كاسساتسيالىق سوت «جەزقازعان-ەير» اكتسيونەرلىك قوعامىنا قاتىستى انتيمونوپوليالىق تەرگەۋ قورىتىندىسى مەن زاڭ بۇزۋشىلىق بەلگىلەرى تۋرالى حابارلامالاردىڭ زاڭدى ەكەنىن مالىمدەپ, تومەنگى ينستانتسيالاردا وتكەن داۋعا سوڭعى نۇكتە قويدى, دەپ جازادى Egemen.kz.
باسەكەلەستىكتى قورعاۋ جانە دامىتۋ اگەنتتىگىنىڭ ۇلىتاۋ وبلىسى بويىنشا دەپارتامەنتى 2024 جىلى «جەزقازعان-ەير» اق-عا قاتىستى انتيمونوپوليالىق تەرگەۋ جۇرگىزگەن ەدى. تەرگەۋ بارىسىندا كومپانيانىڭ ارەكەتتەرىنەن باسەكەلەستىك تۋرالى زاڭنامانى بۇزۋ بەلگىلەرى انىقتالعان.
كومپانيا بۇل قورىتىندىمەن كەلىسپەي, ۇلىتاۋ وبلىسىنىڭ اۋدانارالىق مامانداندىرىلعان اكىمشىلىك سوتىنا جۇگىنگەن. 2024 جىلعى 25 قاراشادا ءبىرىنشى ساتىداعى سوت اكىمشىلىك تالاپتى قاناعاتتاندىرىپ, تەرگەۋ ماتەريالدارىنىڭ كۇشىن جويعان بولاتىن.
الايدا دەپارتامەنت اپەللياتسياعا شاعىم ءتۇسىرىپ, 2025 جىلعى 20 ناۋرىزدا ۇلىتاۋ وبلىستىق سوتىنىڭ اكىمشىلىك ىستەر جونىندەگى القاسى ءبىرىنشى ساتىداعى شەشىمدى جويىپ, جاڭا شەشىم شىعاردى. سونىڭ ناتيجەسىندە «جەزقازعان-ەير» اق-نىڭ تالابى تولىعىمەن قاناعاتتاندىرۋسىز قالدىرىلدى.
كومپانيا بۇل شەشىمگە قارسى كاسساتسيالىق شاعىم جولداعانىمەن, 2025 جىلعى 23 قازاندا كاسساتسيالىق ينستانتسيا ونى قاناعاتتاندىرمادى. وسىلايشا, 2025 جىلعى 20 ناۋرىزدا قابىلدانعان وبلىستىق سوت شەشىمى زاڭدى كۇشىندە قالدى.
دەپارتامەنت تەرگەۋىنە سايكەس, «جەزقازعان-ەير» اق 2022 جىلدىڭ قاراشاسى مەن 2023 جىلدىڭ مامىرى ارالىعىندا اۆياوتىن ساتۋ كەزىندە مونوپوليالىق كىرىس العان. جالپى تابىس – 276 768 379 تەڭگە, ونىڭ ىشىندە مونوپوليالىق تابىس 22 919 186 تەڭگەنى قۇراعان. ال اينالىمنىڭ 3%-ى – 8 303 051 تەڭگە.
الىنعان تابىس 20 000 ايلىق ەسەپتىك كورسەتكىشتەن اسىپ كەتكەندىكتەن جانە لاۋازىمدى تۇلعالاردىڭ ارەكەتتەرىندە قىلمىستىق سيپاتتاعى بەلگىلەر بولۋى ىقتيمال بولعاندىقتان, ماتەريالدار بۇعان دەيىن قارجى مونيتورينگى اگەنتتىگىنىڭ ۇلىتاۋ وبلىسى بويىنشا ەكونوميكالىق تەرگەۋ دەپارتامەنتىنە جولدانعان-دى. بىراق سوت پروتسەستەرى ءجۇرىپ جاتقان كەزەڭدە ماتەريالداردى قاراۋ ۋاقىتشا توقتاتىلعان.
ەندى كاسساتسيالىق سوت قاۋلىسى زاڭدى كۇشىنە ەنگەندىكتەن, بارلىق شەشىمدەر ەكونوميكالىق تەرگەۋ دەپارتامەنتىنە قايتا جولدانىپ, ءتيىستى شارالار قابىلداناتىن بولادى.