الماتى وبلىسىنداعى ءىرى مەديتسينالىق ۇيىمداردىڭ ءبىرى – الماتى كوپسالالى كلينيكالىق اۋرۋحاناسى بۇگىندە وبلىس تۇرعىندارىنا جوعارى مامانداندىرىلعان مەديتسينالىق كومەك كورسەتەتىن زاماناۋي ورتالىقتاردىڭ قاتارىندا. حالىققا ساپالى, قاۋىپسىز ءارى قولجەتىمدى مەديتسينالىق قىزمەت كورسەتۋ, سونداي-اق كاسىبي مامانداردىڭ الەۋەتىن دامىتۋ ارقىلى ەمدەۋ ساپاسىن ارتتىرۋ – ۇجىمنىڭ باستى مىندەتىنە اينالعان.
– الماتى كوپسالالى كلينيكالىق اۋرۋحاناسى – تەك ەمدەۋ عانا ەمەس, ءبىلىم مەن تاجىريبە الماسۋ ورتالىعى. مۇندا جاس ماماندار تاجىريبە جيناپ, جوعارى دەڭگەيلى دارىگەرلەر ءوز بىلىكتىلىگىن ارتتىرىپ وتىرادى. اۋرۋحانا زاماناۋي تالاپتارعا ساي ماتەريالدىق-تەحنيكالىق بازاعا يە. اۋرۋحانادا 360 توسەك قورى, بىرنەشە كلينيكالىق, دياگنوستيكالىق بولىمشەلەر بار. قۇرامىندا تەراپيا, حيرۋرگيا, تراۆماتولوگيا, نەيروحيرۋرگيا, رەانيماتسيا, رەابيليتاتسيا, كارديولوگيا, كارديوحيرۋرگيا, ۋرولوگيا, گينەكولوگيا, ۇرىقتى قورعاۋ ورتالىعى سىندى بولىمشەلەر جۇمىس ىستەيدى. جوعارى تەحنولوگيالى وپەراتسيالار جاساۋعا مۇمكىندىك بەرەتىن زاماناۋي وپەراتسيالىق بلوكتار, ەندوسكوپيالىق جانە لاپاروسكوپيالىق جابدىقتار, سوڭعى ۇلگىدەگى كت جانە ۋلترادىبىستىق دياگنوستيكالىق اپپاراتتار ورناتىلعان. لابوراتوريالىق بازا تولىق اۆتوماتتاندىرىلعان, ناتيجەلەر ەلەكتروندى جۇيە ارقىلى تىركەلەدى. بۇل – مەديتسينالىق قىزمەت ساپاسىن ارتتىرىپ, دارىگەر مەن پاتسيەنت اراسىنداعى بايلانىستى جەڭىلدەتۋگە سەپتىگىن تيگىزدى, – دەيدى الماتى كوپسالالى كلينيكالىق اۋرۋحاناسىنىڭ ديرەكتورى مايرا الىمبەتوۆا.
اۋرۋحانادا 900-گە جۋىق قىزمەتكەر جۇمىس ىستەيدى. ونىڭ ىشىندە 215-ءى دارىگەر جانە 500-دەن استام كىشى جانە ورتا بۋىن مەديتسينا ماماندارى. مەديتسينالىق قۇرامنىڭ باسىم بولىگى – تاجىريبەلى, جوعارى ساناتتى دارىگەرلەر. ولاردىڭ اراسىندا مەديتسينا عىلىمدارىنىڭ دوكتورى, ماگيسترلەر مەن حالىقارالىق تاعىلىمدامادان وتكەن ماماندار بار. كادر ساياساتىنىڭ نەگىزگى باعىتى – ۇزدىكسىز ءبىلىم الۋ جانە كاسىبي ءوسۋ. دارىگەرلەر مەن مەيىرگەرلەر وتاندىق جانە شەتەلدىك وقۋ ورتالىقتارىندا بىلىكتىلىگىن ارتتىرىپ, حالىقارالىق ستاندارتتارعا سايكەس تاجىريبە جيناقتاپ وتىر. اۋرۋحانا ىشىندەگى ترەنينگتەر, شەبەرلىك سىنىپتارى مەن تاجىريبەلىك سەمينارلار مامانداردىڭ كاسىبي دايىندىعىن كۇشەيتۋگە سەپتەسەدى.
باس دارىگەردىڭ سوزىنشە بيىلعى جىلى ەمدەۋ مەكەمەسىندە بىرقاتار جاڭا جوبا جۇزەگە اسىرىلىپ, قىزمەت كورسەتۋ دەڭگەيى جاڭا ساتىعا كوتەرىلگەن. اتاپ ايتساق, حيرۋرگيالىق باعىتتا جوعارى تەحنولوگيالىق وپەراتسيالار جولعا قويىلىپ, ورتوپەديا جانە تراۆماتولوگيا بولىمشەسىندە جامباس پەن تىزە بۋىندارىن ەندوپروتەزدەۋ وپەراتسيالارى جۇيەلى تۇردە جۇرگىزىلىپ وتىر. وپەراتسيالار مىندەتتى الەۋمەتتىك مەديتسينالىق ساقتاندىرۋ جۇيەسى ء(مامس) اياسىندا تەگىن جاسالىپ, كوپتەگەن ناۋقاسقا قايتا ءجۇرۋ مۇمكىندىگىن سىيلاعان.
سونداي-اق جۇرەك-قان تامىرلارى ورتالىعى جاڭارتىلعان. جاڭا انگيوگرافيالىق كەشەن ىسكە قوسىلىپ, جەدەل ينفاركت كەزىندە ستەنت قويۋ, كارديوحيرۋرگيالىق ارالاسۋلار جاساۋ مۇمكىندىگى ارتقاندىعى اتالدى. دياگنوستيكالىق قىزمەت كەڭەيتىلىپ, زەرتحانالىق بازانىڭ جاڭارتىلۋى, بيوحيميالىق جانە گەنەتيكالىق زەرتتەۋلەردىڭ جاڭا تۇرلەرىنىڭ ەنگىزىلۋى مەديتسينالىق قىزمەتتىڭ قولجەتىمدىلىن ارتتىرا تۇسكەن. وڭالتۋ ورتالىعىندا ينسۋلت, جاراقات جانە وپەراتسيادان كەيىنگى ناۋقاستارعا ارنالعان قالپىنا كەلتىرۋ باعدارلامالارى جاڭارتىلعان. سونداي-اق الەۋمەتتىك جوبالار ۇزدىكسىز جۇزەگە اسىرىلۋدا. اۋرۋحانا بازاسىندا «دەنساۋلىق فەستيۆالى», «اشىق ەسىك كۇندەرى», «جۇرەك ايلىعى», باسقا دا اكتسيالار ۇيىمداستىرىلىپ, ناتيجەسىندە مىڭداعان تۇرعىن تەگىن كەڭەس پەن تەكسەرۋدەن وتكەن.
زاماناۋي جەتىستىكتەرگە قاراماستان, اۋرۋحانا الدىندا شەشىمىن كۇتكەن ماسەلەلەر دە جوق ەمەس. قازىرگى باستى پروبلەما – ورىن تاپشىلىعى. حالىق سانىنىڭ ارتۋى مەن قالا ماڭى تۇرعىندارىنىڭ اۋرۋحاناعا ءجيى جۇگىنۋى سالدارىنان جوسپارلى ەمدەلۋشىلەر ءۇشىن ورىن ازدىعى ايقىن كورىنىس تابۋدا. وعان مىسال, ەمدەۋ مەكەمەسىنە جىلىنا شامامەن 40 مىڭعا جۋىق ناۋقاس كەلسە, تاۋلىگىنە 150-گە جۋىق ادامعا قىزمەت كورسەتىلەدى ەكەن. ناۋقاستار سانىنىڭ كوپتىگى كەيدە اۋرۋحانانىڭ ناقتى قۋاتىنان اسىپ تۇسەدى. ونىڭ قيىندىعىن دارىگەرلەرمەن قاتار, ەمدەلۋشىلەر دە كورىپ وتىر.
«بۇيرەك قىزمەتىنىڭ بۇزىلۋىنان دەنساۋلىعىم ناشارلاپ جەدەل جاردەممەن كەلىپ ءتۇستىم. تەراپيا بولىمىندە ناۋقاستىڭ كوپتىگىنەن العاشىندا ورىن بولمادى. 4 ورىندىق پالاتاعا 5 توسەك قويىپ, ناۋقاستاردىڭ اۋرۋىنان اجىراۋىنا تىك تۇرىپ قىزمەت كورسەتكەن تەراپيا ءبولىمىنىڭ مەڭگەرۋشىسى نازىم جاقىپباەۆا باستاعان اق جەلەڭدى ابزال جاندارعا العىسىم شەكسىز. وسىنداي كوپسالالى اۋرۋحانانىڭ توسەك ورىنىن كوبەيتسە ءجون بولار ەدى», – دەيدى ەمدەلۋشى, كەگەن اۋدانىنىڭ قۇرمەتتى ازاماتى الىكەن قاپالباەۆ.
وسى كۇنى شەكتەن تىس جۇكتەمە مەن كادر تاپشىلىعى دا ءتۇيىندى ماسەلەگە اينالىپ وتىرعانىن جاسىرۋعا بولماس. ماماندار جەتكىلىكتى بولعانىمەن, جۇمىس كولەمى وتە جوعارى. ءبىر دارىگەر كۇنىنە ونداعان ناۋقاس قابىلدايدى. بۇل فيزيكالىق جانە پسيحولوگيالىق تۇرعىدا ۇلكەن جۇكتەمە. اۋرۋحانا اكىمشىلىگى بۇل باعىتتا ناقتى جوسپارلار جاساپ, جاڭا ينۆەستيتسيالار مەن سەرىكتەستىك جوبالاردى قاراستىرىپ وتىر. بيىلعى جىل ەلىمىزدە «جۇمىسشى ماماندىقتارى جىلى» دەپ جاريالانعانى بەلگىلى. بۇل باستاما مەديتسينالىق سالا قىزمەتكەرلەرىنە دە ەرەكشە سەرپىن بەرگەن.
سايىپ كەلگەندە الماتى كوپسالالى كلينيكالىق اۋرۋحاناسى – ساپالى مەديتسينالىق كومەك پەن ادامي كاپيتالدىڭ ۇيلەسىمىن كورسەتەتىن ۇلگىلى مەكەمە. مۇندا كاسىبي شەبەرلىك پەن جاڭاشىلدىق قاتار ءوربىپ, باستى قۇندىلىق – ادام ءومىرى مەن دەنساۋلىعىنا قالتقىسىز قىزمەت كورسەتۋدە تاباندىلىق تانىتىپ كەلەدى. قيىندىقتارعا قاراماستان, ۇجىم حالىق سەنىمىن اقتاپ, جاڭا بيىكتەرگە ۇمتىلۋدا. الداعى ۋاقىتتا اۋرۋحانا توسەك قورىن ۇلعايتىپ, دياگنوستيكالىق جانە حيرۋرگيالىق قىزمەتتى كەڭەيتىپ, تسيفرلىق دەنساۋلىق ساقتاۋ جۇيەسىن ودان ءارى جەتىلدىرۋدى كوزدەپ وتىر.
الماتى وبلىسى