ساۋد ارابياسىنىڭ استاناسى ەر-ريادتا VI يسلام ىنتىماقتاستىعى ويىندارىنىڭ اشىلۋ ءراسىمى ءوتتى. قۇتتىقتاۋ سوزدەر ايتىلىپ, كورەرمەندەر تەاترلاندىرىلعان قويىلىمداردى تاماشالاعاننان كەيىن قاتىسۋشى 57 مەملەكەتتىڭ سپورتتىق دەلەگاتسياسى ساپ تۇزەدى. سالتاناتتى شارادا ەلىمىزدىڭ تۋىن اۋىر اتلەت نۇرعيسا ادىلەت ۇلى مەن دزيۋدوشى ارۋنا جانگەلدينا ۇستاپ شىقتى.
جارىستا ەل نامىسىن 100-گە جۋىق ۇمىتكەر قورعايدى. ولار سپورتتىڭ 15 تۇرىنەن باق سىنايدى. كوماندامىزدىڭ قورجىنىنا العاشقى مەدالدى شەرزود داۆلاتوۆ سالدى. 60 كگ سالماقتا بەلدەسكەن دزيۋدوشى كۇمىس مەدالعا يە بولدى. باستاپقى باسەكەلەردىڭ بارلىعىندا قارسىلاستارىن قاپى قالدىرعان شەرزود فينالدا تۇركيالىق ساليح يىلدىزعا ءۇش «شيدونىڭ» كەسىرىنەن ۇتىلدى. ەرجان ەرەنقايىپوۆ (66 كگ) پەن ءمادي امانگەلدى (81 كگ) دە سول مەجەدەن كورىندى. شەشۋشى سىندا ەرجان وزبەكستاننىڭ وكىلى زاموحشاري بەكمۋرودوۆقا ەسە جىبەرسە, ءمادي تۇركيانىڭ اتاقتى بالۋانى ۆەدات البايراقتىڭ وڭاي ولجاسىنا اينالدى. سامالاي ەرعاليەۆا (63 كگ), ايدار اراپوۆ (90 كگ), نازگۇل ماراتوۆا (+78 كگ) ءۇشىنشى ورىنعا تابان تىرەدى.
دزيۋدو كۇرەسىنىڭ شەبەرلەرى تەك كۇمىس پەن قولانى قاناعات تۇتىپ جاتقاندا ارۋنا جانگەلدينا (78 كگ) جاسىنداي جارقىلدادى. يسلاميادانىڭ اشىلۋ سالتاناتىندا قايسار قىز ەر-رياد تاتاميىندە قارسى كەلگەندەردىڭ بارلىعىن قوعاداي جاپىرىپ, التىننان القا تاقتى. فينالدا ارۋنا كامەرۋندىق گەورگيكۋ مۋنەستى ايقىن باسىمدىقپەن ۇتتى.
جۇزۋشىلەر سايىسىندا ايبات مىرزامۇراتوۆ (200 مەتر كەشەندى ءادىس, 100 مەتر براسس) قوس قولانى قورجىنعا سالدى. 50 مەترگە باتتەرفلياي ادىسىمەن جۇزۋدە اسقان شەبەرلىك تانىتقان ەلىمىزدىڭ قوس ورەنى جەڭىس تۇعىرىنا كوتەرىلدى. بۇل باسەكەدە ادىلبەك مۋسين باس جۇلدەنى ولجالاسا, ماكسيم سكازوبتسوۆ كۇمىسپەن كۇپتەلدى. ءدال وسى قاشىقتىقتاعى ايەلدەر سايىسىندا سوفيا سپودارەنكو تەڭدەسسىز دەپ تانىلدى. سونداي-اق قۇرامىندا ادىلبەك مۋسين, ماكسيم سكازوبتسوۆ, دانيل چەرەپانوۆ, عالىمجان بالابەك سىندى سپورتشىلارى بار ءبىزدىڭ كوماندا ەركىن تاسىلدەگى 4x200 مەترلىك ەستافەتادا ەكىنشى ورىندى يەلەندى.
ۇستەل تەننيسىنەن ەلىمىزدىڭ ەرلەر قۇراماسى ەشكىمگە بەت قاراتار ەمەس. باستاپقى باسەكەلەردە تاجىكستان (8:0) مەن باحرەيننىڭ (8:1) تاس-تالقانىن شىعارعان ولار شيرەك فينالدا قاتاردى (8:1) باس كوتەرتپەي جەڭدى. ءبىزدىڭ كوماندانىڭ نامىسىن كيريلل گەراسيمەنكو, الان قۇرمانعاليەۆ, ايدوس كەنجەعۇلوۆ قورعاپ جاتىر.
جالپى كوماندالىق ەسەپتە ەلىمىز ازىرگە بەسىنشى ورىندا. قورجىنىمىزعا 3 التىن, 5 كۇمىس, 5 قولا مەدال بار. العاشقى ءۇش ورىندى تۇركيا (26+6+4), وزبەكستان (4+9+4), نيگەريا (4+1+1) قۇرامالارى يەلەنىپ تۇر.