قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ پەن استاناعا جۇمىس ساپارىمەن كەلگەن قىرعىز رەسپۋبليكاسى مينيسترلەر كابينەتىنىڭ توراعاسى – پرەزيدەنت اكىمشىلىگىنىڭ باسشىسى ادىلبەك كاسىماليەۆ قازاق-قىرعىز ۇكىمەتارالىق كەڭەسىنىڭ 13-ءشى وتىرىسى شەڭبەرىندە ساۋدا-ەكونوميكالىق ىنتىماقتاستىقتى دامىتۋ ماسەلەلەرىن تالقىلادى, دەپ حابارلايدى Egemen.kz.
تاراپتار ساۋدا-ەكونوميكالىق بايلانىستاردى كەڭەيتۋ الەۋەتىنە توقتالدى. ساۋدا, ونەركاسىپ كووپەراتسياسى, ينۆەستيتسيا, ەنەرگەتيكا, سۋ سالاسى, اوك, كولىك-لوگيستيكا, تۋريزم جانە تاعى باسقا دا سالالارداعى ءوزارا ءىس-قيمىلعا نازار اۋدارىلدى.
قازاقستان مەن قىرعىزستان اراسىنداعى تاۋار اينالىمى وسى جىلدىڭ 8 ايىندا 21%-عا ءوسىپ, $1,4 ملرد-تى قۇرادى.
«قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ پەن قىرعىز رەسپۋبليكاسىنىڭ پرەزيدەنتى سادىر جاپاروۆتىڭ جەكە قولداۋى مەن ساياسي ەرىك-جىگەرىنىڭ ارقاسىندا سوڭعى جىلدارى قازاق-قىرعىز ستراتەگيالىق ارىپتەستىگى جاڭا سەرپىنگە يە بولدى. بۇل تۇرعىدا, ءبىزدىڭ ورتاق ماقساتىمىز – ەكى ەل كوشباسشىلارىنىڭ بەرگەن تاپسىرمالارىن تولىق ورىنداۋ جانە كوپقىرلى ىقپالداستىقتى ودان ءارى كەڭەيتۋ. قىرعىزستان – ءبىز ءۇشىن تاتۋ كورشى, باۋىرلاس ەل عانا ەمەس, سونىمەن قاتار ماڭىزدى ساۋدا-ەكونوميكالىق سەرىكتەس مەملەكەت. قازاقستان ۇكىمەتى ورتاق مۇددەلەرىمىزگە ساي كەلەتىن ماقساتتارعا بىرلەسىپ اتسالىسۋعا دايىن», دەپ اتاپ ءوتتى ولجاس بەكتەنوۆ.
«مەملەكەتتەر باسشىلارىنىڭ بىرلەسكەن كۇش-جىگەرى قىرعىزستان مەن قازاقستان اراسىنداعى ستراتەگيالىق ارىپتەستىكتى ساپالى جاڭا دەڭگەيگە كوتەردى. ەكىجاقتى بايلانىستاردى دامىتۋعا قىرعىز رەسپۋبليكاسىنىڭ پرەزيدەنتى سادىر جاپاروۆتىڭ استاناعا جانە قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ بىشكەككە رەسمي ساپارلارى بارىسىندا قول جەتكىزىلگەن ماڭىزدى كەلىسىمدەر ىقپال ەتتى. ۇكىمەت العا قويعان ماقساتتارعا قول جەتكىزۋ ءۇشىن بار كۇش-جىگەرىن سالادى», دەپ اتاپ ءوتتى قىرعىز رەسپۋبليكاسى مينيسترلەر كابينەتىنىڭ توراعاسى – پرەزيدەنت اكىمشىلىگىنىڭ باسشىسى ادىلبەك كاسىماليەۆ.
وتىرىسقا قاتىسۋشىلار ۇكىمەتارالىق كەڭەستىڭ الدىڭعى وتىرىسىندا قابىلدانعان بىرلەسكەن شارالاردىڭ جۇزەگە اسىرىلۋ بارىسىن قارادى. ەنەرگەتيكا جانە سۋمەن جابدىقتاۋ سالالارىنداعى ءوزارا ءتيىمدى ىنتىماقتاستىققا, سونداي-اق ينۆەستيتسيالىق ءوزارا ءىس-قيمىلعا نازار اۋدارىلدى.
اوك سالاسىنداعى ءوسۋدىڭ جاڭا باعىتتارى بەلگىلەندى. بيىلعى 8 ايدا اۋىل شارۋاشىلىعى ونىمدەرىنىڭ ساۋدا كولەمى 42%-عا ءوسىپ, $326 ملن-دى قۇرادى, ونىڭ 80%-دان استامى – قازاقستاننان شىعاتىن اۋىل شارۋاشىلىعى ونىمدەرىنىڭ ەكسپورتى.
تاۋ ءتۋريزمى – ىنتىماقتاستىقتىڭ كەلەشەگى زور باعىتتارىنىڭ ءبىرى. ەكى ەل اۋماعىندا ورنالاسقان حان ءتاڭىرى شىڭىندا تاۋ ءتۋريزمى باعىتتارىن جانداندىرۋ ماسەلەلەرى تالقىلاندى.
بيىل بىشكەكتە مادەني-گۋمانيتارلىق ءوزارا ءىس-قيمىل اياسىندا بىرقاتار ءىس-شارا ءوتتى, ونىڭ ىشىندە قازاقستاندىق كينو كۇندەرى, قر حالىق ءارتىسى, كومپوزيتور, ديريجەر نۇرعيسا تىلەنديەۆتىڭ تۋعانىنا 100 جىل تولۋىنا ارنالعان كونتسەرت جانە تاعى باسقا دا ءىس-شارالار بار. كورنەكتى جازۋشىلار مۇحتار اۋەزوۆ پەن شىڭعىس ايتماتوۆقا ارنالعان «قازاق-قىرعىز دوستىعىنىڭ التىن كوپىرى» ەسكەرتكىشى مادەنيەتارالىق ديالوگتىڭ سيمۆولىنا اينالدى.
قازاقستان مەن قىرعىزستان ۇكىمەتتەرى ىنتىماقتاستىقتىڭ بارلىق نەگىزگى باعىتى بويىنشا ەكىجاقتى قارىم-قاتىناستاردى ودان ءارى تەرەڭدەتۋگە نيەتتى ەكەنىن راستادى.
جيىن سوڭىندا قازاق-قىرعىز ۇكىمەتارالىق كەڭەسىنىڭ 13-ءشى وتىرىسى حاتتاماسىنا قول قويىلدى.