پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا ۇكىمەتتىڭ ۇلتتىق بانكپەن جانە قارجى نارىعىن رەتتەۋ جانە دامىتۋ اگەنتتىگىمەن 2026-2028 جىلدارعا ارنالعان ماكروەكونوميكالىق تۇراقتاندىرۋ جانە حالىقتىڭ ءال-اۋقاتىن ارتتىرۋ جونىندەگى بىرلەسكەن ءىس-قيمىل باعدارلاماسى بەكىتىلدى. قۇجات پرەزيدەنتتىڭ تۇراقتى ەكونوميكالىق ءوسۋدى قامتاماسىز ەتۋ, ينفلياتسيانى تومەندەتۋ, يمپورتقا تاۋەلدىلىكتى ازايتۋ جانە ازاماتتاردىڭ تابىسىن ارتتىرۋ جونىندەگى تاپسىرمالارىن ورىنداۋعا باعىتتالعان, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
«مەملەكەت باسشىسى قازاقستان حالقىنا جولداۋىندا ۇكىمەتكە ۇلتتىق بانكپەن, قارجى نارىعىن رەتتەۋ جانە دامىتۋ اگەنتتىگىمەن بىرگە بىرلەسكەن ءىس-قيمىل باعدارلاماسىن ازىرلەۋدى تاپسىردى. ۇكىمەتتىڭ, ۇلتتىق بانكتىڭ جانە قارجى نارىعىن رەتتەۋ اگەنتتىگىنىڭ بىرلەسكەن ءىس-قيمىل باعدارلاماسى ەلىمىزدىڭ الداعى ءۇش جىلعا ارنالعان الەۋمەتتىك-ەكونوميكالىق دامۋىنىڭ نەگىزگى مىندەتتەرىن شەشۋگە باعىتتالعان», دەپ اتاپ ءوتتى ولجاس بەكتەنوۆ.
پرەمەر-ءمينيستردىڭ ورىنباسارى سەرىك جۇمانعارين بىرقاتار نەگىزگى باعىت بويىنشا ەلىمىزدىڭ الەۋمەتتىك-ەكونوميكالىق دامۋى جونىندەگى شارالار كەشەنىن قامتيتىن باعدارلامانىڭ نەگىزگى تاسىلدەرى تۋرالى باياندادى. ولاردىڭ قاتارىندا حالىقتىڭ تابىسىن قولداۋ, ساپالى ءوسۋدى قامتاماسىز ەتۋ, شيكىزاتتىق ەمەس ەكسپورتتى ىنتالاندىرۋ, ەكونوميكانى تسيفرلاندىرۋ جانە جي دامىتۋ, ينۆەستيتسيالىق جانە تاريفتىك ساياساتتى جەتىلدىرۋ, ينفلياتسيا مەن ەكونوميكاداعى مەملەكەتتىڭ ۇلەسىن ازايتۋ شارالارى بار. سونىمەن قاتار باعدارلاما اقشا-نەسيە ساياساتى,قارجى سەكتورىن دامىتۋ جانە باعانى رەتتەۋ بويىنشا بلوكتاردى قامتيدى.
ۇلتتىق بانك توراعاسى تيمۋر سۇلەيمەنوۆ باعا تۇراقتىلىعىن قامتاماسىز ەتۋ جانە قارجى سەكتورىن دامىتۋ بويىنشا مونەتارلىق, ميكرو جانە ماكروپرۋدەنتسيالدى شارالار پاكەتىن ۇسىندى. قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا بيزنەسكە نەسيە بەرۋدى كەڭەيتۋ, تۇتىنۋشىلىق نەسيەلەۋ سەگمەنتىندەگى تاۋەكەلدەردى تومەندەتۋ, كاسىپكەرلەردى قولداۋ ءۇشىن رەتتەۋ تاسىلدەرىن جەتىلدىرۋ جونىندەگى قادامدار تۋرالى باياندادى.
پرەمەر-مينيستر باعدارلامانى ەكونوميكانىڭ ساپالى ءارى ورنىقتى ءوسۋى مەن ينفلياتسيانى تومەندەتۋ ەسەبىنەن جۇزەگە اسىرۋ ازاماتتاردىڭ تۇرمىس دەڭگەيى مەن ءال-اۋقاتىن ارتتىرۋدىڭ نەگىزگى قۇرالى بولاتىنىن اتاپ ءوتتى.
نەگىزگى ماقساتتار – ەكونوميكانىڭ جىل سايىنعى ءوسىمىن كەمىندە 5%-عا جانە حالىقتىڭ ناقتى تابىسىن ورتا ەسەپپەن 2-3%-عا ارتتىرۋ. جاڭا ينۆەستيتسيالىق تسيكلدى ىسكە قوسۋ, بيزنەس جۇرگىزۋ ءۇشىن كەدەرگىلەردى جويۋ جانە مەملەكەتتىڭ ەكونوميكاداعى ۇلەسىن بارىنشا ازايتۋ, سونداي-اق جۇمىسپەن قامتۋعا جاردەمدەسۋ جانە الەۋمەتتىك قولداۋدى ناقتى يەسىنە جەتكىزۋگە مۇمكىندىك بەرەتىن جاڭا شارالاردى جۇزەگە اسىرۋ كوزدەلىپ وتىر. ينفلياتسيانى تومەندەتۋگە, تەڭگەرىمدى تاريفتىك ساياساتتى جۇرگىزۋگە, ەكسپورتتى ۇلعايتۋعا جانە يمپورتقا تاۋەلدىلىكتى ازايتۋعا باسا نازار اۋدارىلادى.
پرەمەر-مينيستر ولجاس بەكتەنوۆ ەكونوميكانى ورنىقتى دامىتۋ ءۇشىن بارلىق جاۋاپتى مەملەكەتتىك ورگاندار ۇيلەسىمدى جۇمىس ىستەگەندە عانا مۇمكىن بولاتىنىن ەسكەرە وتىرىپ, جاۋاپتى ۆەدومستۆولارعا بىرقاتار تاپسىرما بەردى.
ۇلتتىق ەكونوميكا, اۋىل شارۋاشىلىعى جانە ساۋدا مينيسترلىكتەرى ينفلياتسيا دەڭگەيىن باقىلاۋ مەن تومەندەتۋ, سونداي-اق باعانىڭ وسۋىنە سىرتقى فاكتورلاردىڭ اسەرىن بارىنشا ازايتۋ جۇمىستارىن كۇشەيتۋ تاپسىرىلدى.
جانار-جاعارماي ماتەريالدارىنىڭ باعاسىن كوتەرۋگە ەنگىزىلگەن ءموراتوريدى ەسكەرەتىن بولساق, كورشىلەس ەلدەرمەن اراداعى باعا ديسپاريتەتى كۇشەيىپ كەلەدى. قاراپايىم تىلمەن ايتقاندا, ءبىزدىڭ بەنزين مەن ديزەل كورشىلەرگە قاراعاندا الدەقايدا ارزان. سوندىقتان ەنەرگەتيكا, ساۋدا, قارجى, ىشكى ىستەر مينيسترلىكتەرى مەن قارجىلىق مونيتورينگ اگەنتتىگى جانە ۇلتتىق قاۋىپسىزدىك كوميتەتىنىڭ شەكارا قىزمەتى وتىن بالانسىنا جانە مۇناي ونىمدەرىنىڭ باسقا ەلدەرگە زاڭسىز ءوتىپ كەتۋىنە جول بەرمەۋ ماسەلەسىنە قاتاڭ باقىلاۋدى قامتاماسىز ەتۋى قاجەت.
اۋىل شارۋاشىلىعى, ساۋدا جانە ونەركاسىپ مينيسترلىكتەرىنە ىشكى نارىقتىڭ وتاندىق ونىممەن قامتاماسىز ەتىلۋىن ارتتىرۋى ءتيىس. تۇراقتاندىرۋ قورلارىن, فورۆاردتىق شارتتاردى, ءونىم باعاسىن ارزانداتۋعا بەرىلەتىن سۋبسيديالاردى جانە ساۋدا جەلىلەرىمەن كەلىسىمدەردى بەلسەندى پايدالانۋ ارقىلى ازىق-ت ۇلىك باعاسىن تۇراقتاندىرۋ, اسىرەسە بۇگىندە يمپورتقا تاۋەلدىلىگى جوعارى ونىمدەر ءوندىرىسىن ۇلعايتۋعا باسىمدىق بەرىلۋى كەرەك. ساۋدا مينيسترلىگى ءوڭىر اكىمدەرىمەن بىرلەسىپ, دەلدالدىق سحەمالاردى انىقتاۋ جۇمىسىن كۇشەيتۋى قاجەت.
ينۆەستيتسيالىق جوبالاردى ىسكە اسىرۋعا جانە اوك-دە تەرەڭ وڭدەلگەن ونىمدەردى وندىرۋگە ەرەكشە نازار اۋدارىلۋى ءتيىس.
ساۋدا, اۋىل شارۋاشىلىعى, ونەركاسىپ مينيسترلىكتەرىنە مۇددەلى مەملەكەتتىك ورگاندارمەن بىرلەسىپ, شيكىزاتتىق ەمەس ونىمدەردى ەكسپورتتاۋشىلاردى ىنتالاندىرۋدىڭ كەشەندى شارالارىن ازىرلەۋ تاپسىرىلدى.
سونىمەن قاتار ناقتى سەكتورىن نەسيەلەندىرۋگە تارتۋ ارقىلى باسىم ينۆەستيتسيالىق جوبالاردى جۇزەگە اسىرۋدى جەدەلدەتۋ, دامۋ ينستيتۋتتارىنىڭ, ونىڭ ىشىندە «بايتەرەك» حولدينگى مەن Kazakh Invest ءرولىن ارتتىرۋ, ىسكە اسىرىلىپ جاتقان شارالاردى اقپاراتتىق قامتاماسىز ەتۋ بويىنشا تاپسىرما بەرىلدى.
ۇلتتىق ەكونوميكا مينيسترلىگى ەكونوميكالىق ساياسات جونىندەگى كەڭەستىڭ وتىرىستارىندا قاراپ, جۇرتشىلىقتى حاباردار ەتىپ وتىرۋى كەرەك. باعدارلاماداعى ءىس-شارالاردىڭ ورىندالۋ بارىسىنا مونيتورينگ جۇرگىزۋ تاپسىرىلدى.
پرەمەر-مينيستر بارلىق ءبىرىنشى باسشىعا باعدارلامانى ساپالى ءارى ۋاقتىلى جۇزەگە اسىرۋدى قامتاماسىز ەتۋ قاجەتتىگىن اتاپ ءوتتى.
پرەمەر-ءمينيستردىڭ ورىنباسارلارىنا ءوز باعىتتارى بويىنشا باعدارلاماداعى ءىس-شارالاردىڭ ورىندالۋىنا باقىلاۋدى قامتاماسىز ەتۋ تاپسىرىلدى.