سەنات دەپۋتاتى نۋريا نيازوۆا مەملەكەتتىك باسقارۋ اكادەمياسىنىڭ قىزمەتكەرلەرى, ماگيسترانتتارى مەن دوكتورانتتارىنا ارنالعان كاسىبي جانە تۇلعالىق دامۋعا باعىتتالعان «دامۋ كۇنى» جوباسى اياسىندا ءدارىس وقىدى, دەپ حابارلايدى Egemen.kz.
شارا بارىسىندا سەناتور 2026 جىلعى 1 قاڭتاردان باستاپ كۇشىنە ەنەتىن سالىق كودەكسىندەگى نەگىزگى جاڭالىقتار جونىندە بايانداما جاسادى. ول كورپوراتيۆتىك جانە جەكە تابىس سالىعىنىڭ مولشەرلەمەلەرىندەگى وزگەرىستەرگە, ارنايى سالىق رەجيمدەرىن وڭتايلاندىرۋعا جانە سالىقتىق اكىمشىلەندىرۋدى جەتىلدىرۋ شارالارىنا توقتالدى.
نۋريا نيازوۆانىڭ ايتۋىنشا, ەنگىزىلگەن وزگەرىستەردىڭ باستى ماقساتى – سالىق جۇيەسىن جەڭىلدەتۋ, اكىمشىلىك جۇكتەمەنى ازايتۋ جانە تۇراقتى ەكونوميكالىق ءوسىم ءۇشىن قولايلى جاعداي جاساۋ.
ء«تيىمدى سالىق ساياساتىن قالىپتاستىرۋ كاسىپكەرلىكتى دامىتۋعا, ينۆەستيتسيالىق بەلسەندىلىكتى ارتتىرۋعا جانە ازاماتتاردىڭ ءومىر ساپاسىن جاقسارتۋعا تىكەلەي اسەر ەتەدى. ايتا كەتەرلىك جايت, جاڭا كودەكستە الەۋمەتتىك ماڭىزى بار سالالار مەن ناقتى ەكونوميكانى قولداۋعا باسىمدىق ساقتالىپ وتىر», دەدى سەناتور.
«دامۋ كۇنى» جوباسى اكادەميالىق ورتادا پىكىرتالاس مادەنيەتىن دامىتۋعا, ءبىلىم الۋشىلاردى ساراپتامالىق تالقىلاۋلارعا تارتۋعا جانە مەملەكەتتىك پەن قوعامدىق ينستيتۋتتار اراسىنداعى بايلانىستى نىعايتۋعا باعىتتالعان. قاتىسۋشىلار كەزدەسۋدىڭ پراكتيكالىق ماڭىزدىلىعىن جانە زاڭ شىعارۋ تارماعى وكىلىمەن تىكەلەي پىكىر الماسۋ مۇمكىندىگىن جوعارى باعالادى.