امەريكالىق ميللياردەر ۋوررەن باففەتت ءوزىنىڭ سوڭعى اكتسيونەرلەرگە ارنالعان حاتىن جاريالاپ, Berkshire Hathaway كومپانياسىنىڭ باس ديرەكتورى لاۋازىمىنان كەتەتىنىن حابارلادى. سونىمەن قاتار, ول شامامەن 149 ميلليارد دوللاردى قۇرايتىن جاعدايىن ءوزىنىڭ بالالارى باسقاراتىن قايىرىمدىلىق قورلارىنا جىلدامداتىپ بەرۋگە شەشىم قابىلدادى, دەپ جازادى Egemen.kz.
«مەن ەندى «Berkshire Hathaway»-ءدىڭ جىلدىق ەسەبىن جازبايمىن جانە اكتسيونەرلەردىڭ جىلدىق جينالىسىندا ۇنەمى ءسوز سويلەي بەرمەيمىن… بريتاندىقتار ايتقانداي, مەن «تىنىم تابامىن», دەپ جازىلعان كومپانيا جاريالاعان حاتتا.
باففەتت 1800 A كلاستى Berkshire Hathaway اكتسيالارىن 2,7 ميلليون B كلاستى اكتسياعا اۋىستىرعانىن جانە ولاردى دۇيسەنبى كۇنى ءتورت وتباسى قورىنا (Susan Thompson Buffett Foundation, Sherwood Foundation, Howard G. Buffett Foundation جانە NoVo Foundation) تابىس ەتكەنىن حابارلادى. جالپى قايىرىمدىلىق كولەمى 1,3 ميلليارد دوللاردان استى.
ميللياردەر قايىرىمدىلىق اۋدارىمدارىن جىلدامداتۋ ونىڭ Berkshire Hathaway بولاشاعى جونىندەگى كوزقاراسىن قايتا قاراۋىمەن بايلانىستى ەمەس ەكەنىن اتاپ ءوتتى. بۇل شەشىم ونىڭ مۇراگەرلەرىنىڭ جاسىمەن جانە قاراجاتتى ولار ۇلگەرىپ, باسقارا الۋى ءۇشىن قابىلدانعان. باسقارۋ بيلىگى 63 جاستاعى گرەگ ابەلگە وتكەنشە, 95-كە كەلگەن باففەتت ءوز مىندەتىن اتقارا تۇرادى.
باففەتت سونداي-اق كومپانيانىڭ تۇراقتىلىعىن اتاپ ءوتتى.
«شامامەن 60 جىل ىشىندە Berkshire Hathaway پايداسىز توقىما فابريكاسىنان ساقتاندىرۋ, كولىك, ەنەرگەتيكا جانە تۇتىنۋ اكتيۆتەرىن قامتيتىن تريلليون دوللارلىق كونگلومەراتقا اينالدى», دەيدى ول.
قىركۇيەك ايىنىڭ سوڭىندا كومپانيانىڭ قولدا بار اقشاسى رەكوردتىق 381,6 ميلليارد دوللاردى قۇرادى. ءۇشىنشى توقسانداعى پايدا 34%-عا ءوستى, ال اكتسيالار جىل باسىنان بەرى شامامەن 10%-عا كوتەرىلدى.
«مەن جالپى العاندا ءوزىمدى جاقسى سەزىنەمىن. دەگەنمەن باياۋ قوزعالامىن جانە وقۋ قيىنداۋ, بىراق اپتاسىنا بەس كۇن وفيسكە بارىپ, تاماشا ادامدارمەن جۇمىس ىستەيمىن», دەپ جازدى باففەتت.