استانادا تۋعان كۇننەن كەيىن توپتان ءبولىنىپ, بەلگىسىز باعىتقا كەتىپ قالعان 10 جاستاعى قىزدى ىزدەۋگە مىڭنان استام قالا تۇرعىنى قاتىستى. بۇل تۋرالى پوليتسيا دەپارتامەنتى مالىمدەدى, دەپ حابارلايدى Egemen.kz.
پوليتسيانىڭ مالىمەتىنشە, 22 قاراشا كۇنى قىز بالا تۋعان كۇندى اتاپ وتكەن سوڭ بالالار توبىنان ءبولىنىپ, ءوزى كەتىپ قالعان. ءبىراز ۋاقىتتان كەيىن اتا-اناسى ونىڭ جوعالعانىن بايقاپ, پوليتسياعا جۇگىنگەن.
قالادا كەڭ كولەمدى ىزدەستىرۋ جۇمىستارى بىردەن باستالدى.
ىزدەستىرۋ جۇمىستارىنا ەرىكتىلەر, بەيجاي قاراماعان قالا تۇرعىندارى, ۇلتتىق گۆارديا, استانا پوليتسياسى گارنيزونىنىڭ تولىق جەكە قۇرامى قاتىسقان.
سۋىق اۋا رايىنا بايلانىستى قوسىمشا كۇش پەن تەحنيكا تارتىلىپ, بالانىڭ ءجۇرىپ وتەتىن مۇمكىن ايماقتارى تولىق تەكسەرىلدى.
قىز بالا قالاارالىق قوعامدىق كولىكتىڭ باقىلاۋشىسى بەرگەن دەرەك بويىنشا انىقتالدى. ول بىردەن توقتاتىلىپ, پوليتسيا قىزمەتكەرلەرىنە حابار بەرىلگەن.
بالانىڭ جاعدايى جاقسى, ول اتا-اناسىنا امان-ەسەن تاپسىرىلدى.
استانا پد ءبىرىنشى باسشىسىنىڭ ورىنباسارى ءابىل ءابىلدين اتا-انالاردى بالالاردىڭ قاۋىپسىزدىگىنە ەرەكشە ءمان بەرۋگە شاقىردى.
«بالالاردىڭ قايدا جۇرگەنىن, كىممەن بىرگە ەكەنىن باقىلاپ وتىرعان ماڭىزدى. كوپتەگەن جاعدايدىڭ الدىن اتا-انانىڭ دەر كەزىندە نازار اۋدارۋى ارقىلى الۋعا بولادى», – دەدى ول.