مەملەكەت باسشىسىنىڭ جولداۋىندا قويىلعان مىندەتتەردى ىسكە اسىرۋ مەن بيىلعى جىلدى «جۇمىسشى ماماندىقتار جىلى» دەپ جاريالاۋىنىڭ ناتيجەسىندە ءوڭىر-وڭىردە اۋقىمدى باستامالار قولعا الىندى. وسى ورايدا الماتى وبلىسىندا ءبىلىم بەرۋ جۇيەسىن يننوۆاتسيالىق جانە تەحنولوگيالىق باعىتتا دامىتۋ ماقساتىندا «عىلىم. يننوۆاتسيا. بولاشاق. STEAM AI» اتتى حالىقارالىق عىلىمي-تاجىريبەلىك حالىقالىق فورۋم ءوتتى. ءىس-شارا تالعار اۋدانى جاڭالىق اۋىلىنداعى №27 «كەلەشەك مەكتەبىندە» ۇيىمداستىرىلىپ, ەلىمىزدىڭ جانە شەتەلدىڭ جەتەكشى پەداگوگتەرى مەن عالىمدارىن, يننوۆاتسيالىق ءبىلىم بەرۋ سالاسىنىڭ ماماندارىن بىرىكتىردى.
فورۋمنىڭ اشىلۋىندا الماتى وبلىسى ءبىلىم باسقارماسىنىڭ باسشىسى ارايلىم تولەۋبەكوۆا سالاداعى يننوۆاتسيالىق تاسىلدەردىڭ ماڭىزدىلىعىن اتاپ ءوتتى.
«پرەزيدەنت قاسىم-جومارت توقاەۆ تسيفرلىق تەحنولوگيالار ەڭبەك نارىعىن تۇبەگەيلى وزگەرتىپ جاتقانىن اتاپ ءوتتى. بۇگىندە الەمدە جاساندى ينتەللەكت سالاسىندا جۇمىس ىستەي الاتىن ماماندارعا سۇرانىس جوعارى. سوندىقتان مۇنداي قۇزىرەتتىلىكتى ەرتە جاستان قالىپتاستىرۋ اسا ماڭىزدى. بۇل فورۋم ۇستازداردىڭ كاسىبي داعدىلارىن جەتىلدىرۋگە, ءبىلىم ساپاسىن ارتتىرۋعا, جاس ۇرپاقتىڭ شىعارماشىلىق ءارى سىني تۇرعىدان ويلاۋ قابىلەتتەرىن دامىتۋعا باعىتتالعان», دەدى ءبىلىم باسقارماسىنىڭ باسشىسى.
ءىس-شارا بارىسىندا قاتىسۋشىلار زاماناۋي تەحنولوگيالار, روبوتتەحنيكا, ەكولوگيالىق جوبالار مەن دروندار جارىسى سياقتى باعىتتاردا تاجىريبەلىك الاڭدار مەن شەبەرلىك ساباقتارىندا ءوز جوبالارىن تانىستىردى.
تاجىريبەلىك باعىتتار قاتارىندا «ارحەولوگيا: تامىرى تەرەڭنىڭ – بۇتاعى بيىك», «ماماندىقتار الاڭى: بولاشاققا دۇرىس تاڭداۋ», «Eco ART شەبەرحاناسى», «SmartTech: روبوتتەحنيكا جانە Arduino», «Dragon Air Race: دروندار جارىسى» سىندى باعىتتاردى قامتىدى. قاتىسۋشىلار حالىقارالىق فورۋمنىڭ جوعارى دەڭگەيدە ۇيىمداستىرىلعانىن, شارانىڭ تاجىريبەلىك ماڭىزىن ەرەكشە اتاپ ءوتتى. پەداگوگتەر ءۇمىت مۇقان, اينۇر جاباەۆا, مەكتەپ ديرەكتورى دانيار تايجان ۇلىنىڭ ايتۋىنشا, فورۋم تاجىريبە الماسۋعا ارنالعان بىرەگەي الاڭ بولىپ, وقۋشىلاردىڭ فۋنكتسيونالدىق ساۋاتتىلىعىن دامىتۋعا, ءبىلىم ساپاسىن ارتتىرۋعا زور ۇلەس قوستى.
فورۋم قورىتىندىسىندا قاتىسۋشىلار STEAM جانە جاساندى ينتەللەكت باعىتىندا ءبىلىم بەرۋدىڭ ادىستەمەلىك نەگىزدەرىن جەتىلدىرۋ ماقساتىندا ۇسىنىستارىن دا ايتتى.
الماتى وبلىسى,
تالعار اۋدانى