«اقتاۋ تەڭىز سولتۇستىك تەرمينالى» – «اقتاۋ تەڭىز پورتى» ارنايى ەكونوميكالىق ايماعىنىڭ اۋماعىندا ورنالاسقان جۇكتەردى تاسىمالداۋ, استىقتى اۋىستىرىپ تيەۋ, تەڭىز كەمەلەرىن قابىلداۋ مەن جونەلتۋ, سونداي-اق كەشەندى لوگيستيكالىق قىزمەت كورسەتۋمەن اينالىساتىن نىسان. اتالعان تەرمينال ەلىمىز كاسپي, قارا جانە جەرورتا تەڭىزدەرىمەن, بالتىق, پارسى شىعاناعى ەلدەرىمەن تىكەلەي بايلانىس ورناتاتىن حالىقارالىق تراسەكا, «سولتۇستىك – وڭتۇستىك» كولىك دالىزدەرىنىڭ ماڭىزدى بولىگى سانالاتىندىقتان گەوساياسي تۇرعىدا ايرىقشا مانگە يە.
قازىر اقتاۋ تەڭىز سولتۇستىك تەرمينالىنان جۇكتەر يران, رەسەي, ازەربايجان باعىتتارىنا جونەلتىلەدى. الداعى ۋاقىتتا كومپانيا وندىرىستىك تيىمدىلىكتى ارتتىرىپ, جاڭا سەرىكتەستەر تارتىپ, جۇك اعىندارىن ءارتاراپتاندىرۋدى كوزدەپ وتىر. ورتامەرزىمدى كەزەڭدە قىتاي, رەسەي, پارسى شىعاناعى ەلدەرىنەن كەلەتىن ترانزيتتىك جۇكتەردىڭ ۇلەسى ارتادى دەگەن جوسپار بار.
جۇيەلى جۇمىستار ناتيجەسىندە بيىلعى ون ايدىڭ قورىتىندىسىندا تەرمينالداعى جۇك اينالىمى ارتا تۇسكەن. دەرەكتەر جالپى 697 مىڭ توننا جۇك وڭدەلىپ, وتكەن جىلمەن سالىستىرعاندا 187%-عا ارتىق ناتيجەگە قول جەتكەنىن, ال ەكسپورت كولەمى 537 مىڭ تونناعا جەتىپ, 304% وسىمگە يە بولسا, يمپورت 160 مىڭ تونناعا دەيىن ۇلعايعاندىعىن كورسەتىپ وتىر.
سونداي-اق نەگىزگى جۇك تۇرلەرى بويىنشا دا تۇراقتى ءوسىم بار, استىق ونىمدەرى 279%-عا ارتىپ, 408 مىڭ تونناعا جەتسە, وزگە جۇكتەر 127%-عا كوبەيىپ, 289 مىڭ توننانى قۇرادى. كونتەينەرلىك تاسىمالدار كولەمى دە ەكى ەسە ارتقان. ينجينيرينگ جانە قاۋىپسىزدىك جونىندەگى ديرەكتور ەرمەك مولدابەكوۆتىڭ ايتۋىنشا, كومپانيا قۇرىلىمىندا ءۇش تەڭىز ايلاعى بار, سونىڭ ەكەۋى قۇرعاق جۇككە, ءبىرى استىق تيەۋگە ارنالعان.
– 2018 جىلى پايدالانۋعا بەرىلگەن نىسان زاماناۋي تەحنيكامەن جابدىقتالعان. تەرمينالدىڭ جالپى اۋماعى 39 گەكتاردى قامتيدى, جىلدىق جوبالىق قۋاتتىلىعى – 3 ميلليون توننا. ونىڭ ىشىندە 2 ميلليون تونناسى جالپى جۇكتەرگە, 1 ميلليون تونناسى استىق ونىمدەرىنە تيەسىلى. استىق تەرمينالى ءبىر مەزەتتە 60 مىڭ تونناعا دەيىن استىق ساقتاۋعا مۇمكىندىك بەرەدى, – دەيدى ول.
تەرمينالداعى تىرشىلىك تىنىسى مەن ەڭبەك ىرعاعىنىڭ قۋاتى – ءوڭىردىڭ ەكونوميكالىق الەۋەتىنىڭ ءبىر كورسەتكىشى. اتالعان نىسانداعى ىلگەرىلەۋگە قاراپ, ايماقتىڭ كۇش-قۋاتى مەن اتقارىلعان جۇمىستار الەۋەتىن اڭعارۋعا بولادى.
ماڭعىستاۋ وبلىسى