مەملەكەت باسشىسى قاسىم-جومارت توقاەۆ «روسسيسكايا گازەتا» باسىلىمىنا جاريالاعان «ماڭگىلىك دوستىق – حالىقتارىمىز ءۇشىن جارقىن جول» اتتى ماقالاسىندا ەكى ەل اراسىنداعى ترانسپورتتىق-لوگيستيكالىق سالانىڭ ماڭىزدىلىعىنا توقتالادى, دەپ جازادى Egemen.kz.
بۇگىندە ەلىمىزدىڭ اۋماعى ارقىلى 13 حالىقارالىق ترانسپورت ءدالىزى ءوتىپ جاتىر. ونىڭ بەسەۋى تەمىرجول جەلىسى بولسا, سەگىزى – اۆتوموبيل جولى, سايكەسىنشە وسى جولدار ازيا مەن ەۋروپا اراسىنداعى قۇرلىقتاعى جۇك تاسىمالىنىڭ 85 پايىزىن قامتاماسىز ەتىپ تۇر.
«قازاقستان مەن رەسەيدىڭ اۋماعى مەن گەوگرافيالىق ورنالاسۋىن ەسكەرە وتىرىپ, ترانزيتتىك باعىتتاردى جانە ءتيىستى ينفراقۇرىلىمدى ودان ءارى دامىتۋ بۇكىل ەۋرازيا كەڭىستىگىنىڭ تۇراقتى كولىك بايلانىسىن قامتاماسىز ەتۋدە ايرىقشا ماڭىزدى ءرول اتقارادى. وسى ماقساتقا جەتۋ ءۇشىن ءبىزدىڭ ەلدەر «باتىس ەۋروپا – باتىس قىتاي» اۆتوموبيل دالىزىندەگى وتكىزۋ قابىلەتىن جوعارىلاتۋ بويىنشا جۇمىس ىستەپ جاتىر. قازاقستان مەن رەسەي شەكاراسىنداعى 30 اۆتوموبيل وتكىزۋ بەكەتىن مودەرنيزاتسيالاۋ جۇزەگە اسىرىلۋدا.
ءبىز «سولتۇستىك – وڭتۇستىك» كولىك ءدالىزىنىڭ شىعىس باعىتىن كەڭەيتۋ باعىتىندا بىرلەسىپ جۇمىس ىستەپ كەلەمىز. قازىرگى ۋاقىتتا بۇل باعىتتاعى جۇك تاسىمالى كولەمى ايتارلىقتاي ءوسىپ وتىر. بۇل ۇدەرىستە رەسەي – قازاقستان – تۇرىكمەنستان – يران تەمىرجولىنىڭ ماڭىزى ەرەكشە. وسى ستراتەگيالىق باعىتتىڭ وتكىزۋ قابىلەتىن الداعى بەس جىل ىشىندە جىلىنا 20 ميلليون تونناعا دەيىن ارتتىرۋدى كوزدەيتىن جول كارتاسىنا قول قويىلدى», دەپ جازادى پرەزيدەنت.
مەملەكەت باسشىسىنىڭ ايتۋىنشا, اتالعان باعىتتار ءبىزدىڭ ىنتىماقتاستىعىمىزدا ماڭىزدى ورىن الادى, الايدا ەلدەر اراسىنداعى ءوزارا ءىس-قيمىل اۋقىمى مۇگىمەن شەكتەلمەيدى, ياعني مۇمكىن بولعان بارلىق سالانى قامتيدى.