اۋىل شارۋاشىلىعى ەڭبەككەرلەرىنىڭ ەكىنشى فورۋمىندا پرەزيدەنت جارلىعىمەن ماراپاتتالعانداردىڭ ءبىرى – «نوۆوسەلسكوە» سەرىكتەستىگىنىڭ باس اگرونومى فانيل گابدۋلحاكوۆ «قازاقستاننىڭ اگرارلىق سالاسىنا ەڭبەك سىڭىرگەن قايراتكەر» اتاعىنا يە بولدى.
وڭىردەگى اقىق ءدان ايالاعان ديقان قاۋىم اتباسارلىق اگرونوم فانيل ريفكاتوۆيچتىڭ ەسىمىن جاقسى بىلەدى. جەردىڭ ءتىلىن تابا بىلگەن شارۋاشىلىقتىڭ باس اگرونومى ىزدەنىمپازدىعىنىڭ, تىڭ عىلىمي جاڭالىقتاردى ويلاپ تابا ءبىلۋىنىڭ ارقاسىندا ىرىزدىق مولشىلىعىنا ۇلەس قوسىپ كەلەدى.
2011 جىلى «سوچينسكوە» جانە «جايدارمان» دەپ اتالاتىن كۇنباعىستىڭ ەكى سورتىنا اۆتورلىق كۋالىك العان بولاتىن. سول جىلى اۋىل شارۋاشىلىعى مينيسترلىگىنىڭ سەرتيفيكاتىنا يە بولىپ, قازاقستاننىڭ «ۇزدىك اگرونومى» اتاعىمەن ماراپاتتالدى. شىنتۋايتىندا, بۇل تاباندى جۇمىستىڭ ناتيجەسى ەدى. عىلىمي جۇمىسى تۋرالى دا, ناتيجەسى حاقىندا دا ايتا كەتەلىك, 2003-2007 جىلدارى «سوچينسكوە» تۇقىمى بەس وبلىستاعى ەگىستىك القابىنىڭ 70 پايىزىنا سەبىلدى. 2024 جىلى 15 جىلعى عىلىمي جۇمىستان كەيىن فانيل ريفكاتوۆيچ «سوچينسكي گولوزەرنىي» دەپ اتالاتىن ارپانىڭ جاڭا ءتۇرىن ويلاپ شىعاردى.
ءار كەزدە تابيعاتپەن تىلدەسىپ, كۇندەلىكتى جۇمىستى عىلىممەن ۇشتاستىرا بىلگەن باس اگرونوم جاڭالىقتى جۇزەگە اسىرۋىنىڭ ارقاسىندا سەرىكتەستىكتىڭ باسەكەلەستىك ايدىنىندا جالاۋى جەلبىرەۋىنە مول ۇلەسىن قوستى. وسى ەڭبەگى ءۇشىن 2008 جىلى «قۇرمەت» وردەنىنە يە بولدى. سالادا 39 جىل بويى ەڭبەك ەتىپ كەلە جاتقان عالىم-اگرونومنىڭ تابىستارى كوپشىلىككە ءمالىم.
بۇل كۇندە سۇرانىسقا يە بولىپ وتىرعان داقىلداردىڭ بىرنەشە سورتىن ويلاپ تاپقان عالىم-اگرونوم وسىمدىكتەردىڭ ونىمدىلىگىن كوزدەي وتىرىپ, سولتۇستىك اۋا رايىنا ءتوزىمدى بولۋىن دا ەسكەرەدى. جازدىق جۇمساق بيدايدى ءوسىرۋ جانە زاماناۋي تەحنولوگيالاردى ەنگىزۋ بويىنشا ازىرلەگەن وقۋ قۇرالى اۋىل شارۋاشىلىعى عىلىمىنا قوسقان ماڭىزدى ۇلەسى.
«ارىپتەستەرىم ءار جىل سايىن قانداي تۇقىم ەگۋ قاجەتتىگى تۋرالى ءجيى سۇرايدى», دەيدى فانيل ريفكاتوۆيچ, «بۇل وتە ماڭىزدى ماسەلە. تۇپكى ناتيجەگە تۇقىمدى دۇرىس تاڭداي ءبىلۋ دە اسەر ەتەتىندىگىن دالەلدەۋدىڭ قاجەتى جوق. مەنىڭشە, ءوڭىر اۋا رايىنىڭ ەرەكشەلىگىنە وراي قۇرعاقشىلىققا ءتوزىمدى, اۋرۋعا بوي الدىرمايتىن, ءونىمدى مەيلىنشە كوپ بەرەتىن تۇقىم بولعانى ءجون عوي».
عالىم-اگرونومنىڭ تاباندى ەڭبەگىنىڭ ارقاسىندا سولتۇستىك ديقاندارى كوپتەپ قولداناتىن جاڭا تۇقىمدار ەل ىرىزدىعىن ەسەلەۋگە سەبەپشى بولىپ تۇر.
اتباسار اۋدانى,اقمولا وبلىسى