ماڭعىستاۋدا ءبىر كۇندە ءۇش جاڭا ءورت ءسوندىرۋ ورتالىعى اشىلدى

ورتالىقتىڭ اشىلۋ سالتاناتىنا ماڭعىستاۋ وبلىسىنىڭ اكىمى نۇرداۋلەت قيلىباي, توتەنشە جاعدايلار ءمينيسترى شىڭعىس ءارىنوۆ, وبلىستىق جانە جەرگىلىكتى اتقارۋشى ورگانداردىڭ وكىلدەرى, ارداگەرلەر مەن دەپارتامەنت قىزمەتكەرلەرى قاتىستى.

العاشقىسى – اقتاۋ قالاسىندا مودۋلدىك قۇرىلىمى بار جاڭا انگارلىق ءورت دەپوسى. جاڭا نىسان اقتاۋ قالاسىنىڭ تومەنگى شاعىناۋداندارى مەن پريمورسكي شاعىناۋدانىن, سونداي-اق ومىرزاق اۋىلىن, وندىرىستىك جانە دەمالىس ايماقتارىن قامتيتىن اۋماققا قىزمەت كورسەتەدى. جالپى حالىق سانى شامامەن 40 مىڭ ادام. دەپو زاماناۋي تەحنيكالارمەن, جەكە قۇرامعا ارنالعان دەمالىس جانە تۇرمىستىق ايماقتار, وقۋ سىنىپتارى, جابدىقتار مەن ارنايى كيىمدى ساقتاۋ بولمەلەرى, ديسپەتچەرلىك جانە بايلانىس جۇيەلەرىمەن تولىق جابدىقتالعان. سونداي اق, سالتاناتتى شارا بارىسىندا ءورت دەپوسىنا ەكى انر 150 «كاماز» ماركالى ءورت ءسوندىرۋ اۆتوكولى, ءبىر اۆتوكران جانە ءۇش «Skoda Kodiaq» ماركالى قىزمەتتىك كولىكتىڭ كىلتتەرى تابىستالدى.

ەكىنشىسى – تۇششىقۇدىق اۋىلىندا اۋىل تۇرعىندارىنىڭ قاۋىپسىزدىگىن ارتتىرۋ ماقساتىندا اشىلعان جاڭا ەرىكتى ءورت پوستى. بۇل نىسان شەبىر جانە قياقتى اۋىلدارىنا قىزمەت كورسەتەدى, وندا 3 400-دەن استام ادام تۇرادى. پوست زاماناۋي تەحنيكامەن جانە 24 ساعات بويى قىزمەت كورسەتۋگە قاجەتتى بارلىق جاعدايمەن قامتاماسىز ەتىلگەن. مۇندا 8 ءورت ءسوندىرۋشى قىزمەت اتقارادى.

ءۇشىنشىسى – قاراقيا اۋدانىندا توتەنشە جاعدايلار بولىمىنە ارنالعان بىرەگەي اكىمشىلىك عيمارات اشىلدى. ءبىر قاباتتى 288 شارشى مەتر اۋماقتاعى عيمارات قازىرگى زامانعى ستاندارتتارعا ساي سالىنعان. مۇندا ءبولىم باسشىسى مەن ينسپەكتورلار كابينەتتەرى, اكت زالى, ازاماتتاردى قابىلداۋ بولمەسى قاراستىرىلعان. جاڭا عيمارات قاراقيا اۋدانىندا ازاماتتىق قورعاۋ جۇيەسىن نىعايتۋعا, قىزمەت ساپاسىن ارتتىرۋعا جانە تۇرعىندارعا زاماناۋي جاعدايدا قىزمەت كورسەتۋگە مۇمكىندىك بەرەدى. اۋدان حالقى شامامەن 38 400 ادامدى قۇرايدى.

ماڭعىستاۋ وبلىسىنىڭ اكىمى نۇرداۋلەت قيلىباي جاڭا نىسانداردىڭ اشىلۋى وڭىردەگى ءورت قاۋىپسىزدىگىن ايتارلىقتاي كۇشەيتەتىنىن, تۇرعىنداردىڭ قاۋىپسىزدىگىن قامتاماسىز ەتۋدى باستى ماقسات دەپ سانايتىنىن اتاپ ءوتتى.

«بۇگىنگى ءۇش جاڭا ءورت ءسوندىرۋ ورتالىعىنىڭ اشىلۋى – ءوڭىردىڭ ءورت قاۋىپسىزدىگىن كۇشەيتۋگە باعىتتالعان ماڭىزدى قادام. جاڭا نىساندار تۇرعىنداردىڭ قاۋىپسىزدىگىن قامتاماسىز ەتۋگە, توتەنشە جاعدايلارعا جەدەل ارەكەت ەتۋگە جانە قىزمەت ساپاسىن ارتتىرۋعا مۇمكىندىك بەرەدى. ءبىزدىڭ باستى ماقساتىمىز – ازاماتتارىمىزدىڭ قاۋىپسىزدىگىن قورعاۋ جانە وڭىردەگى ازاماتتىق قورعاۋ جۇيەسىن ودان ءارى نىعايتۋ», دەدى نۇرداۋلەت قيلىباي.