وڭىردە جەدەل رەسپيراتورلىق ۆيرۋستىق ينفەكتسيالار مەن تۇماۋ بويىنشا ەپيدەميولوگيالىق احۋال بىرقالىپتى دەڭگەيدە ساقتالىپ وتىر, دەپ حابارلايدى Egemen.kz.
جامبىل وبلىسى اكىمدىگىنىڭ دەنساۋلىق ساقتاۋ باسقارماسىنىڭ باسشىسى سەرجان نازاربەكتىڭ ايتۋىنشا, 1-30 قازان ارالىعىندا وبلىس بويىنشا 30046 ناۋقاس دارىگەرگە جۇگىنگەن. ولاردىڭ 18310-ى – 14 جاسقا دەيىنگى بالالار, 1679-ى – ءبىر جاسقا دەيىنگى سابيلەر, ال 303 جاعداي جۇكتى ايەلدەرگە تيەسىلى. زەرتحانالىق زەرتتەۋ ناتيجەسىندە 12 ناۋقاستان تۇماۋعا جاتپايتىن ۆيرۋستار, ال 5 ناۋقاستان تۇماۋ ۆيرۋسى انىقتالعان.
وتكەن جىلدىڭ سايكەس كەزەڭىمەن سالىستىرعاندا, وڭىردە جرۆي جۇقتىرعاندار سانى 8,5 پايىزعا ارتقان. دەگەنمەن, بارلىق ناۋقاستارعا ءتيىستى ەمدەۋ شارالارى كلينيكالىق حاتتاماعا ساي جۇرگىزىلىپ جاتىر.
– بۇگىندە وبلىس بويىنشا 449 ناۋقاس ستاتسيونارلىق ەم قابىلداۋدا. كوروناۆيرۋس پەن مەتاپنەۆموۆيرۋستىق ينفەكتسيا تىركەلگەن جوق, ءولىم-ءجىتىم جاعدايى بولعان ەمەس. ينفەكتسيالىق ستاتسيونارلار مەن جەدەل جاردەم قىزمەتتەرى تولىق دايىندىقتا, – دەيدى باسقارما باسشىسى. توسەك قورى جەتكىلىكتى. 3 قاراشاداعى جاعداي بويىنشا وبلىستا 714 ينفەكتسيالىق توسەك دايىندالعان. ونىڭ 49-ى جرۆي دياگنوزى بار ناۋقاستارعا, 152-ءسى پنەۆمونيامەن سىرقاتتانعاندارعا ارنالعان. توسەك قورىنىڭ جۇكتەمەسى 28 پايىز, ياعني 513 توسەك بوس.
ەپيدەميالىق جاعداي كۇردەلەنگەن جاعدايدا وبلىستىق دەنساۋلىق ساقتاۋ باسقارماسى ءۇش كەزەڭنەن تۇراتىن ارنايى ءىس-قيمىل جوسپارىن بەكىتكەن. ءبىرىنشى كەزەڭدە توسەك تولىمدىلىعى 70 پايىزعا جەتسە, جرۆي ناۋقاستارىنا ارنالعان ورىندار سانى كوبەيتىلەدى. ەكىنشى كەزەڭدە وبلىستىق كوپبەيىندى بالالار اۋرۋحاناسىندا قوسىمشا 190 توسەك ورىن اشىلادى. ءۇشىنشى كەزەڭدە جامبىل جانە بايزاق اۋداندارىنىڭ ستاتسيونارلارى جۇمىلدىرىلادى. ۆاكتسيناتسيا – ەڭ ءتيىمدى قورعانىس. دارىگەرلەر تۇماۋ مەن ۆيرۋستىق ينفەكتسيالاردان ساقتانۋدىڭ ەڭ سەنىمدى جولى – ۋاقىتىلى ۆاكتسينا الۋ ەكەنىن ەسكە سالادى.
وبلىستىق جۇقپالى اۋرۋلار اۋرۋحاناسىنىڭ باس دارىگەرى ساعىنىش نۇرعابىلوۆانىڭ ايتۋىنشا, سوڭعى كۇندەرى ناۋقاستار سانى ازداپ وسكەن.
– سوڭعى تاۋلىكتە 214 ادام قارالدى. ونىڭ 58-ءى اۋرۋحاناعا جاتقىزىلىپ, قالعاندارىنا امبۋلاتوريالىق كومەك كورسەتىلدى. بۇعان دەيىن تاۋلىگىنە ورتا ەسەپپەن 150-180 ادام كەلەتىن, سوندىقتان ءوسىم بار, بىراق جاعداي تولىق باقىلاۋدا, – دەدى ول.
ماماننىڭ ايتۋىنشا, تۇرعىنداردىڭ كوپشىلىگى ەمحاناعا بارماي, بىردەن ينفەكتسيالىق اۋرۋحاناعا كەلىپ جاتىر. بۇل ءوز كەزەگىندە جۇكتەمەنى ارتتىرىپ, كەزەك تۋدىرىپ وتىر.
– بارلىق ەمحانالار كەشكى ساعات 20:00-گە دەيىن جۇمىس ىستەيدى. سوندىقتان تۇرعىندارعا ەڭ الدىمەن وتباسىلىق دارىگەرگە نەمەسە ءوز ەمحاناسىنا جۇگىنۋ ۇسىنىلادى. اۋرۋدىڭ 80 پايىزدان استامى جەڭىل تۇردە وتەدى جانە ءۇي جاعدايىندا ەمدەلۋگە بولادى, – دەيدى ساعىنىش قابىلتايقىزى.
جرۆي مەن تۇماۋدىڭ ماۋسىمى ءالى اياقتالعان جوق. دەگەنمەن, وبلىستا ەپيدەميولوگيالىق احۋال تولىق باقىلاۋدا. دارىگەرلەر تۇرعىنداردى سابىر ساقتاپ, ءوز دەنساۋلىعىنا جاۋاپكەرشىلىكپەن قاراۋعا شاقىرادى.