قازاقستان قۇراماسى ساۋد ارابياسىنىڭ ەر-رياد قالاسىندا وتكەن يسلام ىنتىماقتاستىعى ويىندارىنداعى ونەرىن اياقتادى, دەپ حابارلايدى Egemen.kz.
جالپى ەسەپتە وتانداستارىمىز 56 مەدال ەنشىلەدى. ونىڭ 15-ءى - التىن, 20-سى - كۇمىس, 21-ءى - قولا مەدال. وسىلايشا قازاقستان جالپىكوماندالىق ەسەپتە جەتىنشى ورىنعا تۇراقتادى.
ءجۇزۋ, اۋىر اتلەتيكا جانە دجيۋ-دجيتسۋ قۇرامالارى ەل قورجىنىنا ءۇش مەدالدان سالدى.
ۇستەل تەننيسشىلەرى ەكى التىن مەدال جەڭىپ الدى. دزيۋدو, مۋاي-تاي, سەمسەرلەسۋ جانە كاراتە سپورتشىلارى ءبىر-ءبىر التىن مەدالمەن جارىستى اياقتادى.
قازاقستاندىق اتلەتتەر كوماندالىق جارىستا دا جۇلدەگەر اتاندى. ايەلدەر قۇراماسى گاندبولدان فينالعا دەيىن جەتىپ, ەكىنشى ورىنعا يە بولدى.
مەدال كەستەسىندە تۇركيا كوش باستادى - 72 التىن, 44 كۇمىس جانە 39 قولا. ەكىنشى ورىنعا وزبەكستان يە بولدى (29 التىن, 35 كۇمىس, 32 قولا). ۇزدىك ۇشتىكتى يران تۇيىندەدى (29 التىن, 19 كۇمىس, 33 قولا).
ايتا كەتەيىك, بۇل جارىستا ەلىمىزدىڭ نامىسىن 100-دەن استام سپورتشى قورعادى. ولار باعدارلاماعا ەنگىزىلگەن 23 سپورت ءتۇرىنىڭ 15-ىندە باق سىنادى.