رەسمي دەرەكتەردى باسشىلىققا الساق, جىل سايىن ەلىمىزدە جەدەل رەسپيراتورلىق ۆيرۋستىق ينفەكتسيامەن (جرۆي) 3-4 ملن ادام, تۇماۋمەن 2 مىڭ ادام اۋىرادى ەكەن. بيىل ەپيدەميولوگيالىق ماۋسىم باستالعالى ەلدە جرۆي-ءدىڭ 1,5 ملن جاعدايى تىركەلگەن. جالپى, ەلىمىزدىڭ كەيبىر ايماقتارىندا ۆيرۋستىق ينفەكتسيالار كۇشەيدى دەگەنمەن, وتكەن جىلدىڭ سايكەس كەزەڭىمەن سالىستىرعاندا كورسەتكىش 20%-عا تومەن دەسەدى.
جالپى, جرۆي-مەن اۋىراتىنداردىڭ 66%-ى – بالالار, 34%-ى – ەرەسەكتەر. كەيىنگى اپتادا ەلدە جرۆي-ءدىڭ 183 مىڭ جاعدايى تىركەلگەن. اپتا ىشىندە وقۋشىلار اراسىندا جرۆي-ءدىڭ 6 مىڭنان استام جاعدايى جانە تۇماۋدىڭ 13 جاعدايى انىقتالىپتى.
قازىر الەۋمەتتىك جەلىلەردە گونكونگ دەپ اتالاتىن ۆيرۋس تۋرالى جالعان-شىنى ارالاس اقپاراتتار جىلدام تاراپ جاتىر. سالدارىنان حالىق اراسىندا تۇماۋدىڭ جاڭا ەرەكشە شتاممى پايدا بولدى دەگەن تۇسىنىك قالىپتاسقانى بايقالادى. شىن مانىندە گونكونگ تۇماۋى ۆيرۋستىڭ جاقىندا پايدا بولعان ءتۇرى مە, الدە بۇرىننان بار ما؟ بۇل جونىندە دەنساۋلىق ساقتاۋ ءبىرىنشى ۆيتسە-ءمينيسترى تيمۋر سۇلتانعازيەۆ ءباسپاسوز ءماسليحاتىندا رەسمي مالىمدەمە جاسادى.
– جالعان اقپارتتاردىڭ تارالۋىنا بايلانىستى رەسمي تۇسىنىكتەمە بەرگىم كەلەدى. شىن مانىندە گونكونگ دەپ اتالاتىن ا (H3N2) تۇماۋى جاڭا ۆيرۋس ءتۇرى ەمەس. ول العاش رەت 1968 جىلى انىقتالدى. سول كەزدەن باستاپ ول الەم بويىنشا ۇنەمى اينالىمدا بولدى. قازاقستان رەسپۋبليكاسىنىڭ اۋماعىندا دا بۇل ۆيرۋس كوپ جىل بويى بار. ونى مەرزىمدى تىركەۋ ماۋسىمدىق ەپيدەميولوگيالىق پروتسەستىڭ ءبىر بولىگى سانالادى, – دەپ ءتۇسىندىردى سپيكەر.
ەپيدەميولوگيالىق ماۋسىم باستالعالى بەرى ەلدە تۇماۋدىڭ 590 جاعدايى زەرتحانالىق تۇرعىدان راستالعان. سونداي-اق ا ءتيپتى تۇماۋدىڭ 587 جاعدايى تىركەلدى. دەنساۋلىق ساقتاۋ ءبىرىنشى ۆيتسە-ءمينيسترىنىڭ ايتۋىنشا, اعىمداعى جىلى تۇماۋ اينالىمى قازان ايىنىڭ ءبىرىنشى جارتىسىندا باستالعان. بۇل بىلتىرعى ەپيدەميولوگيالىق ماۋسىمنان ءسال ەرتەرەك ەكەنىن بايقايمىز.
بۇگىندە دەنساۋلىق ساقتاۋ مينيسترلىگى تۇماۋعا قاتىسى جوق ۆيرۋستاردىڭ دا اينالىمىنا مونيتورينگ جۇرگىزىپ جاتىر ەكەن. ناتيجەسىندە ەل بويىنشا 3 مىڭنان استام ۇلگى زەرتتەلگەن. ناتيجەسىندە ءتۇرلى ۆيرۋستىڭ, سونىڭ ىشىندە رينوۆيرۋس, پاروگريپپ, ادەنوۆيرۋس, بوكوۆيرۋس, كوروناۆيرۋس, رس ۆيرۋسىنىڭ اينالىمى انىقتالعان. ياعني, رەسمي اقپاراتقا سەنسەك, بيىل ەل اۋماعىندا بۇرىن اينالىمدا بولماعان تۇماۋدىڭ جاڭا تۇرلەرى انىقتالعان جوق.