلۋىن قامتاماسىز ەتۋ. بۇل ازىق-ت ۇلىك قاۋىپسىزدىگىن ايتارلىقتاي كۇشەيتەدى.
سونىمەن بىرگە, جوبا ىشكى نارىقتى ساپالى جەمشوپپەن قامتاماسىز ەتۋگە جانە تۇراقتى جەمشوپ قورىن قالىپتاستىرۋعا باعىتتالعان.
الدىمىزدا جەر رەسۋرستارىن ءتيىمدى پايدالانۋ, سۋارمالى جەرلەردى دامىتۋ, ونىمدىلىكتى ارتتىرۋ, ينۆەستيتسيا تارتۋ جانە جاڭا جۇمىس ورىندارىن قۇرۋ مىندەتتەرى تۇر.
جاقىندا وبلىس دەلەگاتسياسى مەملەكەت باسشىسى قاسىم-جومارت توقاەۆتىڭ قاتىسۋىمەن وتكەن رەسپۋبليكالىق اۋىل شارۋاشىلىعى فورۋمىنا قاتىستى. ءىس-شارادا مال شارۋاشىلىعىنا قوسقان ەلەۋلى ەڭبەگى ءۇشىن ۇلىتاۋلىق اسقار ءالي ۇلى «ەرەڭ ەڭبەگى ءۇشىن» مەدالىمەن ماراپاتتالدى.
وسىنداي ەل الدىنداعى ماڭىزدى مىندەتتى ابىرويمەن اتقارىپ, حالقىمىزدىڭ ءال-اۋقاتىن ارتتىرۋعا ەلەۋلى ۇلەس قوسىپ كەلە جاتقان اۋىلشارۋاشىلىق سالاسىنىڭ قىزمەتكەرلەرى مەن ەڭبەككەرلەرىن ۇلىتاۋ وبلىسىنىڭ اكىمى داستان رىسپەكوۆ مەرەكەمەن قۇتتىقتاپ, العىس ايتتى.
ۇلىتاۋ وبلىسى