27 جاستاعى قازاقستان U-21 جاستار قۇراماسىنىڭ بۇرىنعى كاپيتانى گەۆورگ نادجاريان فۋتبولشى رەتىندەگى كارەراسىن اياقتاعانىن مالىمدەدى, دەپ حابارلايدى Egemen.kz.
«مۇمكىن فۋتبولعا دەمەۋشى رەتىندە قايتا ورالامىن. ومىرلىك جاعدايلار ويىنشى رەتىندەگى كارەرامدى اياقتاۋعا ءماجبۇر ەتتى», – دەپ جازدى نادجارياننىڭ ءسوزىن Legalbet باسىلىمى.
2024 جىلدىڭ قاراشا ايىندا «اتىراۋ» ساپىندا ءجۇرىپ, «قايراتپەن» وتكەن ماتچتا نادجاريان تىزەسىن جاراقاتتاپ العان. جازداعى قالپىنا كەلتىرۋ كەزەڭىنەن كەيىن ول بيزنەسكە كوڭىل ءبولۋ ءۇشىن ءۇزىلىس جاساۋ تۋرالى شەشىم قابىلداعان.
27 جاستاعى نادجاريان – قاراعاندىلىق «شاحتەر» كلۋبىنىڭ تۇلەگى. ول «استانا», «اتىراۋ», سونداي-اق ارمەنيانىڭ «ۆان» جانە «پيۋنيك» كوماندالارىندا ونەر كورسەتتى. قازاقستان پرەمەر-ليگاسىندا جالپى 132 ماتچ وتكىزىپ, 4 گول سوعىپ, 5 ناتيجەلى پاس بەرگەن.
2019 جىلى نادجاريان قازاقستان ۇلتتىق قۇراماسىنا شاقىرىلىپ, ونىڭ ساپىندا ءبىر ماتچقا شىققان. Transfermarkt پورتالى ويىنشىنىڭ قازىرگى باعاسىن 100 مىڭ ەۋرو كولەمىندە كورسەتىپ وتىر.