قازاقستان مەن قىتاي اراسىنداعى عىلىمي-يننوۆاتسيالىق سەرىكتەستىك جاڭا كەزەڭگە قادام باستى. قىتايدىڭ «Xi’an Jiaotong University» جانىنان «شاكارىم» مادەني زەرتتەۋلەر ورتالىعى قۇرىلدى. بۇل تۋرالى عىلىم جانە جوعارى ءبىلىم مينيسترلىگى حابارلادى.
قىتايدىڭ «Xi’an Jiaotong University»-دە ء«بىر بەلدەۋ, ءبىر جول» باستاماسىنىڭ وزىق عىلىمي-تەحنولوگيالىق جەتىستىكتەرىمەن الماسۋ جونىندەگى حالىقارالىق كونفەرەنتسيا ۇيىمداستىرىلدى. كونفەرەنتسيا اياسىندا قىتايلىق ۋنيۆەرسيتەت اتىنان شاكارىم ۋنيۆەرسيتەتىنە «ەلەكترلىك اۆتوماتتاندىرۋ جونىندەگى قازاقستان–قىتاي بىرلەسكەن زەرتحاناسىنا» ارنالعان جابدىقتاردىڭ العاشقى پارتياسىن بەرۋ تۋرالى ەستەلىك سەرتيفيكات تابىستالدى. سونداي-اق «شاكارىم» قازاق-قىتاي مادەني زەرتتەۋلەر ورتالىعىنىڭ سالتاناتتى اشىلۋى ءوتتى. بىرلەسكەن زەرتحانا اشۋ جونىندەگى كەلىسىمگە بيىلعى 16 ماۋسىمدا استانادا وتكەن «ورتالىق ازيا – قىتاي» يندۋستريالىق-ينۆەستيتسيالىق ىنتىماقتاستىق فورۋمى اياسىندا قول قويىلعان بولاتىن.
مينيسترلىك تاراتقان اقپاراتتا كورسەتىلگەندەي, جاڭادان قۇرىلاتىن زەرتحانا ەكى ەل اراسىنداعى تەحنولوگيا الماسۋ مەن وندىرىستىك سەرىكتەستىكتى دامىتۋدا ماڭىزدى ءرول اتقارىپ, عىلىمي جاڭالىقتارعا نەگىزدەلگەن ورتاق ەكونوميكالىق تىزبەكتىڭ دامۋىن جىلدامداتادى. جوبانىڭ نەگىزگى ماقساتى – وڭىردەگى يننوۆاتسيالاردى دامىتۋ, ءوندىرىستى جاڭارتۋ جانە عىلىم مەن ءوندىرىس اراسىنداعى بايلانىستى نىعايتۋ.
«بۇل زەرتحانا – يدەيادان ناقتى ىسكە اينالعان سەرىكتەستىكتىڭ ايقىن ناتيجەسى. عىلىم مەن تەحنولوگيا سالاسىنداعى وسىنداي ىنتىماقتاستىق – پرەزيدەنت قاسىم-جومارت توقاەۆتىڭ يننوۆاتسيالىق دامۋ جانە ينتەللەكتۋالدى ۇلت قالىپتاستىرۋ ستراتەگياسىمەن ۇندەس», دەپ اتاپ ءوتتى عىلىم جانە جوعارى ءبىلىم ۆيتسە-ءمينيسترى گۇلزات كوبەنوۆا.
كەزدەسۋدىڭ باستى وقيعاسى سيان تسزياوتۋن ۋنيۆەرسيتەتىنىڭ جانىنان «شاكارىم» قازاق-قىتاي مادەني زەرتتەۋلەر ورتالىعىنىڭ اشىلۋى بولدى. بۇل – ۇلى ويشىلدىڭ شىعارماشىلىعى مەن فيلوسوفياسىنا ارنالعان شەتەلدەگى تۇڭعىش ينستيتۋتسيونالدى ورتالىق. حالىقارالىق دەڭگەيدە اشىلعان ورتالىقتىڭ نەگىزگى مىندەتى – قازاقستاننىڭ تاريحى مەن مادەنيەتىن, سونىڭ ىشىندە شاكارىم مۇراسىن تەرەڭ زەردەلەۋ, سونداي-اق بىرلەسكەن ءبىلىم جانە عىلىمي زەرتتەۋ جوبالارىن ىسكە اسىرۋداعى ءوزارا ءتيىمدى پلاتفورمانى قالىپتاستىرۋ, قازاق مادەنيەتىن قىتايدا كەڭىنەن تانىستىرۋ, ەكى ەل اراسىنداعى مادەني جانە عىلىمي بايلانىستاردى نىعايتۋ.
ورتالىق عىلىم جانە جوعارى ءبىلىم مينيسترلىگىنىڭ قولداۋىمەن, شاكارىم ۋنيۆەرسيتەتى مەن سيان تسزياوتۋن ۋنيۆەرسيتەتىنىڭ سەرىكتەستىگىنىڭ ناتيجەسىندە اشىلىپ وتىر. كەلۋشىلەر ورتالىقتان شاكارىم قۇدايبەردى ۇلىنىڭ ءومىرى مەن مول مۇراسى تۋرالى قازاق جانە قىتاي تىلدەرىندە تولىق اقپارات الا الادى. سونىمەن قاتار قازاق حالقىنىڭ ەجەلگى داۋىردەن بۇگىنگە دەيىنگى مادەني دامۋ كەزەڭدەرى تۋرالى ماتەريالدار ۇسىنىلادى.
شاكارىم ۋنيۆەرسيتەتىنىڭ رەكتورى دۋمان ورىنبەكوۆ «Xi’an Jiaotong University» پرەزيدەنتى چجان ليتسيۋنگە جانە عىلىم جانە جوعارى ءبىلىم مينيسترلىگىنە ەكى ەلدىڭ اكادەميالىق جانە مادەني باستامالارىن سەنىمگە, عىلىمي پروگرەسكە جانە ءوزارا دامۋعا نەگىزدەلگەن بىرىڭعاي ستراتەگياعا بىرىكتىرگەنى ءۇشىن شىنايى العىس ءبىلدىردى.
«شاكارىم» قازاق-قىتاي مادەني زەرتتەۋلەر ورتالىعىنىڭ اشىلۋى – ەرەكشە مانگە يە تاريحي قادام. ءبىزدىڭ ۋنيۆەرسيتەت قازاق ويشىلى شاكارىمنىڭ اتىندا. سوندىقتان ورتالىقتىڭ اشىلۋى ءبىز ءۇشىن ۇلكەن جەتىستىك دەپ بىلەمىن. شاكارىم ۋنيۆەرسيتەتى مەن «Xi’an Jiaotong University» اراسىنداعى سەرىكتەستىك مادەنيەتتەر مەن ۇرپاقتاردى بىرىكتىرەتىن سەنىم مەن دوستىق كەڭىستىگىن قالىپتاستىرادى. وسى ورتالىقتى اشۋعا قىزمەت جاساعان ەكى ۋنيۆەرسيتەت قىزمەتكەرلەرىنە العىس ايتامىن. بۇل ورتالىق عىلىمي-مادەني جاعىنان ەكى ەلدىڭ جەتىستىكتەرىن ناسيحاتتاۋعا قىزمەت اتقاراتىنىنا سەنىمدىمىن», دەدى رەكتور.