بىرىڭعاي جيناقتاۋشى زەينەتاقى قورى زەينەتاقى كولەمىن ءوز بەتىنشە ارتتىرۋدىڭ جولدارىن ۇسىندى, دەپ حابارلايدى Egemen.kz.
دەموگرافيالىق وزگەرىستەر, حالىقتىڭ قارتايۋى جانە ەڭبەك نارىعىنداعى ۇدەرىستەر جاعدايىندا مەملەكەت ءۇشىن ازاماتتاردىڭ قارجىلىق تۇرعىدان الاڭسىز قارتايۋىن قامتاماسىز ەتۋ – باسىم باعىتتاردىڭ ءبىرى. وسىعان بايلانىستى زەينەتاقى لايىقتىلىعى, اسىرەسە ىنتىماقتى جۇيەنىڭ ۇلەسى ازايىپ, جيناقتاۋشى جۇيەنىڭ ءرولى ارتىپ كەلە جاتقان تۇستا, بۇرىنعىدان دا وزەكتى.
حالىقارالىق ەڭبەك ۇيىمىنىڭ ۇسىنىمى بويىنشا, كىرىستى الماستىرۋ كوەففيتسيەنتى كەمىندە 40%-ى بولۋى ءتيىس. قازاقستاندا بۇل كورسەتكىش شامامەن 41%-دى قۇرايدى. ياعني, قازىرگى ورتاشا زەينەتاقى ەڭبەككە دەيىنگى تابىستىڭ وسىنداي كولەمىن وتەيدى.
زەينەتاقىنى قالاي ارتتىرۋعا بولادى؟بجزق بولاشاق زەينەتاقى تابىسىنىڭ لايىقتىلىعىن ارتتىرۋدىڭ ەكى نەگىزگى جولىن اتاپ ءوتتى:
مىندەتتى جانە ەرىكتى زەينەتاقى جارنالارىن تۇراقتى تۇردە اۋدارۋ; جيناقتى جەكە ينۆەستيتسيالىق پورتفەلدى باسقارۋشىعا تاپسىرىپ, نەعۇرلىم تابىستى ستراتەگيانى تاڭداۋ.قوردىڭ مالىمەتىنشە, تۇراقتى مىندەتتى جارنالار بازالىق زەينەتاقىعا دا اسەر ەتەدى. ويتكەنى 1998 جىلدان باستاپ ەڭبەك ءوتىلى تەك جارنالاردىڭ ناقتى اۋدارىلۋىمەن راستالادى. قازىر بازالىق زەينەتاقىنىڭ ەڭ تومەنگى مولشەرى – كۇنكورىس دەڭگەيىنىڭ 70%-ى, ال 30 جىلدىق وتىلدەن كەيىن – 110%-ى. 2027 جىلعا قاراي بۇل سان 120%-عا دەيىن وسەدى.
ەرىكتى جارنانى كىم جانە قالاي اۋدارا الادى؟ەرىكتى زەينەتاقى جارنالارىن جەكە تۇلعالار وزدەرى نەمەسە جاقىندارى ءۇشىن, ال زاڭدى تۇلعالار قىزمەتكەرلەرىنىڭ پايداسىنا اۋدارا الادى. ۇسىنىلعان قاراجات بجزق-عا بانك ارقىلى نەمەسە جۇمىس بەرۋشىگە ءوتىنىش بەرۋ جولىمەن تۇسەدى. جزش العاشقى جارنا تۇسكەن بويدا اۆتوماتتى تۇردە اشىلادى. ەرىكتى جارنالاردى ەسەپكە الۋ ءۇشىن بولەك ءوتىنىش بەرۋدىڭ قاجەتى جوق – تىزىمدەر نەمەسە العاشقى تولەم نەگىز بولادى.
ەرىكتى جارنالاردان تولەم قاشان بەرىلەدى؟ەرىكتى جيناق ەسەبىنەن تولەمدى 50 جاستان باستاپ الۋعا بولادى. سونىمەن بىرگە ولار مۇگەدەكتىگى بار ازاماتتارعا, سونداي-اق قازاقستاننان تىس جەرگە تۇراقتى تۇرۋعا كەتكەن شەتەلدىكتەر مەن ازاماتتىعى جوق ادامدارعا دا بەرىلەدى. ءوتىنىشتى قوردىڭ ءموبيلدى قوسىمشاسىندا, سايتتاعى جەكە كابينەتتە نەمەسە بولىمشەلەردە راسىمدەۋگە مۇمكىندىك بار.
ەرىكتى جارنالار مۇراعا قالا ما؟ءيا, بارلىق زەينەتاقى جيناقتارى سياقتى ەرىكتى جارنالار قازاقستان زاڭناماسىندا بەلگىلەنگەن تارتىپپەن مۇراعا بەرىلەدى. بۇل پروتسەسس وسيەت نەمەسە زاڭ بويىنشا جۇزەگە اسىرىلادى.
ەرىكتى جارنانىڭ قانداي ارتىقشىلىقتارى بار؟ەڭ ۇلكەن ارتىقشىلىق – سالىمشى جارنا كولەمى مەن جيىلىگىن ءوزى انىقتايدى, تولەم الۋ ءتارتىبىن دە ءوزى بەلگىلەيدى. جۇمىس بەرۋشى تاراپىنان اۋدارىلعان ەرىكتى جارنالار جەكە تۇلعانىڭ تابىسى رەتىندە ەسەپتەلمەيدى, ال, كومپانيا ءۇشىن بۇل سوما كورپوراتيۆتىك تابىس سالىعىنان شەگەرىلەدى. ياعني, جۇمىس بەرۋشى سالىقتىق جەڭىلدىككە يە بولادى.
ەرىكتى جارنالار قالاي ينۆەستيتسيالانادى؟ەرىكتى جيناقتاردىڭ بارلىعى ينۆەستيتسيالانادى جانە سالىمشىعا تابىس اكەلەدى. ادەتتە, اكتيۆتەردى ۇلتتىق بانك باسقارادى, بىراق سالىمشى جەكە باسقارۋشى كومپانيانى تاڭداي الادى. مىندەتتى جارنالاردان ايىرماشىلىعى, ەرىكتى جيناقتى يپب-عا تولىق كولەمدە تاپسىرۋعا مۇمكىندىك بار. باسقارۋشىنى جىلىنا ءبىر رەت اۋىستىرۋعا رۇقسات ەتىلەدى.