تاشكەنتتە «ورتالىق ازيا: ورتاق رۋحاني-اعارتۋشىلىق مۇرا – ورتاق بولاشاق» اتتى حالىقارالىق كونگرەسس اياسىندا ورتالىق ازيا ەلدەرى مەن ازەربايجان كينو كۇندەرىنىڭ سالتاناتتى اشىلۋى ءوتتى.
باعدارلاما اياسىندا كورەرمەنگە قازىرگى قازاق كينويندۋسترياسىنىڭ تاڭداۋلى تۋىندىلارى ۇسىنىلدى. اتاپ ايتساق, «جامبىل. جاڭا ءداۋىر» تاريحي ءفيلمى, پروكاتتا ءبىر ميلليارد تەڭگەدەن استام تابىس جيناعان «Qaitadan» دراماسى, 2024 جىلعى پاراليمپيادا ويىندارىنىڭ كۇمىس جۇلدەگەرى ەرعالي شامەەۆ تۋرالى قىسقامەتراجدى ء«ۇمىت ساۋلەسى», سونداي-اق ومىرىندەگى قيىندىقتاردى ەڭبەك پەن جىگەردىڭ كۇشىمەن ەڭسەرگەن كوكپارشى قىز ەۆا جيگالينانىڭ ءومىرى نەگىزىندە تۇسىرىلگەن «ەۆا – باتىر قىز» كوركەم تۋىندىسى. ءار فيلم وزبەك كورەرمەنىنىڭ ىستىق ىقىلاسىنا بولەنىپ, تۋىندىلاردىڭ مازمۇنى مەن كوتەرىلگەن تاقىرىپتارى جوعارى باعالاندى.
«جامبىل. جاڭا ءداۋىر» ءفيلمى كورسەتىلىمىنە وزبەكستان كينواگەنتتىگىنىڭ ديرەكتورى شۋحرات ريزاەۆ ارنايى قاتىستى. ول رەجيسسەر جاندوس قۇسايىنوۆتىڭ ەڭبەگىن باعالاپ, ونىڭ كاسىبي شەبەرلىگىن اتاپ ءوتتى. سونىمەن قاتار ول رەجيسسەردى قازاقستان مەن وزبەكستاننىڭ الداعى بىرلەسكەن جوبالارىنا قاتىسۋعا شاقىردى.
حالىقارالىق كونگرەسس باعدارلاماسى اياسىندا قازاق رەجيسسەرلەرى «وزبەكفيلم» ستۋدياسىنىڭ پاۆيلوندارىن ارالادى. ايتا كەتۋ كەرەك, ستۋديادا تۇركى جانە اراب كيىمدەرىنەن باستاپ ءتۇرلى ساۋىتتارعا دەيىنگى رەكۆيزيت پەن كوستيۋم كوللەكتسياسى بار. بۇل تاريحي جانرداعى جوبالار ءۇشىن ايرىقشا قىزىعۋشىلىق تۋدىردى. مۇنداي جۇمىس ساپارلارى ماماندارعا بىرلەسكەن جوبالاردىڭ ەگجەي-تەگجەيىن تالقىلاۋعا, تاجىريبە الماسۋعا, كاسىبي بايلانىستاردى نىعايتۋعا مۇمكىندىك بەرەدى.
وسى ارقىلى ەلدەر اراسىنداعى مادەني ىنتىماقتاستىقتىڭ جاڭا كوكجيەكتەرى اشىلادى.
سونىمەن بىرگە كونگرەسس اياسىندا قازاقستان, ازەربايجان, قىرعىزستان, تاجىكستان, تۇرىكمەنستان جانە وزبەكستان كينو ۇيىمدارىنىڭ باسشىلارى قاتىسقان دوڭگەلەك ۇستەل ءوتتى. تاراپتار ءار ەل اراسىنداعى ىنتىماقتاستىقتى كەڭەيتۋ, بىرلەسكەن كينوجوبالاردىڭ الەۋەتى, ۇلتتىق كينونى حالىقارالىق دەڭگەيدە دامىتۋ, كينوونەر ارقىلى گۋمانيتارلىق بايلانىستى نىعايتۋ ماسەلەلەرىن تالقىلادى.
جيىندا كينو سالاسىنا قولايلى جاعداي جاساۋعا, كاسىبي تاجىريبە الماسۋعا ورتالىق ازيا ەلدەرى مەن ازەربايجان اراسىنداعى مادەني ديالوگتى دامىتۋ باعىتتارىنا ەرەكشە نازار اۋدارىلدى.