انكارادا بەلگىلى قازاق اقىنى, اكادەميك, ديپلومات, تۇركولوگ جانە قازاقستاننىڭ ەڭبەك ەرى ولجاس سۇلەيمەنوۆتىڭ ايگىلى «از ي يا» (1975-2025) كىتابىنىڭ جارىق كورگەنىنە 50 جىل تولۋىنا وراي «ولجاس سۇلەيمەنوۆ. ماسشتاب. پلانەتا. جەر» اتتى حالىقارالىق كورمەنىڭ اشىلۋ سالتاناتى ءوتتى, دەپ جازادى Egemen.kz.
اتالعان شاراعا «تۇركسوي» ۇيىمىنىڭ باس حاتشىسى سۇلتان راەۆ, يۋنەسكو قامقورلىعىنداعى «مادەنيەتتەردى جاقىنداستىرۋ ورتالىعى» مەملەكەتتىك مۋزەيى ديرەكتورىنىڭ ورىنباسارى سالتانات ءاشىموۆا, وسى مەملەكەتتىك مۋزەيدىڭ «مادەنيەتتەر ءوزارا ىقپالداستىعى ورتالىعى» قوعامدىق بىرلەستىگىنىڭ ديرەكتورى ءۇمىتحان مۇنالباەۆا, دۇنيەجۇزى قازاقتار قاۋىمداستىعىنىڭ تۇركياداعى وكىلى ەرجان ءۋايىس قاتىستى.
باس حاتشى س. راەۆ بۇل شارانىڭ تۇركى الەمى ءۇشىن ماڭىزدىلىعىن ايتىپ ءوتتى.
«الىپ اقىننىڭ ەڭبەكتەرى ادامزاتقا تەرەڭ وي سالىپ, ءوزىنىڭ تۇرمىسى مەن بولمىسىن زەرتتەۋگە شابىت بەرەدى. قازاق اكادەميگىنىڭ ەڭبەكتەرى تەك مادەنيەت سالاسىمەن عانا شەكتەلمەي عىلىمنىڭ بار ماڭىزدى اۋماعىن كەشىپ وتەدى», – دەدى باس حاتشى.
ولجاس سۇلەيمەنوۆ ۆيدەوبايلانىس ارقىلى «تۇركسوي» ۇيىمىنىڭ وزىنە ارناپ ۇيىمداستىرعان شاراسىنا العىس ءبىلدىرىپ, سالەمىن جولدادى. اقىن ۇيىمنىڭ بەدەلى ارتقان سايىن دۇنيەجۇزىلىك قوعامداستىقتىڭ تۇركى حالىقتارىنىڭ مادەنيەتى مەن تاريحىنا دەگەن قىزىعۋشىلىعىنىڭ دا ءوسىپ جاتقانىن بايقاعانىن جەتكىزىپ, عالىمداردىڭ ەندى تۇركىلەردىڭ تاريحي ىقپالى تاقىرىبىنا بەت بۇراتىنىنا سەنىم ءبىلدىردى. سۇلەيمەنوۆ «از ي يا» كىتابىنىڭ 50 جىلدىعىنا ارنالعان شارانىڭ «تۇركسوي» شاڭىراعىندا وتكىزىلىپ وتىرىلعانىنا ريزاشىلىعىن جەتكىزدى.