الماتى وبلىسىندا 42 شاقىرىمدىق «ۇزىناعاش – وتار» جولىنىڭ قۇرىلىسى, ماگيسترالدى جاڭارتۋ تولىعىمەن اياقتالدى. ەندى الماتىدان شىمكەنتكە دەيىنگى جول تولىق ءتورت جولاقتى بولدى, دەپ جازادى Egemen.kz.
جولدىڭ اشىلۋ راسىمىندە قوزعالىستى باستاۋ باتىرماسى باسىلىپ, جاڭا جول ارقىلى العاشقى بولىپ 15 كولىكتەن تۇراتىن اۆتوكولوننا سالتاناتپەن ءجۇرىپ ءوتتى.
«بيىل ءبىز ەل بويىنشا 13 مىڭ شاقىرىم جولدا جوندەۋ مەن قايتا جاڭارتۋ جۇمىستارىن جۇرگىزۋ ارقىلى رەكوردتىق ناتيجەگە قول جەتكىزدىك. بۇل – مەملەكەت باسشىسىنىڭ قولداۋى مەن جول سالاسى قىزمەتكەرلەرىنىڭ كۇندەلىكتى اتقارىپ جۇرگەن ەرەن ەڭبەگىنىڭ ارقاسى. ولار ازاماتتار ءۇشىن قاۋىپسىز, ءارى ىڭعايلى جولدار سالىپ, وڭىرلەردىڭ دامۋىنا جاڭا مۇمكىندىكتەر اشىپ جاتىر», دەدى ءىس-شارا بارىسىندا كولىك ۆيتسە-ءمينيسترى ماقسات قالياقپاروۆ.
بۇعان قوسا, جولدى اشۋ سالتاناتىنىڭ اياسىندا جوبانى ىسكە اسىرۋعا ەرەكشە ۇلەس قوسقان جۇمىسشىلار ماراپاتتالدى. ولارعا ۆەدومستۆولىق مەدالدار, العىس حاتتار مەن كولىك مينيسترلىگىنىڭ قۇرمەت گراموتالارى تابىستالدى.
جاڭا اشىلعان «ۇزىناعاش – وتار» كۇرە جولىندا نەگىزگى قۇرىلىس-مونتاج جۇمىستارى وتكەن جىلى باستالىپ, نەبارى ەكى جىلدا تولىق اياقتالدى. جوباعا 163 بىرلىك تەحنيكا, 290 مامان جۇمىلدىرىلىپ, ەكى اسفالت-بەتون زاۋىتى مەن ءتورت جول-قۇرىلىس باسقارماسى جۇمىس ىستەدى.
42 شاقىرىمدىق «ۇزىناعاش – وتار» تاسجولىنىڭ اشىلۋى ماگيسترالدىڭ وتكىزۋ قابىلەتىن ارتتىرىپ, جول ءجۇرۋ ۋاقىتىن قىسقارتادى, قوزعالىس قاۋىپسىزدىگىن جاقسارتادى ءارى وڭىرلەر اراسىنداعى كولىك بايلانىستارىن نىعايتادى. سونىمەن بىرگە, ورتالىق ازيا مەملەكەتتەرىمەن ەكونوميكالىق قاتىناستاردى ودان ءارى كۇشەيتپەك.