«ينۆەستيتسياعا تاپسىرىس»: قازاقستان بيزنەسى مەن اگروسەكتورى ءۇشىن جاڭا مۇمكىندىكتەر اشىلادى

باعدارلامانىڭ باستى ماقساتى – ىشكى نارىقتا سۇرانىسى جوعارى, يمپورتتىڭ ۇلەسى كوپ تاۋارلاردى وندىرۋگە باعىتتالعان شاعىن, ورتا جانە ءىرى بيزنەس جوبالارعا قولداۋ كورسەتۋ

باعدارلاما اياسىندا, اسىرەسە, اگروونەركاسىپ كەشەنىنە جانە وڭدەۋشى ونەركاسىپتەگى كەڭ تۇتىناتىن تاۋارلارعا ايرىقشا كوڭىل بولىنبەك.

اۋىل شارۋاشىلىعى ءمينيسترى ايداربەك ساپاروۆتىڭ ايتۋىنشا, اتالعان باعدارلاما ەلىمىزدە اسا جوعارى سۇرانىسقا يە باعىتتارعا ينۆەستيتسيا تارتۋعا جول اشىپ, يمپورتتى الماستىرۋ مەن ەكونوميكانى ءارتاراپتاندىرۋدىڭ جۇيەلى قۇرالىنا اينالادى.

«شىندىعىندا جاڭا قادام نەگىزگى ونىمدەر بويىنشا ىشكى تاپشىلىقتى جويۋمەن قاتار, ەكسپورتقا باعىتتالعان وندىرىستەردى قالىپتاستىرۋعا مۇمكىندىك بەرەتىنى ءسوزسىز. بۇل وڭىرلەردىڭ تۇراقتى ەكونوميكالىق ءوسۋىن قامتاماسىز ەتەدى», – دەدى مينيستر.

مەملەكەت يمپورتتى الماستىرۋ جانە ەكسپورتتىق الەۋەتى جوعارى سالالاردى انىقتايدى, ال وڭىرلەر ناقتى جوبالار جاساپ, ولاردى جۇزەگە اسىرۋعا دايىن بيزنەس-باستامالاردى قالىپتاستىرادى. جوبالاردىڭ تيىمدىلىگى, قارجىلىق جانە وندىرىستىك مۇمكىندىكتەرى «بايتەرەك» حولدينگى ارقىلى ابدەن پىسىقتالادى, بۇل اشىقتىقتى قامتاماسىز ەتىپ, ينۆەستيتسيالىق تاۋەكەلدەردى ازايتۋعا جول اشادى.

اۋىل شارۋاشىلىعى مينيسترلىگى ايماقتاردىڭ ءسۇت, ەت, كوكونىس, قانت, كارتوپ, بالىق جانە باسقا نەگىزگى ونىمدەر بويىنشا قامتىلۋىن باعالاۋدى, تاپشىلىقتاردى جانە يمپورتقا تاۋەلدىلىك دەڭگەيىن انىقتاۋدى, وڭدەۋشى كاسىپورىنداردىڭ جۇكتەمەسىن تالداۋدى, ايماقتاردىڭ شيكىزاتتىق الەۋەتىن باعالاۋدى, سونداي-اق كولەمىن تەز ارتتىرۋعا مۇمكىندىك بەرەتىن ونىمدەردىڭ ەكسپورتتىق الەۋەتىن سارالايتىن كەشەندى تالداۋ جۇرگىزدى.

مينيسترلىك دەرەكتەر نەگىزىندە اكىمدىكتەرگە ناقتى سالالاردى جانە انىقتالعان تاپشىلىقتاردىڭ ورنىن تولتىرۋ ءۇشىن ينۆەستورلار تابۋدى ۇسىندى.

اگروونەركاسىپ كەشەنىنە قاتىستى جوبالار ءتىزىمى: ءسۇت ونىمدەرىن وندىرەتىن فەرمالار سالۋ, ەت جانە قۇس شارۋاشىلىعىن دامىتۋ, ءسۇت, ەت, تەرى مەن ءجۇن جانە بالىق وڭدەۋ, استىقتى تەرەڭ وڭدەۋ, جىلىجاي كەشەندەرىن قۇرۋ جانە قانت ونەركاسىبىن دامىتۋ.

اتالعان باعىتتار يمپورتقا تاۋەلدىلىكتى تومەندەتۋ جونىندەگى مەملەكەتتىك ستراتەگياعا سايكەس كەلەدى جانە ءار ايماقتىڭ رەسۋرستىق بازاسىن ەسكەرە وتىرىپ ناقتى جوبالاردى ىسكە اسىرۋعا باعىتتالعان.

قازىرگى ۋاقىتتا ءوڭىر اكىمدىكتەرى, استانا, الماتى جانە شىمكەنت قالالارى بيزنەس-قوعامداستىق پەن «نۇح «بايتەرەك» اق-مەن بىرلەسە وتىرىپ, ينۆەستيتسيالىق جوبالار ءتىزىمىن سكرينينگتەن وتكىزۋدە. بۇل كەزەڭدە كەيبىر جوبالار ءتيىستى تالاپتارعا سايكەس كەلمەگەندىكتەن ىرىكتەۋدەن وتكىزىلدى. ولار: شيكىزاتتىق بازا جەتكىلىكسىزدىگى, ەكونوميكالىق تۇراقسىزدىق, راستالعان ينۆەستوردىڭ بولماۋى, تەحنولوگيالىق تالاپتارعا سايكەسسىزدىك نەمەسە بۇرىننان جۇكتەلگەن قۋاتتىلىقتىڭ قايتالانۋى.

ىرىكتەۋدىڭ ناتيجەسىندە تۇپكىلىكتى تاپشىلىقتاردى ناقتى جابۋعا جانە يمپورتقا تاۋەلدىلىكتى تومەندەتۋگە باعىتتالعان ساپالى, تەڭدەستىرىلگەن جوبا پورتفەلى قالىپتاسادى.

ءسۇت وڭدەۋ اقمولا, اقتوبە, الماتى, پاۆلودار وبلىستارىندا جانە شىمكەنت قالاسىندا داميتىن بولادى. جوسپار بويىنشا 310 مىڭ توننا دايىن ءونىم شىعاراتىن 10 جوبا جۇزەگە اسىرىلىپ, جالپى سوماسى 67,6 ملرد تەڭگە ينۆەستيتسيا تارتىلماق.

ەڭ ءىرى ينۆەستور — SolicoGroup كومپانياسى (يران) الماتى وبلىسىندا جىلىنا 200 مىڭ توننا ىرىمشىك وندىرەتىن زاۋىت سالۋدى جوسپارلاپ وتىر, ينۆەستيتسيا كولەمى 33,1 ملرد تەڭگە.

قۇس ەتىمەن قامتاماسىز ەتۋ 80%-دى قۇرايدى.

سونىڭ اياسىندا الماتى, تۇركىستان, اقمولا, سولتۇستىك قازاقستان وبلىستارى, جەتىسۋ ءوڭىرى جانە استانا قالاسىندا 456,7 مىڭ توننادان استام دايىن ءونىم شىعاراتىن 23 جوبا جۇزەگە اسىرىلىپ, جالپى ينۆەستيتسيا كولەمى 432,2 ملرد تەڭگەگە جەتەتىن بولادى.

ءىرى جوبالاردىڭ قاتارىندا ينۆەستيتسيا كولەمى 146 ملرد تەڭگە, جىلدىق ءونىم 120 مىڭ توننادان اساتىن «ايتاس كز» قۇس فابريكاسى بار.

قانت بويىنشا يمپورتقا تاۋەلدىلىكتى تومەندەتۋ ماقساتىندا قازاقستاندا الماتى, جامبىل جانە سولتۇستىك قازاقستان وبلىستارىندا بىرقاتار جوبالار ىسكە اسىرىلماق. الماتى وبلىسىندا 247,1 ينۆەستيتسيا تارتىلاتىن, جىلدىق قۋاتى 500 مىڭ تونناعا ەسەپتەلگەن QAZAQARABSUGAR جوباسى قولعا الىنباق.

2025 جىلى قازاقستان 27 ملن توننا استىق جيناپ, رەكوردتىق كورسەتكىشكە قول جەتكىزدى, بۇل جوعارى قوسىمشا قۇندى ءونىم شىعارۋ مۇمكىندىكتەرىنە جول اشادى.

قىتايلىق «داليان حولدينگ» كومپانياسى اقمولا وبلىسىندا 3 ملن توننا استىق وڭدەۋدى جوسپارلاپ وتىر, ينۆەستيتسيا كولەمى $1,6 ملرد.

ء«اربىر جوبا ەرەكشە باقىلاۋدا. ولاردىڭ تابىستى جۇزەگە اسۋىنا مينيسترلىك جان-جاقتى قولداۋ كورسەتەدى. ءبىز ايماقتارمەن جانە بيزنەس سالاسىمەگ جۇمىستى كۇشەيتۋدى ۇزدىكسىز جالعاستىرامىز, ءاربىر جوبانىڭ قارجىلىق تۇراقتىلىعى, تەحنولوگيالىق نەگىزدىلىگى جانە ەل ەكونوميكاسى ءۇشىن بارىنشا تيىمدىلىگى قامتاماسىز ەتىلۋى ءتيىس», – دەپ اتاپ ءوتتى مينيستر.