لەيپتسيگ (گەرمانيا) قالاسىندا سوڭعى جيىرما جىلدا العاش رەت يوگانن سەباستيان باحتىڭ بۇرىن بەيمالىم ەكى شىعارماسى تابىلىپ, «مۋزىكالىق سەنساتسيا» رەتىندە اتالىپ جاتىر, دەپ جازادى Egemen.kz.
BILD باسىلىمىنىڭ حابارلاۋىنشا, لەيپتسيگتەگى باح مۇراعاتىنىڭ ماماندارى ەكى ورگاندىق پەسانى كومپوزيتوردىڭ ەرتە كەزەڭدەگى تۋىندىلارى دەپ راستاپ وتىر. بۇل تۋرالى مۇراعات ديرەكتورى پەتەر ۆوللني مالىمدەدى.
شىعارمالار العاش رەت باح ومىردەن وتكەن 275 جىلدان كەيىن شىرقالدى. ولاردى مۋزىكانت ۇزاق جىل ەڭبەك ەتكەن لەيپتسيگتەگى اۋليە فوما شىركەۋىندە شەبەرلەر ورىندادى. پرەمەرانى الەمنىڭ تۇكپىر-تۇكپىرىندەگى مىڭداعان تىڭدارمان تىكەلەي ەفيردەن تاماشالاعان. گەرمانيانىڭ مادەنيەت ءمينيسترى ۆولفرام ۆايمەر بۇل جاڭالىقتى «مۋزىكا الەمى ءۇشىن جۇلدىزدى ءسات جانە جاھاندىق سەنساتسيا» دەپ باعالادى.
رۋكوپيستەر العاش رەت 1990-جىلدارى تابىلعانىمەن, ولاردىڭ اۆتورلىعى ۇزاق ۋاقىت بويى بەلگىسىز بولىپ كەلگەن. تەك بىلتىر پەتەر ۆوللني ولاردى باحتىڭ از تانىمال شاكىرتى سالومون گيۋنتەر يوننىڭ كوشىرگەنىن انىقتاپ, تۋىندىلاردى كومپوزيتوردىڭ ارنشتادتتاعى ەرتە كەزەڭىمەن بايلانىستىردى. ءدال وسى جەردە 18 جاستاعى باح ورگانيست بولىپ قىزمەت اتقارعان.