استانا. 22 ناۋرىز. كەشە تبليسيدە ەلدىڭ بۇرىنعى پرەزيدەنتى سااكاشۆيليدىڭ جاقتاستارى كوپ مىڭ ادام قاتىسقان شەرۋ وتكىزىپ, وندى ۇكىمەتتى وتستاۆكاعا كەتۋگە شاقىردى. بۇل تۋرالى «نوۆوستي-گرۋزيا» حابارلادى.
«گرۋزيا ۇكىمەتى حالىقتىڭ تولىق سەنىمىن جوعالتىپ الدى, ەندى ول وتستاكاعا كەتۋى كەرەك». ەلدىڭ بۇرىنعى پرەزيدەنتى ميحايل سااكاشۆيلي «ءبىرتۇتاس ۇلتتىق قوزعالىس» پارتياسى ۇيىمداستىرعان نارازىلىق اكتسياسىنا قاتىسۋشىلارعا وسىنداي ۇندەۋ جولدادى.
«گرۋزيا ۇكىمەتى بۇگىندە حالىقتىڭ سەنىمىن تولىق جوعالتىپ الدى, ول الدەقاشان وتىرىككە بەلشەسىنەن باتقان بولاتىن. ەندى بيلىك باسىنان رەسەيلىك وليگارح پەن ونىڭ سىبايلاستارىن الىپ تاستاۋ عانا قالدى. قوزعالىستى توقتاتۋعا بولادى, بىراق ونىڭ جالعاسى گرۋزيانى قۇرتىپ تىنادى», - دەپ مالىمدەدى سااكاشۆيلي بريۋسسەلدە وتىرىپ.
«ءبىز وتە جاقىن ارادا گرۋزيانى وسى ءبىر ءىس-ارەكەتسىز قارا كۇشتەردەن ازات ەتەمىز, ءسويتىپ ونى جارقىن جولعا شىعارامىز», - دەپ سايرادى سااكاشۆيلي بۇدان ءارى.
ۇيىمداستىرۋشىلاردىڭ ايتۋلارىنشا, اكتسياعا بارلىعى 50 مىڭعا جۋىق ادام قاتىسقان. ولار شارانىڭ ءالى جالعاسا بەرەتىنىن ايتىپ وتىر.
مۇرات ايتقوجا.