بۇدان تۋرا 25 جىل بۇرىن, 1990 جىلعى 20 ناۋرىز كۇنى اتى الەمگە ءماشھۇر كەڭەس فۋتبولشىسى, داڭقتى قاقپاشى لەۆ ياشين قايتىس بولدى. ول – وليمپيالىق ويىنداردىڭ جانە ەۋروپانىڭ چەمپيونى, كسرو-نىڭ بەس دۇركىن چەمپيونى, XX عاسىردىڭ ەڭ ۇزدىك قاقپاشىسى جانە «التىن دوپ» جۇلدەسىنە قول جەتكىزگەن جالعىز گولكيپەر.
ايگىلى داربازاشى ءوزىنىڭ سپورتتىق جولىن 1949 جىلى ماسكەۋدىڭ «دينامو» كومانداسىنىڭ قاقپاسىن قورعاۋدان باستادى. ول 1950-1953 جىلدارى سونىمەن قاتار ديناموشىلاردىڭ حوككەي جاساعى ساپىندا دا وينادى. وندا دا قاقپانى قورعادى. ياشين سپورتتىڭ وسى ءتۇرى بويىنشا 1953 جىلى ءتىپتى كسرو كۋبوگىن جەڭىپ الىپ, وداق چەمپيوناتىنىڭ قولا جۇلدەگەرى بولدى. ال 1954 جىلدىڭ باسىندا حوككەيدەن كسرو قۇراماسى ساپىنا دا شاقىرىلدى. بىراق وسى تۇستا ءوزىنىڭ كۇش-جىگەرىن ەندى ءبىر عانا سپورت تۇرىنە – فۋتبولعا اۋدارۋ جونىندە شەشىمگە كەلگەن سپورتشى ودان باس تارتتى. سودان باستاپ تەك فۋتبولمەن اينالىسقان لەۆ ياشين 1971 جىلى قولعابىن شەگەگە ىلگەنگە دەيىن جوعارىدا ايتىلعان اتاق-داڭقتارىنىڭ بارىنە وسى ارالىقتا قول جەتكىزدى.
اتاقتى قاقپاشى «دينامو» ساپىندا بەس رەت (1954, 1955, 1957, 1959 جانە 1963 جىلدار) كسرو چەمپيونى بولدى جانە ءۇش رەت كسرو كۋبوگىن جەڭىپ الدى. 1954 جىلى فۋتبولدان كسرو قۇراماسىنا دا شاقىرىلعان ول وندا جالپى سانى 78 ويىن وتكىزدى. ياشين قۇرامامەن بىرگە 1956 جىلى مەلبۋرندا وتكەن وليمپيادانىڭ, سوسىن 1960 جىلى ەۋروپانىڭ التىن مەدالىن جەڭىپ الدى.
لەۆ ياشين ءوزىنىڭ «قاقپاشىنىڭ جازبالارى» (1976 جىل) دەگەن كىتابىندا: «سپورتتىڭ داڭقى مەنى اينالىپ ءوتتى دەپ شاعىم جاساي المايمىن. جانە مەن تۋرالى از دا جازىلعان جوق. بىراق مەنىڭ ەنشىمە «قۇس-ادام» نەمەسە «جولبارىس-ادام» دەگەن سەكىلدى تەڭەۋلەر تيگەن ەمەس. بۇل دۇرىس تا. مەن قۇبىلىس سانالاتىن ادامدار قاتارىنا جاتپايمىن. ەشقاشان اياقاتىر مەنى اسپانعا قاراي الا تارتقان ەمەس, كەرىسىنشە كەزەكتى دوپتى قاعىپ الۋ ءۇشىن ءاربىر جولى كوككە قاراي سەكىرگەنىمدە, جەردىڭ تارتىلىس كۇشىنىڭ زور ەكەنىن سەزىنۋمەن بولدىم. ەشقاشان دوپتىڭ ءوزى كەلىپ, مەنىڭ قولعابىما جابىسا سالماپتى», - دەپ جازدى.
1963 جىلى لەۆ ياشين اعىلشىن فۋتبولىنىڭ ءجۇز جىلدىعىنا ارنالىپ لوندونداعى «ۋەمبلي» ستاديونىندا وتكىزىلگەن ماتچتا الەم قۇراماسى ءۇشىن وينادى. سول كەزدەسۋگە قاتىسقان فرانتسۋز فۋتبولشىسى جانە شابۋىلشىسى رايمون كوپا كەيىن بىلاي دەپ جازدى: «لەۆ, شاماسى, الەم قۇراماسىنىڭ جاتتىعۋىندا بارلىق كۇشىڭدى سارقا جۇمساۋدىڭ قاجەت ەمەس ەكەنىن, ونىڭ شوۋ تۇرىندە وتەتىنىن سەزىنبەگەن سياقتى. الدە وداقتا وعان نامىستى قولدان بەرمەۋ تاپسىرىلعان, الدە ونىڭ ءوزى سونداي بولۋى كەرەك. ويىننىڭ ءوزى تۋرالى نە ايتۋعا بولادى – ول ءۇشىن باستى ماسەلە قالاي بولعاندا دا دوپ جىبەرمەۋ بولدى جانە ول سوعان قول دا جەتكىزدى».
1971 جىلعى 27 مامىر كۇنى ماسكەۋدەگى «لۋجنيكي» ستاديونىندا 103 مىڭ ادامنىڭ قاتىسۋىمەن لەۆ ءياشيننىڭ فۋتبولمەن قوشتاسۋ ماتچى وينالدى. بۇل كەزدەسۋدە ماسكەۋ, كيەۆ, تبيليسي قالالارىنىڭ «دينامو» كلۋبىنىڭ ويىنشىلارىنان قۇرالعان سپورت قوعامىنىڭ تاڭداۋلى ۇجىمى الەم قۇراماسىمەن كۇش سىناستى. جاھان جاساعى قاتارىندا ەيسەبيو, بوببي چارلتون, گەرد ميۋللەر سەكىلدى جۇلدىزدار الاڭعا شىقتى. ياشين كەزدەسۋ بارىسىندا الاڭنان كەتىپ بارا جاتىپ, ءوزىنىڭ قولعابىن 23 جاسار كوماندالاسى ۆلاديمير پيلگۋيگە تاپسىردى. كەزدەسۋ 2:2 دەگەن سيمۆولدىق ەسەپپەن اياقتالدى.
لەۆ ياشين – كوپتەگەن عاجايىپ رەكوردتاردىڭ يەگەرى. ول 22 ماۋسىم بويى (1949-1970 جج.) تەك ءبىر عانا كوماندانىڭ – ماسكەۋدىڭ «ديناموسىنىڭ» نامىسىن قورعادى. ياشين ءتىپتى وداق قۇراماسى قۇرامىندا الاڭعا شىققانىندا كەۋدەسىندە «د» دەگەن جازۋى بار جەيدە كيىپ شىعىپ تۇردى. ول كەڭەس گولكيپەرلەرى اراسىنان ءجۇز ويىندا بىردە-ءبىر گول جىبەرمەگەن ءبىرىنشى قاقپاشى بولدى.