بۇل تۋرالى الماتى وبلىسىنىڭ اكىمى مارات سۇلتانعازيەۆ تسيفرلاندىرۋ جانە اقپاراتتىق تەحنولوگيالار قىزمەتكەرلەرى كۇنىنە ارنالعان سالتاناتتى جيىندا ايتتى. ءىس-شارا بارىسىندا سالا ۇزدىكتەرى مەن بايلانىس وپەراتورلارىنىڭ وزىق ماماندارى ماراپاتتالدى.
وبلىس باسشىسى ءوز سوزىندە مەملەكەت باسشىسىنىڭ «قازاقستان الداعى ءۇش جىلدا تولىققاندى تسيفرلىق مەملەكەت بولۋعا ءتيىس» دەگەن تاپسىرماسىنا توقتالىپ, وسى باعىتتاعى ءوڭىر جەتىستىكتەرىن اتاپ ءوتتى.
«تسيفرلىق ترانسفورماتسيا – بۇگىنگى كۇننىڭ باستى تالابى. بۇل باعىتتا اتقارىلىپ جاتقان جۇمىستار ءوڭىردىڭ دامۋ دەڭگەيىن ايقىندايدى. سوندىقتان ساپا مەن تۇراقتى ءوسىم – باستى نازاردا», دەدى ءوڭىر باسشىسى.
اكىمنىڭ ايتۋىنشا, بيىلعى توعىز ايدىڭ قورىتىندىسى بويىنشا اقپارات جانە بايلانىس سەكتورى 12 پايىزعا ءوسىپ, ءوندىرىس كولەمى 13,7 ملرد تەڭگەگە جەتتى. Smart City يندەكسى 70 بالدى قۇراپ, وتكەن جىلمەن سالىستىرعاندا ەكى ەسەگە ارتقان. قازىر وبلىستاعى 368 ەلدى مەكەننىڭ 349-ى كەڭ جولاقتى ينتەرنەتپەن قامتاماسىز ەتىلگەن. 261 اۋىلعا تالشىقتى-وپتيكالىق بايلانىس جەلىسى تارتىلىپ, 311 ەلدى مەكەندە 4G جەلىسى تۇراقتى جۇمىس ىستەپ تۇر. الاتاۋ قالاسىنىڭ جەتىگەن شاعىن اۋدانىندا 5G فورماتىنداعى بايلانىس ىسكە قوسىلدى.
«بۇگىنگى كۇنى ەڭبەگىمىزدىڭ ەلەنگەنىنە قۋانىشتىمىز. بۇل ماراپات بىزگە سالادا جاڭا جوبالاردى جۇزەگە اسىرۋعا سەرپىن بەرەدى», دەدى الاتاۋ قالاسى اكىمدىگىنىڭ اپپارات باسشىسى جانىبەك قاراتاەۆ.
سونىمەن قاتار «الماتى وبلىسىنىڭ تسيفرلىق كوشىرمەسى» جوباسى اياسىندا 33 ەلدى مەكەننىڭ تسيفرلىق كارتاسى جاسالىپ, 2 000 شاقىرىمنان استام ينجەنەرلىك جەلى تارتىلعان. ءوڭىر اۋماعىندا 9 مىڭنان استام ينتەللەكتۋالدى بەينەباقىلاۋ جۇيەسى ورناتىلدى. ال وبلىس ورتالىعى قوناەۆ قالاسىندا جاساندى ينتەللەكت تەحنولوگياسىنا نەگىزدەلگەن العاشقى Qonaev AI جۇيەسى ىسكە قوسىلدى.
الماتى وبلىسى