مۇحتار اۋەزوۆ اتىنداعى قازاق ۇلتتىق دراما تەاترى ءجۇزىنشى مەرەيتويلىق ماۋسىمىن اشتى. مەرەيتويعا وراي «عاسىرعا باسقان قادام» اتتى سالتاناتتى تەاترلاندىرىلعان قويىلىم قويىلدى, دەپ جازادى Egemen.kz.
تەاتر ۇجىمىن مادەنيەت جانە اقپارات ءمينيسترى ايدا بالاەۆا قۇتتىقتادى. ءمينيستردىڭ قۇتتىقتاۋ ءسوزىن مادەنيەت كوميتەتىنىڭ توراعاسى ەرلان داكەنوۆ وقىدى.
– تەاتر – حالىقتىڭ رۋحاني قازىناسى, مادەنيەتىمىزدىڭ وزەگى. بۇگىندە ەلىمىزدە تەاتر ونەرىنە دەگەن قىزىعىۋشىلىق ارتىپ, كورەرمەن تالعامى كۇن ساناپ بيىكتەي تۇسۋدە. بۇل ەڭ الدىمەن سىزدەردىڭ قاجىرلى ەڭبەكتەرىڭىز بەن ولشەۋسىز شىعارماشىلىق ىزدەنىستەرىڭىزدىڭ جەمىسى دەپ بىلەمىن. ۇلى مۇحتار اۋەزوۆتىڭ ەسىمىن يەلەنگەن تەاتردىڭ ۇلت رۋحانياتىن دامىتۋدا الاتىن ورنى بيىك. قازاقتىڭ ۇلتتىق تەاتر ونەرىن جوعارى دەڭگەيگە كوتەرىپ, ونى گۇلدەندىرۋ جولىندا اتقارعان قىزمەتتەرىڭىز بەرەكەلى, تابىستى بولسىن. ورەسى بيىك كورەرمەندى تولعاندىراتىن, جان-دۇنيەسىنە رۋحاني بايلىق سىيلايتىن جاڭا تۋىندىلارىڭىز كوپ بولسىن, – دەلىنگەن قۇتتىقتاۋ حاتتا.
كەش بارىسىندا كورەرمەن نازارىنا تەاتر رەپەرتۋارىنداعى تاڭداۋلى قويىلىمداردان ۇزىندىلەر ۇسىنىلدى. كەشتە ۇلتتىق تەاتر ونەرىنىڭ دامۋىنا ەلەۋلى ۇلەس قوسقان بەلگىلى اكتەرلەردىڭ ونەرى ارقىلى وتكەن مەن بۇگىننىڭ كوركەم ساباقتاستىعى كورىنىس تاپتى.
سونىمەن قاتار تەاتر مۋزەيى كەلۋشىلەر نازارىنا «عاسىر جاساعان ۇلت تەاترى» اتتى ينتەراكتيۆتى كورمە ۇسىندى. وندا ەكسپوناتتار مەن ارحيۆ ماتەريالدارى زاماناۋي فورماتتا كورسەتىلدى.
ايتا كەتەيىك, قازاق ونەرىنىڭ قارا شاڭىراعى, كاسىبي تەاتردىڭ شىمىلدىعى 1926 جىلى 13 قاڭتاردا, قىزىلوردا قالاسىندا اشىلدى. باستاپقى قويىلىمدارى ق. كەمەڭگەر ۇلىنىڭ «التىن ساقينا» جانە م. اۋەزوۆتىڭ «ەڭلىك – كەبەك» پەسالارىنان ۇزىندىلەر بولدى. تەاتردىڭ العاشقى قۇرامىندا ي. بايزاقوۆ, ءا. قاشاۋباەۆ, س. قوجامقۇلوۆ, ە. ومىرزاقوۆ, ج. شانين, ق. قۋانىشباەۆ, ق. جانداربەكوۆ, ق. بادىروۆ, ق. مۇڭايتپاسوۆ, ز. اتاباەۆا, ش. الىبەكوۆا, ش. بايزاقوۆا, م. شاموۆا, ج. شانينا ت. ب. ەڭبەك ەتتى.
1928 جىلى تەاتر الماتىعا كوشتى. 1937 جىلى 27 اقپاندا «اكادەميالىق» تەاتر مارتەبەسىن الدى. 1961 جىلى تەاتر جازۋشى, عالىم مۇحتار ومارحان ۇلى اۋەزوۆتىڭ ەسىمىن يەلەندى. ال 2020 جىلدىڭ 20 جەلتوقسانىندا مەملەكەت باسشىسىنىڭ جارلىعىمەن تەاترعا ۇلتتىق مارتەبەسى بەرىلدى.
اۋەزوۆ تەاترىنىڭ ءبىر عاسىرلىق تاريحى – حالىقتىڭ ءۇنى, زاماننىڭ تىنىسى, ۇلتتىڭ رۋحى. قازىرگى تاڭدا تەاتر ءوزىنىڭ مادەني-رۋحاني ميسسياسىن ناقتى ايقىنداعان شىعارماشىلىق ۇجىم رەتىندە ۇلتتىق ونەردى دارىپتەۋ, وتانسۇيگىشتىك پەن ادامگەرشىلىك قۇندىلىقتاردى ناسيحاتتاۋ, جاڭا تۇرپاتتى مادەنيەت جاساۋ جانە الەمدىك مادەني كەڭىستىككە ۇلتتىق ونەرىمىزدى تانىتۋ جولىندا تاباندى ەڭبەك ەتۋدە.