جاساندى ينتەللەكت جانە تسيفرلىق دامۋ مينيسترلىگىنە قاراستى تسيفرلىق ۇكىمەتتى قولداۋ ورتالىعى IT-ارحيتەكتورلار اكادەمياسىنىڭ اشىلعانىن ءمالىم قىلدى, دەپ حابارلايدى Egemen.kz اتالعان مينيسترلىكتىڭ ءباسپاسوز قىزمەتىنە سىلتەمە جاساپ.
بۇل جاڭا ءبىلىم بەرۋ باستاماسى مەملەكەتتىك جانە كورپوراتيۆتىك دەڭگەيدەگى تسيفرلىق شەشىمدەردىڭ ارحيتەكتۋرالىق ساپاسىن ارتتىرۋعا باعىتتالعان.
جەدەل تسيفرلاندىرۋ مەن جاساندى ينتەللەكتتى كەڭىنەن ەنگىزۋ جاعدايىندا نەگىزگى كۇردەلى ماسەلەلەردىڭ ءبىرى – IT-جۇيەلەردىڭ بىتىراڭقىلىعى مەن ولاردىڭ قايتالانۋى بولىپ قالىپ وتىر. بۇگىندە مەملەكەتتىك تسيفرلىق سەرۆيستەردىڭ ىڭعايلى, ءوزارا ىقپالداسقان جانە اۋقىمدالاتىن بولۋى اسا ماڭىزدى. مۇنداي شەشىمدەر دايىن مودۋلدەردى قايتا پايدالانۋ, تەحنولوگيالىق ۇيلەسىمدىلىك جانە بىرىڭعاي ارحيتەكتۋرا قاعيداتتارىنا سۇيەنۋى ءتيىس.
IT-ارحيتەكتورلار اكادەمياسى مامانداردى IT جۇيەلەرىن يدەيادان باستاپ ىسكە قوسۋ مەن جاساندى ينتەللەكتىنى ينتەگراتسيالاۋعا دەيىن تۇتاس ەكوجۇيە رەتىندە قاراستىرۋعا ۇيرەتەتىن تاجىريبەگە باعىتتالعان پلاتفورما بولماق. وقۋ باعدارلاماسى تورت نەگىزگى مودۋلدەن تۇرادى:
- بيزنەس-پروتسەستەردى قايتا قۇرۋ (رەينجينيرينگ);
- IT-ارحيتەكتۋرانى جوبالاۋ;
- جاساندى ينتەللەكت: نولدەن پروتوتيپكە دەيىن;
- جوبالىق باسقارۋ تاسىلدەرى ارقىلى جوبالاردى ءتيىمدى ىسكە اسىرۋ جانە بيزنەس-ناتيجەلەرگە قول جەتكىزۋ.
باعدارلاما بيىل جەلتوقسان ايىندا باستالادى. العاشقى توپ تىڭداۋشىلارى ءۇشىن وقۋ اقىسىز. وتىنىمدەر 2025 جىلعى 20 قاراشا مەن 15 جەلتوقسان ارالىعىندا govtec.kz سايتىندا قابىلدانادى.
«IT-ارحيتەكتورلار اكادەمياسىنىڭ قۇرىلۋى – تسيفرلىق شەشىمدەردىڭ ساپاسىن ارتتىرۋعا جاسالعان ماڭىزدى ينۆەستيتسيا. ءبىز ازاماتتاردىڭ قاجەتتىلىكتەرىنە نەگىزدەلگەن, بىرىڭعاي ارحيتەكتۋرا تالاپتارىنا ساي كەلەتىن سەرۆيستەردى جوبالاي الاتىن جاڭا بۋىن ماماندارىن دايارلايمىز. بۇگىندە تسيفرلىق ترانسفورماتسيا تەك تەحنولوگيالارمەن ەمەس, جۇيەلى ويلاۋ مەن كليەنتكە باعدارلانعان مادەنيەتپەن ولشەنەدى», دەدى تسيفرلىق ۇكىمەتتى قولداۋ ورتالىعىنىڭ باس ديرەكتورى باحتيار مۇحامەتقاليەۆ.
2025 جىلدىڭ تامىز ايىندا تسيفرلىق ۇكىمەتتى قولداۋ ورتاسىنىڭ باستاماسىمەن بارلىق ورتالىق مەملەكەتتىك ورگانداردى, جەرگىلىكتى اتقارۋشى ورگانداردى, سونداي-اق «سامۇرىق-قازىنا» جانە «بايتەرەك» سياقتى كۆازيمەملەكەتتىك سەكتور ۇيىمدارىن قامتيتىن ارحيتەكتۋرالىق كەڭەس قۇرىلدى.
ايتا كەتەلىك, تسيفرلىق ۇكىمەتتى قولداۋ ورتالىعى (تسۇقو) – قازاقستانداعى تسيفرلىق ارحيتەكتۋرانى قالىپتاستىراتىن, كەڭ اۋقىمدى جاساندى ينتەللەكت جوبالارىن جۇزەگە اسىراتىن تالدامالىق جانە جوبالىق ورتالىق. پرەمەر-مينيستر توراعالىق ەتەتىن تسيفرلىق شتابتىڭ جۇمىس ورگانى بولىپ تابىلادى.